ମୁମ୍ବାଇ,୨୭।୭: କରୋନା ମହାମାରୀ ଯୋଗୁ ଦେଶର ଅର୍ଥ ବ୍ୟବସ୍ଥା ବର୍ତ୍ତମାନ ପ୍ରଭାବିତ ହୋଇ ରହିଛି। ଏହି ସମୟରେ ଅର୍ଥ ବ୍ୟବସ୍ଥାର ଗତିବିଧିକୁ ବଢ଼ାଇବାର ଉପାୟ ସମ୍ପର୍କରେ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ, ଭିତ୍ତିଭୂମି କ୍ଷେତ୍ର ନିବେଶ ବୃଦ୍ଧି ହେବାର ଆବଶ୍ୟକତା ରହିଛି। ଉଦ୍ୟୋଗ ସଂଘ ସିଆଇଆଇର ଏକ କାର୍ଯ୍ୟକ୍ରମରେ ଯୋଗଦେଇ ଶକ୍ତିକାନ୍ତ କହିଛନ୍ତି, ନିବେଶ ବୃଦ୍ଧି ଲାଗି ଉଭୟ ସରକାରୀ ଏବଂ ଘରୋଇ କ୍ଷେତ୍ରର ଯୋଗଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସରକାର କୃଷିକ୍ଷେତ୍ର ଲାଗି ଗ୍ରହଣ କରିଥିବା ବିଭିନ୍ନ ପଦକ୍ଷେପ ଯୋଗୁ ଉକ୍ତ କ୍ଷେତ୍ର ଲାଭବାନ୍ ହେବ। କୃଷିକ୍ଷେତ୍ର ଆକର୍ଷଣର କେନ୍ଦ୍ରବିନ୍ଦୁ ହେବାକୁ ଯାଉଛି। ଦେଶ ମଧ୍ୟରେ ଏମିତି ନୀତି ଆସିବାର ଆବଶ୍ୟକତା ରହିଛି ଯାହାଦ୍ୱାରା କୃଷିକ୍ଷେତ୍ର ଅଭିବୃଦ୍ଧି ସାଧନ କରିବାକୁ ସକ୍ଷମ ହେବ। ବିଶେଷକରି କୃଷି ଆୟ ବୃଦ୍ଧି ଉପରେ ନୀତି ଆଣିବାକୁ ହେବ। ଆମେରିକା, ବ୍ରିଟେନ, ୟୁରୋପୀୟ ସଂଘ ଏବଂ ଅନ୍ୟ ଦେଶ ସହ ମୁକ୍ତ ବାଣିଜ୍ୟ ଚୁକ୍ତି ସମ୍ପୂର୍ଣ୍ଣ କରିବା ଲାଗି ମଧ୍ୟ ସରକାର ଧ୍ୟାନ ଦିଅନ୍ତୁ ବୋଲି ଦାସ ମତବ୍ୟକ୍ତ କରିଛନ୍ତି। ଗ୍ଲୋବାଲ ଭାଲ୍ୟୁ ଚେନ୍ର ୧% ଯୋଗଦାନ ବଢ଼ିଲେ ପ୍ରତି ବ୍ୟକ୍ତିର ଆୟ ଉପରେ ଏହାର ସୁପ୍ରଭାବ ପଡିବ। ଘରୋଇ ବଜାର ଉପରେ ରିଜର୍ଭ ବ୍ୟାଙ୍କ ବର୍ତ୍ତମାନ ନଜର ରଖିଛି। ସେହିଭଳି ସେ ବ୍ୟାଙ୍କଗୁଡିକୁ ଆହ୍ବାନ ଦେଇ କହିଛନ୍ତି ଯେ, ପ୍ରତିକୂଳ ସ୍ଥିତିକୁ ସହିବା ଲାଗି କ୍ଷମତା ଏବଂ ଚ୍ୟାଲେଞ୍ଜିଂ ସ୍ଥିତିକୁ ସାମ୍ନା କରିବା ପୁଞ୍ଜିକୁ ଧ୍ୟାନରେ ରଖିବାକୁ ହେବ।
