ମୁମ୍ବାଇ: ଆମେରିକା ରାଷ୍ଟ୍ରପତି ନିର୍ବାଚନ ଫଳାଫଳକୁ ବର୍ତ୍ତମାନ ସାରା ବିଶ୍ୱ ଅପେକ୍ଷା କରିଛି। ଏଭଳି ସ୍ଥିତିରେ ଭାରତୀୟ ଶେୟାର ବଜାର ବୁଧବାର ପ୍ରାୟ ୧% ଉଚ୍ଚରେ ରହି ବନ୍ଦ ହୋଇଛି। ସଦ୍ୟ ସୂଚନା ମୁତାବକ ବାଇଡେନ୍ ୨୨୫ ଇଲେକ୍ଟୋରାଲ ଭୋଟ ଗ୍ରହଣ କରିଛନ୍ତି। ଅପରପକ୍ଷରେ ଡୋନାଲ୍ଡ ଟ୍ରମ୍ପ ୨୧୩ ଭୋଟ ଲାଭ କରିଛନ୍ତି। ଆମେରିକା ରାଷ୍ଟ୍ରପତି ହେବା ଲାଗି ୨୭୦ ଇଲେକ୍ଟୋରାଲ ଭୋଟ୍ର ଆବଶ୍ୟକତା ରହିଛି। ବୁଧବାର ବମ୍ବେ ଷ୍ଟକ୍ ଏକ୍ସଚେଞ୍ଜ ୩୫୫ ପଏଣ୍ଟ ଉଚ୍ଚରେ ରହିଛି। ସେନ୍ସେକ୍ସ ୪୦,୬୧୬ ପଏଣ୍ଟ ସ୍ତରରେ ବନ୍ଦ ହୋଇଥିବା ବେଳେ ନିଫ୍ଟି ୧୧,୯୦୮ ପଏଣ୍ଟ ସ୍ତରରେ ବନ୍ଦ ହୋଇଛି। ଏଥିରେ ୫୫ ପଏଣ୍ଟ ବୃଦ୍ଧି ପରିଲକ୍ଷିତ ହୋଇଛି। ବିଭିନ୍ନ କ୍ଷେତ୍ରକୁ ଦେଖିଲେ ଆଇଟି ଷ୍ଟକ୍ କାରବାର ବେଶ୍ ଉନ୍ନତ ରହିଛି। ନିଫ୍ଟିର ଆଇଟି ସୂଚକାଙ୍କ ୧.୮% ଉଚ୍ଚରେ ରହିଛି। ବିଶ୍ୱ ବଜାରର ଶେୟାର କାରବାର ପ୍ରଭାବିତ ରହିଥିବା ବେଳେ ବଣ୍ଡ ଏବଂ ଡଲାର କାରବାର ଉନ୍ନତ ସ୍ଥିତିରେ ରହିଛି।
୧୪ରେ ସ୍ବତନ୍ତ୍ର ଦିଓ୍ବାଲି ମହୁରତ ଟ୍ରେଡିଂ
ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ) ଏବଂ ନ୍ୟାଶନାଲ ଷ୍ଟକ ଏକ୍ସଚେଞ୍ଜ (ଏନ୍ଏସ୍ଇ) ପକ୍ଷରୁ ଚଳିତ ମାସ ୧୪ରେ ଗୋଟିଏ ଘଣ୍ଟାର ସ୍ପେଶାଲ ମହୁରତ ଟ୍ରେଡିଂ ସେସନ ବ୍ୟବସ୍ଥା ସମ୍ପର୍କରେ ଘୋଷଣା କରାଯାଇଛି। ଦୀପାବଳି ଅବସରରେ ଏଭଳି ଟ୍ରେଡିଂ ସୁବିଧା ମିଳିବ। ସନ୍ଧ୍ୟା ୬.୧୫ ରୁ ୭.୧୫ ଯାଏ ସେସନ ଟ୍ରେଡିଂ ଚାଲିବ ବୋଲି ଷ୍ଟକ୍ ଏକ୍ସଚେଞ୍ଜ ପକ୍ଷରୁ ସୂଚନା ଦିଆଯାଇଛି। ଏଭଳି ଟ୍ରେଡିଂ ଧନ ବୃଦ୍ଧି ଦିଗରେ ସହାୟକ ହୋଇଥାଏ ବୋଲି ଲୋକଙ୍କ ମନରେ ବିଶ୍ୱାସ ରହିଛି।
