ଛତ୍ରପୁର୨୬।୫(ଦିଲ୍ଲୀପ ସାମଲ/ବିଦ୍ୟାଧର ସାହୁ): ଗଞ୍ଜାମ ଜିଲା ହୁମ୍ମା ଫାଣ୍ଡି ଅଧୀନ ୧୬ ନମ୍ବର ଜାତୀୟ ରାଜପଥରେ ଏକ ସିରିଜ ଦୁର୍ଘଟଣା ଘଟିଛି। ଏକ ଟ୍ରକ ଭାରସାମ୍ୟ ହରାଇ ଏକ ପିକ୍ଅପ ଭ୍ୟାନ ଓ ବାଇକ୍କୁ ଧକ୍କା ଦେଇଛି।
ଦୁର୍ଘଟଣାରେ ୩ଜଣ ଗୁରୁତର ହୋଇଥିବା ବେଳେ ଅନ୍ୟ ଜଣ ଆହତ ହୋଇଥିବା ଜଣାପଡିଛି। ଆହତ ବ୍ୟକ୍ତିମାନେ ହେଲେ ହୁମ୍ମା ସହରର ଜଣେ ହୋଇଥିବା ବେଳେ ପିକଅପ ଭ୍ୟାନରେ ଥିବା ନୟାଗଡ଼ ଜିଲାର ସୁନାଖଳା ଗ୍ରାମର ୩ଜଣ ବୋଲି ଜଣାପଡିଛି।
ମିଳିଥିବା ସୂଚନା ମୁତାବକ, ସନ୍ଧ୍ୟାରେ ହୁମ୍ମା ଫାଣ୍ଡି ନିକଟରେ ଗୋଟିଏ ପାର୍ଶ୍ୱରେ ଓଭର ବ୍ରିଜ କାର୍ଯ୍ୟ ବିଳମ୍ବ ଯୋଗୁ ରାଜପଥର ଏକ ପାର୍ଶ୍ୱ ବନ୍ଦ ରହିଥିବା ବେଳେ ଜାତୀୟ ରାଜପଥର ଅନ୍ୟ ଏକ ପାର୍ଶ୍ୱର ବୁଲାଣିଆରେ ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଆସୁଥିବା ଏକ ଟ୍ରକ(ଜେଏଚ୍୦୯ଏଏଚ-୯୨୯୪) ଭାରସାମ୍ୟ ହରାଇ ଏକ ପିକଅପ୍ ଭ୍ୟାନ (ଓଡି୦୨ ପି-୯୧୫୦) ଓ ଏକ ବାଇକ(ଓଡି୨୫ଜି-୯୨୯୫)କୁ ପଛପଟୁ ଧକ୍କା ଦେଇଥିଲା। ଫଳରେ ପିକଅପ ଭ୍ୟାନ୍ରେ ଥିବା ୩ଜଣ ଯାତ୍ରୀ ଏବଂ ବାଇକ୍ ଆରୋହୀ ଆହତ ହୋଇଥିଲେ। ସେମାନଙ୍କ ମଧ୍ୟରୁ ୩ଜଣଙ୍କ ଅବସ୍ଥା ଗୁରୁତର ରହିଛି।
ଖବର ପାଇ ହୁମ୍ମା ଫାଣ୍ଡି ଓ ରମ୍ଭା ପୋଲିସ ପହଞ୍ଚି ଆମ୍ବୁଲାନ୍ସ ଯୋଗେ ଆହତଙ୍କୁ ବ୍ରହ୍ମପୁର ମେଡିକାଲକୁ ପଠାଇଥିଲେ। ପୋଲିସ ଟ୍ରକକୁ ଜବତ କରିବା ସହ ଗାଡ଼ି ଡ୍ରାଇଭର ଏବଂ ହେଲ୍ପରଙ୍କୁ ପୋଲିସ ଅଟକ ରଖି ପଚରାଉଚୁରା କରୁଛି।
ଓଭର ବ୍ରିଜ ନିର୍ମାଣ କାର୍ଯ୍ୟ ବିଳମ୍ବ ଯୋଗୁ ହୁମ୍ମା ରାଜପଥ ଉପରେ ବାରମ୍ବାର ଦୁର୍ଘଟଣା ଘଟୁଥିବା ବେଳେ ପ୍ରଶାସନ ଓ ସ୍ଥାନୀୟ ଠିକାଦାର ଲୋକଙ୍କ ଜୀବନ ସହ ଖେଳ ଖେଳୁଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
