ନବରଙ୍ଗପୁର,୩।୬(ବି.ପ୍ର.): ଭାରତମାଳା ସଡ଼କ ପାଇଁ ସିଉନି କ୍ବାରିରୁ ଠିକାସଂସ୍ଥା ପଥର ଖନନ କରୁଛି । ସରକାରୀ ଖଣି ନିୟମ ଉଲ୍ଲଂଘନକରି ସଂସ୍ଥା ଅନୁମତିଠାରୁ ଅଧିକ ମାତ୍ରାରେ ପଥର ଫଟାଇ ଉଠାଇ ଚାଲିଛିି। ୩ ମିଟର ମଧ୍ୟରେ ଖନନ କରିବା ପରିବର୍ତ୍ତେ ୫୦ ଫୁଟ ଗଭୀରରୁ ଊର୍ଦ୍ଧ୍ୱ ଖେଳାଯାଇ ପଥର ଉଠାଇ ନିଆଯାଉଥିଲା। ଏ ନେଇ ‘ଧରିତ୍ରୀ’ରେ ୨୯ ତାରିଖ ‘ଖଣି ନିୟମକୁ ଉଲ୍ଲଂଘନ, ରାଜସ୍ବ ହରାଉଛନ୍ତି ସରକାର’ ଶୀର୍ଷକ ଖବର ପ୍ରକାଶ ପାଇଥିଲା। ଏହାପରେ ରାଜସ୍ବ ବିଭାଗ ତତ୍ପର ହୋଇଉଠିଛି। ନବରଙ୍ଗପୁର ତହସିଲଦାର ଜୟଦ୍ରଥ ଆଚାର୍ଯ୍ୟଙ୍କ ନିର୍ଦ୍ଦେଶ ପରେ କ୍ବାରି ତଥା ଖନନ ସ୍ଥାନରେ ବିକ୍ରମପୁର ରାଜସ୍ବ ନିରୀକ୍ଷକ ଭି. ଭି.ରାଜୁ ଓ ସୁପରଭାଇଜର ସୀମାଞ୍ଚଳ ଦାଶ ମାପଚୁପ କରି ନବରଙ୍ଗପୁର ତହସିଲଦାରଙ୍କୁ ରିପୋର୍ଟ ପ୍ରଦାନ କରିଛନ୍ତି। ପ୍ରାୟ ୧ ଲକ୍ଷ ସିଏମ୍ରୁ ଊର୍ଦ୍ଧ୍ୱ ପଥର ଠିକାସଂସ୍ଥା ଖନନକରି ନେଇଥିବା ପ୍ରାଥମିକ ଆକଳନ କରିଛନ୍ତି।
ନବରଙ୍ଗପୁର ତହସିଲ ଅଧୀନ ବିକ୍ରମପୁର ରାଜସ୍ବ ସର୍କଲର ଖାତା ନମ୍ବର ୫୯୪, ପ୍ଲଟ୍ ନମ୍ବର ୧୯୪୪, ପଥର ବଣ କିସମ ଥିବା ସିଉନି କ୍ବାରିରୁ ପଥର ନେବାକୁ ଅର୍କନ୍ସ ସଂସ୍ଥା ୩୦ ହଜାର ୧୮୪ ସିଏମ୍ ପଥର ଉଠାଇବ ବୋଲି ଆବେଦନ କରିଥିଲା। ଭାରତମାଳା ସଡ଼କ କାର୍ଯ୍ୟ ସମ୍ପୂର୍ଣ୍ଣ ହେଲେ କ୍ବାରିର ଆବଶ୍ୟକତା ପଡିବ ନାହିଁ। ଏ ଦୃଷ୍ଟିରୁ ଖଣି ନିୟମ ପ୍ରକାରେ ହିଁ ପ୍ରତି ୩ ମାସରେ ଥରେ କ୍ବାରି ପାଇଁ ଅନୁମତି ମିଳିଲା । ସଂସ୍ଥା ୨୦୨୨ ଜୁଲାଇ ୧୨ରେ ୧ ହଜାର ସିଏମ୍, ଡିସେମ୍ବର ୧୬ରେ ୧ ହଜାର ସିଏମ୍ ଓ ଡିସେମ୍ବର ୨୯ରେ ଆଉ ୧ ହଜାର ପଥର ଉଠାଇବାକୁ ଆବେଦନ କଲେ। ଇତିମଧ୍ୟରେ ଉପଜିଲାପାଳଙ୍କ ମୌଖିକ ନିର୍ଦ୍ଦେଶ ପରେ କ୍ବାରି ଉପରେ ତତ୍କାଳୀନ ତହସିଲଦାର ରବୀନ୍ଦ୍ର ରାଉତଙ୍କ ନିର୍ଦ୍ଦେଶରେ ରାଜସ୍ବ ନିରୀକ୍ଷକ ଓ ରେଭେନ୍ୟୁ ସୁପରଭାଇଜର ତଦନ୍ତକରି ତହସିଲଦାରଙ୍କୁ ୩୨ ହଜାର ୪ ଶହ ସିଏମ୍ ପଥର ଉଠି ସାରିଲାଣି ବୋଲି ଏକ ରିପୋର୍ଟ ପ୍ରଦାନ କଲେ। ଅର୍କନ୍ସ ସଂସ୍ଥାକୁ ତହସିଲ ପକ୍ଷରୁ କାରଣ ଦର୍ଶାଅ ନୋଟିସ ପରେ ୧ ଲକ୍ଷ ପେନାଲ୍ଟି ନିର୍ଦ୍ଦେଶ ଦିଆଯାଇଛି। ୨୦୨୩ ମାର୍ଚ୍ଚ ୬ରେ ସଂସ୍ଥା ୪୬ ଲକ୍ଷ ଟଙ୍କା ଜମାକଲେ। ୫ଟି ପର୍ଯ୍ୟାୟରେ ଅର୍କନ୍ସ ଠିକା ସଂସ୍ଥା ୧୮ ହଜାର ସିଏମ୍ ପଥର କ୍ବାରିରୁ ପଥର ଉଠାଇବା ପାଇଁ ନବରଙ୍ଗପୁର ତହସିଲରୁ ଅନୁମତି ନେଇଛି। ଚଳିତ ମାସରେ ଆଉ ୫ ହଜାର ସିଏମ୍ ପଥର ଉଠାଇବାକୁ ଅନୁମତି ମାଗିଛି। ତେବେ ଠିକା ସଂସ୍ଥା ରାଜସ୍ବ ବିଭାଗକୁ ଠକିବାରେ ଲାଗିଛି। ଖନନ ହେଉଥିବା ସ୍ଥାନଟି ଏବେ ସୁଇସାଇଡ୍ ପଏଣ୍ଟ ସଦୃଶ ହୋଇଛି। କ୍ବାରି ନିୟମ ଅନୁଯାୟୀ ୩ ମିଟର ଖନନ ହେଲେ ପରବର୍ତ୍ତୀ ସମୟରେ ସେଥିରେ ମାଟି ସମତୁଲକରି ତାହା ଉପରେ ଚାରାରୋପଣ କରିବା ନିୟମ ମଧ୍ୟ ରହିଛି। ସିଉନି ପଥର କ୍ବାରି କ୍ଷେତ୍ରରେ ସବୁ କିଛି ଓଲଟା ଦେଖାଯାଉଛି। ପ୍ରଶାସନକୁ ଅନ୍ଧାରରେ ରଖି ଠିକା ସଂସ୍ଥା ଆବଶ୍ୟକଠାରୁ ବହୁଗୁଣରେ ପଥର ଉଠାଇ ରାଜସ୍ବ ଠକି ଚାଲିଥିବା ଅଭିଯୋଗ ହେଉଛି।
