ନୂଆଦିଲ୍ଲୀ,୧୮।୨ : ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କେନ୍ଦ୍ରୀୟ ଚୁକ୍ତିରେ ସାମିଲ ଥିବା ଖେଳାଳିଙ୍କୁ ଚେତାବନୀ ଦେଇଛି। ଚଳିତ ରଣଜୀ ଟ୍ରଫି ସିଜନରେ ଖେଳୁ ନଥୁବା ଖେଳାଳିଙ୍କୁ ଗମ୍ଭୀର ପରିଣାମର ସମ୍ମୁଖୀନ ହେବାକୁ ପଡିବ ବୋଲି ବୋର୍ଡ ତରଫରୁ ସତର୍କ କରାଇ ଦିଆଯାଇଛି। ନିଜ ରାଜ୍ୟ ଦଳ ତରଫରୁ ନ ଖେଳି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ପାଇଁ ପ୍ରସ୍ତୁତି କରୁଥିବା କେନ୍ଦ୍ରୀୟ ଚୁକ୍ତିବଦ୍ଧ ଖେଳାଳି ଓ ଭାରତ-ଏ ପାଇଁ ଖେଳୁଥିବା କ୍ରିକେଟରଙ୍କୁ ଚିଠି ଲେଖି ବିସିସିଆଇ ସମ୍ପାଦକ ଜୟ ଶାହା ଏ ନେଇ ଅବଗତ କରାଇଛନ୍ତି।
ଜାତୀୟ ଦଳ ଚୟନ ପାଇଁ ଘରୋଇ କ୍ରିକେଟର ପ୍ରଦର୍ଶନ ହେଉଛି ମୁଖ୍ୟ ମାପଦଣ୍ଡ। ଘରୋଇ କ୍ରିକେଟ ନ ଖେଳି ଆଇପିଏଲ୍କୁ ପ୍ରାଥମିକତା ଦେଉଥିବା ଖେଳାଳିଙ୍କ ବ୍ୟବହାର ଚିନ୍ତାଜନକ ବୋଲି ସେ ଚିଠିରେ ଉଲ୍ଲେଖ କରିଛନ୍ତି। କିଛିଦିନ ତଳେ କେତେଜଣ ଖେଳାଳି ଘରୋଇ କ୍ରିକେଟ ନ ଖେଳି ଆଇପିଏଲ୍କୁ ଗୁରୁତ୍ବ ଦେଉଥିବାର ଉଦାହରଣ ସମ୍ମୁଖକୁ ଆସିଥିଲା। ଘରୋଇ କ୍ରିକେଟକୁ ଆଧାର କରି ଭାରତୀୟ କ୍ରିକେଟର ଛିଡା ହୋଇଛି। ତେଣୁ ଖେଳାଳିଙ୍କ ଏଭଳି ଆଚରଣ ଚିନ୍ତାଜନକ ବୋଲି ଶାହା କହିଛନ୍ତି।
ରାଜସ୍ଥାନ ଦ୍ରୁତ ବୋଲର ଦୀପକ ଚହର, ଝାଡଖଣ୍ଡ ୱିକେଟ ରକ୍ଷକ ବ୍ୟାଟର ଇସାନ କିସାନ, ମୁମ୍ବାଇର ଡାହାଣହାତୀ ବ୍ୟାଟର ଶ୍ରେୟସ ଆୟରଙ୍କ ଭଳି ଖେଳାଳି ଶୁକ୍ରବାରଠାରୁ ଆରମ୍ଭ ହୋଇଥିବା ରାଣଜୀ ଟ୍ରଫିର ଅନ୍ତିମ ରାଉଣ୍ଡ ମ୍ୟାଚ୍ ନ ଖେଳି ଆଇପିଏଲ ପାଇଁ ପ୍ରସ୍ତୁତି ଚଳାଉଥିବାର ଖବର ର ସାମ୍ନାକୁ ଆସିଛି । ଖେଳାଳିମାନେ ରଣଜୀ ଖେଳିବା ଉପରେ ବୋର୍ଡ ଏବେ ଅଧିକ ଗୁରୁତ୍ବ ଦେଉଛି। କିଷାନ ବରୋଦାରେ ହାର୍ଦ୍ଦିକ ଓ କୁନାଲ ପାଣ୍ୟାଙ୍କ ସହ ଅଭ୍ୟାସ କରି ଚର୍ଚ୍ଚାକୁ ଆସିଛନ୍ତି।
