ପୂର୍ବତନ ସଲିସିଟର ଜେନେରାଲ ତଥା ଦେଶର ଜଣାଶୁଣା ଓକିଲ ହରିଶ ସାଲଭେ ଆସନ୍ତା ସପ୍ତାହରେ ପୁଣି ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି। ସାଲଭେଙ୍କୁ ଏବେ ୬୫ ବର୍ଷ। ୩୮ ବର୍ଷ ବୈବାହିକ ଜୀବନ ବିତାଇବା ପରେ ଗତ ମାସରେ ସ୍ତ୍ରୀ ମୀନାକ୍ଷୀ ସାଲଭେଙ୍କୁ ଛାଡପତ୍ର ଦେଇଥିଲେ। ହରିଶ ସାଲଭେ ଏବଂ ମୀନାକ୍ଷୀଙ୍କ ମଧ୍ୟ ଦୁଇଟି ଝିଅ ଅଛନ୍ତି। ହରିଶ ସାଲଭେ ୨୮ ଅକ୍ଟୋବରରେ ଲଣ୍ଡନର ଏକ ଚର୍ଚ୍ଚରେ ତାଙ୍କ ବନ୍ଧୁ କାରୋଲିନ ବ୍ରୋସାର୍ଡଙ୍କୁ ବିବାହ କରିବାକୁ ଯାଉଛନ୍ତି। ଏହା ଉଭୟଙ୍କର ଦ୍ୱିତୀୟ ବିବାହ। ଖ୍ରୀଷ୍ଟିଆନ ହେବା ପାଇଁ ସାଲଭେ ମଧ୍ୟ ତାଙ୍କର ଧର୍ମ ପରିବର୍ତ୍ତନ କରିଛନ୍ତି। ସେ କାରୋଲିନଙ୍କ ସହ ଗତ ଦୁଇ ବର୍ଷ ଧରି ଉତ୍ତର ଲଣ୍ଡନର ଚର୍ଚ୍ଚରେ ନିୟମିତ ଯୋଗ ଦେଉଥିଲେ। ଏକ କଳା ପ୍ରଦର୍ଶନୀରେ ହରିଶ ସାଲଭେ କାରୋଲିନଙ୍କୁ ଭେଟିଥିଲେ।
ସୁପ୍ରିମକୋର୍ଟର ପ୍ରଧାନ ବିଚାରପତି ଶରଦ ଅରବିନ୍ଦ ବୋବଡେ ଏବଂ ସାଲଭେ ଗୋଟିଏ ବିଦ୍ୟାଳୟରେ ଅଧ୍ୟୟନ କରିଥିଲେ। ୧୯୭୬ରେ ସାଲଭେ ଦିଲ୍ଲୀ ଏବଂ ବୋବଡେ ମୁମ୍ବାଇ ହାଇକୋର୍ଟକୁ ଆସିଥିଲେ। ପରେ ବୋବଡେ ହାଇକୋର୍ଟର ଜଜ ଏବଂ ସାଲଭେ ସିନିୟର ଆଡଭୋକେଟ ଏବଂ ପରେ ସଲିସିଟର ଜେନେରାଲ ହୋଇଥିଲେ। ଚମତ୍କାର ପ୍ରତିଭାର ଅଧିକାରୀ ହରିଶ ସାଲଭେ ଜଣେ ପ୍ରଖ୍ୟାତ ଓକିଲ ଭାବେ ଜଣାଶୁଣା। ଏହି କାରଣରୁ ତାଙ୍କୁ ଭାରତ ସରକାର ତାଙ୍କୁ ସଲିସିଟର ଜେନେରାଲ ଭାବରେ ନିଯୁକ୍ତ କରିଥିଲେ। ସାଲଭେ ଏବଂ କୁଲଭୂଷଣ ଯାଦବ ଅନେକ ଅନ୍ତର୍ଜାତୀୟ ପ୍ରସଙ୍ଗରେ ଭାରତ ସରକାରଙ୍କ ପକ୍ଷରୁ ଲବି କରି ଦେଶକୁ ଗର୍ବିତ କରିଛନ୍ତି। ଦେଶର ଅଗ୍ରଣୀ ଶିଳ୍ପପତି ତଥା କମ୍ପାନୀ ଭୋଡାଫୋନ, ରିଲାଏନ୍ସ, ମୁକେଶ ଅମ୍ବାନୀ, ରତନ ଟାଟା ଭଳି ସମସ୍ତ ବଡ ନାମର ଆଇନଗତ ମାମଲାରେ ସାଲଭେ ମଧ୍ୟ ପ୍ରତିନିଧିତ୍ୱ କରିଛନ୍ତି।
