ବଡ଼ମ୍ବା,୧୦।୭(ମାୟାଧର ମଲ୍ଲିକ) : ବଡ଼ମ୍ବା ବ୍ଲକ ପ୍ରଶାସନ ତରଫରୁ ମଙ୍ଗଳବାର ଜବରଦଖଲ ଉଚ୍ଛେଦ କରାଯାଇଛି। ବିଶେଷ କରି ବଡ଼ମ୍ବା ବ୍ଲକ କାର୍ଯ୍ୟାଳୟ ସମ୍ମୁଖ ମୁଖ୍ୟ ରାସ୍ତାପାର୍ଶ୍ୱକୁ ଦୀର୍ଘ ବର୍ଷ ଧରି ଜବରଦଖଲ କରିଥିବା ବ୍ୟବସାୟୀ ଓ ଦୋକାନଘରଗୁଡ଼ିକୁ ଭଙ୍ଗାଯାଇଛି। ବଡ଼ମ୍ବା ଅତିରିକ୍ତ ତହସିଲଦାର ସୁବାସ ଚନ୍ଦ୍ର ମହାନ୍ତିଙ୍କ ନେତୃତ୍ୱ ରେ ଏକ ଟିମ୍ ସଦଳବଳେ ଘଟଣାସ୍ଥଳରେ ପହଞ୍ଚତ୍ ସରକାରୀ ସ୍ଥାନରେ ଜବରଦଖଲ କରିଥିବା ଦୋକାନ ଓ ବ୍ୟବସାୟିକ ପ୍ରତିଷ୍ଠାନଗୁଡ଼ିକୁ ସ୍ଥାନ ଖାଲି କରିବାକୁ ନିବେଦନ କରିଥିଲେ। ଘଟଣା ସ୍ଥଳରେ ବିଜେଡି ନେତା ସରୋଜ କୁମାର ପଟ୍ଟନାୟକ ଓ ପୂର୍ବତନ ଜିଲା ପରିଷଦ ସଭ୍ୟ ସୂର୍ଯ୍ୟ କିଶୋର ମହାନ୍ତିଙ୍କ ସମେତ ଅନ୍ୟାନ୍ୟ କର୍ମକର୍ତ୍ତା ପହଞ୍ଚତ୍ ଜବରଦଖଲ ଉଚ୍ଛେଦକୁ ବିରୋଧ କରିବାରୁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଜବରଦଖଲକାରୀ ବ୍ୟବସାୟୀ ଏହାକୁ ବିରୋଧ କରି ପାଟିତୁଣ୍ଡ କରିଥିଲେ। ଏପରିକି କେତେଜଣ ଦୋକାନୀ ସମ୍ମୁଖ ରାସ୍ତା ଉପରେ ଶୋଇଯାଇଥିଲେ। ସୂଚନା ମୁତାବକ, ବ୍ଲକ କାର୍ଯ୍ୟାଳୟ ସମ୍ମୁଖରେ କିଛି ବ୍ୟବସାୟୀ ସରକାରୀ ସ୍ଥାନରେ ଜବରଦଖଲ କରି ବ୍ୟବସାୟ କରୁଥିଲେ ଏନେଇ ଏକ ମାମଲା ମାନ୍ୟବର ଉଚ୍ଚ ନ୍ୟାୟାଳୟରେ କରାଯାଇଥିବା ବେଳେ ଜବରଦଖଲ ଉଚ୍ଛେଦ ହେବା ନେଇ ରାୟ ପ୍ରକାଶ ପାଇଥିଲା। ଏହା ପରେ ପ୍ରଶାସନିକସ୍ତରରେ ମଙ୍ଗଳବାର ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ତେବେ ଏହା ଏକ ଭେଳିକି ସଦୃଶ ଭଳି ମନେହେଉଥିଲା। ସାମାନ୍ୟ କେତୋଟି ଦୋକାନ ଘର ଭଙ୍ଗା ଯାଇଥିବା ବେଳେ ଅନ୍ୟ କିଛି ଦୋକାନ ଗୃହର ଆଜବେଷ୍ଟସ ଖୋଲାଯାଇ ଉଚ୍ଛେଦ ପ୍ରକ୍ରିୟା ବନ୍ଦ କରାଯାଇଥିଲା। ଘଟଣାସ୍ଥଳରେ ଅତିରିକ୍ତ ତହସିଲଦାର ମହାନ୍ତିଙ୍କ ସମେତ ରାଜସ୍ବ ସହାୟକ ଶୈଳେନ୍ଦୁ ଶେଖର ନାୟକ, ସନ୍ତୋଷ କୁମାର ନାୟକ, ରାଜସ୍ବ ନିରୀକ୍ଷକ, ସୁପରଭାଇଜର ପ୍ରମୁଖ ଉପସ୍ଥିତ ଥିଲେ। ଅନ୍ୟ ପକ୍ଷରେ ଆଇନଶୃଙ୍ଖଳା ପରିସ୍ଥିତି ପାଇଁ ଆଠଗଡ଼ ଉପଖଣ୍ଡ ପୋଲିସ ଅଧିକାରୀ ରବୀନ୍ଦ୍ର କୁମାର ମଲ୍ଲିକ, ବଡ଼ମ୍ବା ଥାନା ଅଧିକାରୀ ଶିବ ପ୍ରସାଦ ଭଦ୍ର, ଥାନା ଏସ ଆଇ ବିଶ୍ୱବନ୍ଦିତା ସାହୁ, ଉତ୍କଳ କେଶରୀ ପ୍ରଧାନଙ୍କ ସମେତ ଏକ ପ୍ଲାଟୁନ ସଶସ୍ତ୍ର ପୋଲିସ ବାହିନୀ ଉପସ୍ଥିତ ଥିଲେ। ଏ ସମ୍ପର୍କରେ ଅତିରିକ୍ତ ତହସିଲଦାର ମହାନ୍ତିଙ୍କୁ ପଚରାଯିବାରୁ ଉଚ୍ଚ ନ୍ୟାୟାଳୟଙ୍କ ଆଦେଶ ମୁତାବକ ଉଚ୍ଛେଦ କାର୍ଯ୍ୟକ୍ରମ କରାଯାଉଛି। ଏନେଇ ବ୍ୟବସାୟୀମାନେ ନିଜ ଦୋକାନରେ ରଖିଥିବା ସାମଗ୍ରୀ ତଥା ଗୃହ ସରଞ୍ଜାମକୁ ନେଇଯିବାକୁ ସେ କହିଥିଲେ।
