ପୁଣେ, ୨୬।୬: ମହାରାଷ୍ଟ୍ର ଲୋହଗଡ଼ ଦୁର୍ଗରେ ୨୬ ବର୍ଷୀୟ କେତନ ଅଗ୍ରୱାଲଙ୍କ ମୃତ୍ୟୁ ପରର ଘଟଣା ବର୍ଣ୍ଣନା କରିଛନ୍ତି ସିକ୍ୟୁରିଟି ଗାର୍ଡ ଧୀରଜ ଯାଦବ। ସେ କହିଛନ୍ତି ଯେ, ଏହି ଘଟଣା ପରେ ସେ ଚିତ୍କାର ଶୁଣି ଦୌଡ଼ି ଯାଇଥିଲେ ଏବଂ ଏହି ମାମଲାର ମୁଖ୍ୟ ଅଭିଯୁକ୍ତ ତଥା କେତନଙ୍କୁ ବିବାହ କରିବାକୁ ଥିବା ସିୟା ଗୋୟଲଙ୍କ ସହ ସିଧାସଳଖ କଥା ହୋଇଥିଲେ। ଗତ ୧୮ ତାରିଖରେ ଏହି ଐତିହାସିକ ସ୍ଥାନରୁ କେତନ ତଳକୁ ଖସିପଡ଼ିଥିଲେ। ଅବିଳମ୍ବେ ସେ ପୋଲିସକୁ ଏ ବିଷୟରେ ସୂଚନା ଦେଇଥିଲେ।
ଗାର୍ଡ କହିଛନ୍ତି, ଚିତ୍କାର ଶୁଣି ସେ ସିୟାଙ୍କ ପାଖକୁ ଯାଇଥିଲେ ଓ ତାଙ୍କୁ ପଚାରିଥିଲେ କ’ଣ ହେଲା। ତତ୍କ୍ଷଣାତ୍ ସିୟା କହିଥିଲେ ‘ଏଠାରୁ କେହି ଜଣେ ତଳକୁ ଖସିପଡ଼ିଛନ୍ତି’। ଏହା ପରେ ସେ ତୁରନ୍ତ ପୋଲିସକୁ ଜଣାଇଥିଲେ ବୋଲି ଧୀରଜ ଗଣମାଧ୍ୟମକୁ କହିଛନ୍ତି। ସେ ଆହୁରି ମଧ୍ୟ କହିଛନ୍ତି, ସିୟା ‘ବଞ୍ଚାଅ, ବଞ୍ଚାଅ’ ବୋଲି ଚିତ୍କାର କରୁଥିଲେ। ସେ କହିଛନ୍ତି ଯେ, ସେ ଅଧିକ ପ୍ରଶ୍ନ ପଚାରି ସମୟ ନଷ୍ଟ ନ କରି କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବା ଉପରେ ଧ୍ୟାନ ଦେଇଥିଲେ। ହତ୍ୟା ଏବଂ ଆପରାଧିକ ଷଡ଼ଯନ୍ତ୍ର ଅଭିଯୋଗରେ ପୋଲିସ ସିୟା(୨୦) ଏବଂ ତାଙ୍କ ପ୍ରେମିକ ଚେତନ ଚୌଧୁରୀ (୨୨)ଙ୍କୁ ଗିରଫ କରିଛି। ପୋଲିସ ଅଭିଯୋଗ ଅନୁଯାୟୀ, ଏହି ଦୁଇଜଣ କେତନଙ୍କୁ ଦୁର୍ଗରୁ ଠେଲି ହତ୍ୟା କରିଛନ୍ତି। ହେଲେ କେତନ ଟ୍ରେକିଂ ସମୟରେ ତଳକୁ ଖସିପଡ଼ିଥିବା ସେମାନେ ଦର୍ଶାଇଥିଲେ।
ପୋଲିସ ସୂଚନା ଅନୁଯାୟୀ, ସିୟା ଏବଂ ଚେତନ ପ୍ରାୟ ୬ ମାସ ହେବ ପରସ୍ପର ସହ ଯୋଗାଯୋଗରେ ଥିଲେ। ସେମାନେ ୨,୦୦୪ ଥର ଫୋନରେ କଥା ହୋଇଥିଲେ। ଘଟଣା ଦିନ ସିୟା ଏବଂ ଚେତନ ପୁଣେର ଏକ କାଫେରେ ଭେଟି କେତନଙ୍କୁ କେଉଁ ସ୍ଥାନରୁ ତଳକୁ ଠେଲିଲେ ଠିକ୍ ହେବ ସେ ନେଇ ଆଲୋଚନା କରିଥିଲେ। ଗତ ଫେବୃଆରୀରେ କେତନ ଓ ସିୟାଙ୍କର ନିର୍ବନ୍ଧ ହୋଇଥିଲା। ପୋଲିସ କହିଛି ଯେ, ସିୟା ବାରମ୍ବାର ଲୋହଗଡ଼ ଦୁର୍ଗ ବୁଲିଯିବା ପାଇଁ କହୁଥିଲେ। ମେ ୩୧ରେ ଉଭୟେ ଦୁର୍ଗ ପରିଦର୍ଶନ କରିଥିଲେ। ଜୁନ ୪ରେ ସିୟା ପୁଣି ଥରେ ସେଠାକୁ ଯିବାକୁ ଜିଦ୍ କରିଥିଲେ, କିନ୍ତୁ କେତନଙ୍କ ମା’ ଅନୁମତି ଦେଇ ନ ଥିଲେ। ଜୁନ ୧୪ରେ ଅନ୍ୟ ଏକ ପରିଦର୍ଶନ ସମୟରେ, ସିୟା ତାଙ୍କୁ ଏକ ପାହାଡ଼ ଉପରୁ ଠେଲିଦେବାକୁ ଚେଷ୍ଟା କରିଥିଲେ। ହେଲେ କେତନ ଅଗ୍ରୱାଲ ଏକ ବୁଦାକୁ ଧରି ବଞ୍ଚତ୍ୟାଇଥିଲେ। ଯେତେବେଳେ ସେ ତାଙ୍କର ଏହି କାର୍ଯ୍ୟ ବିଷୟରେ ପଚାରିଲେ, ସେ ସେଠାରେ ସାପ ଥିବା କଥା କହିଥିଲେ ଏବଂ ସେ ତାଙ୍କୁ ରକ୍ଷା କରିଛନ୍ତି ବୋଲି ଦର୍ଶାଇଥିଲେ।
