ଯାଜପୁର,୨ା୨(ହର୍ଷବର୍ଦ୍ଧନ ବେହେରା): ଜିଲା ଗଠନ ହେବା ପରେ ଲୋକଙ୍କ ଜୀବନଧାରଣ ମାନରେ ଯେତେ ଉନ୍ନତି ହେବା କଥା ତାହା ନୈରାଶ୍ୟଜନକ ହୋଇଛି। ଯେଉଁ ଅଞ୍ଚଳର ଗମନାଗମନ ଯେତେ ସୁଦୃଢ ସେହି ଅଞ୍ଚଳ ସେତେ ଉନ୍ନତ ବୋଲି ବିଶ୍ୱାସ ରହିଛି। କିନ୍ତୁ ଦୁର୍ବଳ ନେତୃତ୍ୱ ତଥା ଠିକାଦାରି ରାଜନୀତି ଯାଜପୁର ଜିଲାର ବିକାଶର ଧାରାକୁ ପଛକୁ ପକାଇ ଦେଇଥିବା ସାଧାରଣରେ ଆଲୋଚନା ହେଉଛି। ଏଠାରେ ପାଣିକୋଇଲି ରାସ୍ତା ଓ ଗୃହ(ଆର୍ ଏଣ୍ଡ ବି) ବା ପୂର୍ତ୍ତ ବିଭାଗର କେତୋଟି ରାସ୍ତା ଓ ବ୍ରିଜଗୁଡିକୁ ଉଦାହରଣ ଭାବେ ନିଆଯାଇପାରେ। ଏହି ଡିଭିଜନ ଅଧୀନରେ ୧୦ କୋଟିରୁ ଊର୍ଦ୍ଧ୍ୱ ଟଙ୍କାର ୪୪ଟି ବିଭିନ୍ନ ପ୍ରକଳ୍ପ ଅଧାପନ୍ତରିଆ ହୋଇ ପଡି ରହିଛି। ସେଥିମଧ୍ୟରୁ ୭ ପ୍ରକଳ୍ପ ୪ ରୁ ୫ ବର୍ଷ ହେଲା ସମ୍ପୂର୍ଣ୍ଣ ହୋଇ ପାରୁନାହିଁ। ବିଡମ୍ବନା ଯେ, ଜିଲା ସଦର ମହକୁମାକୁ ସଂଯୋଗ କରୁଥିବା ରାଜ୍ୟ ରାଜପଥ(ଏସଏଚ୍)-୫୬ର ଷଠିପୁର ଠାରୁ ମଙ୍ଗଳପୁର ରାସ୍ତା କାର୍ଯ୍ୟର ଅବଧି ସମୟ ଶେଷ ହେବାର ୮ ମାସ ଅତିକ୍ରାନ୍ତ ହୋଇ ସାରିଥିଲେ ହେଁ ସରିବାର ନାଁ ଧରୁନାହିଁ। ଏହି ରାସ୍ତାରେ ବ୍ୟାପକ ପିସି କାରବାର ଓ ଠିକାଦାର-ଯନ୍ତ୍ରୀଙ୍କ ମଧ୍ୟରେ ସଲାସୁତୁରା ଚାଲିଥିବା ଯୋଗୁ କାର୍ଯ୍ୟ ନିମ୍ନମାନର ହେବା ସହିତ ଦୀର୍ଘସ୍ଥାୟୀ ହେବା ନେଇ ସଂଶୟ ପ୍ରକାଶ ପାଇଛି।
ଯାଜପୁର ଜିଲାର ସୁଦୃଢ ଗମନାଗମନ ପାଇଁ ପୂର୍ତ୍ତ, ଗ୍ରାମ୍ୟ ନିର୍ମାଣ ଓ ଜଳସେଚନ ବିଭାଗ ଉପରେ ଦାୟିତ୍ୱ ନ୍ୟସ୍ତ ରହୁଛି। ସେଥିମଧ୍ୟରୁ ବୃହତ୍ ରାସ୍ତା ଓ ବ୍ରିଜ୍ ପ୍ରକଳ୍ପ କାର୍ଯ୍ୟ ପୂର୍ତ୍ତ ବିଭାଗ ଦ୍ୱାରା ସମ୍ପନ୍ନ କରାଯାଉଛି। କିନ୍ତୁ ପାଣିକୋଇଲି ପୂର୍ତ୍ତ ଡିଭିଜନ ରାଜ୍ୟ ସରକାରଙ୍କ ଏଭଳି ବିଶ୍ୱାସ ଉପରେ ଓଲଟା ଫଳାଫଳ ଦେଉଥିବା ଚର୍ଚ୍ଚା ହେଉଛି। ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟ ଅନୁଯାୟୀ, ଷଠିପୁର ଠାରୁ ଯାଜପୁର ପଟକୁ ବୁଢା ନଦୀ ନିକଟ ପର୍ଯ୍ୟନ୍ତ ୩.୪୦୦ କି.ମି. ଚାରିଲେନ ରାସ୍ତା ନିର୍ମାଣ ପାଇଁ ୨୪.୯୮ କୋଟି ଟଙ୍କା ମଞ୍ଜୁର ହୋଇଛି। ଏହି ରାସ୍ତା କାର୍ଯ୍ୟକୁ ଆଶୀର୍ବାଦ ଇଞ୍ଜିନିୟର ଏଣ୍ଡ କନଷ୍ଟ୍ରକ୍ସନ ପ୍ରାଇଭେଟ ଲିଃ ଠିକାସଂସ୍ଥାକୁ ନିର୍ମାଣ ଦାୟିତ୍ୱ ଦିଆଯାଇଛି। ଚୁକ୍ତି ଅନୁସାରେ ୩୦ା୧୧ା୨୦୨୧ରେ ଆରମ୍ଭ କରାଯାଇ ୨୯ା୫ା୨୦୨୩ରେ ରାସ୍ତା କାର୍ଯ୍ୟ ସରିବା କଥା। କିନ୍ତୁ ରାସ୍ତା କାର୍ଯ୍ୟକୁ ଦେଖିଲେ ପ୍ରାୟ ୫୦ ପ୍ରତିଶତ କାମ ବି ସମ୍ପୂର୍ଣ୍ଣ ହୋଇ ପାରିନାହିଁ। ଏହି ରାସ୍ତା ସିଧାସଳଖ ଯାଜପୁର ସଦର ମହକୁମାକୁ ସଂଯୋଗ କରୁଛି। ଜିଲାର ଅର୍ଦ୍ଧାଧିକ ଅଞ୍ଚଳବାସୀ ଏହି ରାସ୍ତା ଦେଇ ଜିଲାପାଳ, ଜିଲା ପରିଷଦ ନିର୍ବାହୀ ଅଧିକାରୀ, ଜଳସେଚନ, ଗ୍ରାମ୍ୟ ନିର୍ମାଣ, ମହିଳା ଓ ଶିଶୁ ବିଭାଗ, ଜିଲା ସଦର ଡାକ୍ତରଖାନା, ମା’ବିରଜା ମନ୍ଦିର, କୁସୁମା ପ୍ରଭୃତି ସ୍ଥାନକୁ ଯାଇଥାନ୍ତି। କିନ୍ତୁ ରାସ୍ତା ନିର୍ମାଣ ସମୟରେ ଭାରିଯାନଗୁଡ଼ିକ ଚଳାଚଳ ସହ ଅତ୍ୟଧିକ ଧୂଳି ଉଡ଼ି ପଥଚାରୀଙ୍କ ପାଇଁ ବିପଦ ହେଉଛି। ପାଣି ସିଞ୍ଚନ ବ୍ୟବସ୍ଥା ଥିଲେ ମଧ୍ୟ ଠିକାସଂସ୍ଥା ଦ୍ୱାରା ତାହା କାର୍ଯ୍ୟକାରୀ ହେଉନି। ରାସ୍ତାରେ ଆବଶ୍ୟକ ନିର୍ମାଣ ସାମଗ୍ରୀ ବ୍ୟବହାର ହେଉନାହିଁ। ବ୍ୟୟ ଅଟକଳ ଅନୁସାରେ ପାଉଁଶ, ବାଲି, ମେଟାଲ ଇତ୍ୟାଦି ବ୍ୟବହାରରେ ନିମ୍ନମାନର ଓ ଅସମାନତା ରହୁଥିବାରୁ ବିଭିନ୍ନ ସ୍ଥାନରେ ଗେଟି ଉଠି ଯାଇଥିବା ଦେଖିବାକୁ ମିଳିଛି। ଯେନତେନ ପ୍ରକାରେ କାମ ସାରି ଆବଣ୍ଟିତ ଅନୁଦାନର ସିଂହଭାଗ ଅର୍ଥ ଚଲୁ କରିବାକୁ ଯୋଜନା ଚାଲିଥିବା ସାଧାରଣରେ ଚର୍ଚ୍ଚା ହେଉଛି। ଏହିସବୁ ଅନିୟମିତତା ସମ୍ପର୍କରେ ବିଭାଗୀୟ ତଦନ୍ତକାରୀ ଯନ୍ତ୍ରୀ ଜାଣିଥିଲେ ସୁଦ୍ଧା ମୋଟା ଅଙ୍କର ପିସି ନେଇ ବସି ରହିଥିବା ଅଭିଯୋଗ ହେଉଛି। ଅନ୍ୟପକ୍ଷେ ବ୍ରିଟିଶ ଅମଳର ଯୋକଡିଆ ବ୍ୟାରେଜରୁ ଆସିଥିବା ବହୁ ପୁରୁଣା କେନାଲକୁ ଏହି ରାସ୍ତା ନିର୍ମାଣ ପାଇଁ ପୋତି ଦିଆଯାଇଛି। ଏ ସମ୍ପର୍କରେ ଜଳସେଚନ ବିଭାଗର କାହାରି ପାଖରେ ଖବର ନାହିଁ। ସେହିପରି ୨୩.୪୮ କୋଟି ଟଙ୍କାର ଏନଏଚ-୧୬ ରୁ ଅର୍ଦ୍ଦାଲିଆ ରାସ୍ତା, ୨୨.୦୯ କୋଟି ଟଙ୍କାର ଏନଏଚ-୧୬ ଠାରୁ ମହେଶ୍ୱରପୁର, ୫୯.୧୮ କୋଟି ଟଙ୍କାର ଚୋର୍ଦ୍ଦା ଠାରୁ ଡୁବୁରୀ କଳିଙ୍ଗନଗର ଶିଳ୍ପାଞ୍ଚଳ ରାସ୍ତା, ୪୯.୫୧ କୋଟି ଟଙ୍କାର ରେଙ୍ଗାଲି ବାମପାର୍ଶ୍ୱ କେନାଲର କାମାକ୍ଷାନଗର ଠାରୁ ଡବୁରି, ୨୪.୯୪ କୋଟି ଟଙ୍କାର ବନ୍ଧମୁଣ୍ଡା ଖରସୁଆଁ ନଦୀ ଉପରେ ବ୍ରିଜ ନିର୍ମାଣ, ୫୦.୫୫ କୋଟି ଟଙ୍କାର ପଣ୍ଡୁଆ ନଦୀର କଳାମାଟି ବ୍ରିଜ, ୩୨.୦୯ କୋଟି ଟଙ୍କାର ଏନ.ସି କଲେଜରେ ଆର୍ଟ ବ୍ଲକ, ଅଡିଟୋରିୟମ ଓ ଓପନ ଏୟାର ଡିଏଟର ନିର୍ମାଣ କାର୍ଯ୍ୟ ୪ ବର୍ଷରୁ ଊର୍ଦ୍ଧ୍ୱ ହେଲା ଅଧାରେ ଲାଖିଛି।
ଜିଲା ସଦର ମହକୁମାକୁ ରାସ୍ତା ନିର୍ମାଣ ସମ୍ପର୍କରେ ଯାଜପୁର ସହକାରୀ ନିର୍ବାହୀ ଯନ୍ତ୍ରୀ ଭଗବାନ ସାହୁଙ୍କୁ ପଚାରିବାରେ ସେ କହିଛନ୍ତି, ଉକ୍ତ ରାସ୍ତା କାମ ଜୁନ ମାସ ସୁଦ୍ଧା ଶେଷ କରିବାକୁ ଯୋଜନା ରହିଛି। ତେବେ କାର୍ଯ୍ୟ ଠିକଠାକ ଚାଲିଛି, ଏଥିରେ କୌଣସି ଅନିୟମିତତା ହେଉନାହିଁ।
