ନୂଆଦିଲ୍ଲୀ,୬।୯: ହରିୟାଣା ବିଧାନସଭା ନିର୍ବାଚନ ଆଗକୁ ଥିବାବେଳେ ଭାଜପାକୁ ଲାଗିଛି ବଡ଼ ଝଟ୍କା। ଦଳ ନିର୍ବାଚନ ପାଇଁ ଅଣ୍ଟା ଭିଡିଥିବାବେଳେ ଦେଶର ଚତୁର୍ଥ ଧନୀ ମହିଳା ସାବିତ୍ରୀ ଜିନ୍ଦଲ ଭାଜପାର ହାତ ଛାଡିଛନ୍ତି। ଦଳ ବିରୋଧରେ ବିଦ୍ରୋହ କରି ସେ ସ୍ବାଧୀନ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ବୋଲି ଘୋଷଣା କରିଛନ୍ତି।
ହରିୟାଣା ବିଧାନସଭା ନିର୍ବାଚନ ପାଇଁ ବୁଧବାର ଭାଜପା ୬୭ଜଣ ପ୍ରାର୍ଥୀଙ୍କ ତାଲିକା ପ୍ରକାଶ କରିଛି। କିନ୍ତୁ ଦଳର ତାଲିକା ପ୍ରକାଶ ପାଇବା ମାତ୍ରେ ଭାଜପାରେ କମ୍ପନ ସୃଷ୍ଟି ହୋଇଛି। ଟିକେଟ ନ ପାଇବା ପରେ ଅନେକ ନେତା ରାଗି ଯାଇଥିଲେ। ଏହି କାରଣରୁ ଅନେକ ରାଗିଯାଇ ସୋସିଆଲ ମିଡିଆରେ ଦଳରୁ ଇସ୍ତଫା ପତ୍ର ଦାଖଲ କରିଥିଲେ। ହେଲେ ଏହାପରେ ଦେଶର ଚତୁର୍ଥ ଧନୀ ମହିଳା ତଥା ପୂର୍ବତନ ମନ୍ତ୍ରୀ ସାବିତ୍ରୀ ଜିନ୍ଦଲ ମଧ୍ୟ ଭାଜପା ବିରୋଧରେ ବିଦ୍ରୋହ ଆରମ୍ଭ କରିଛନ୍ତି। ଭାଜପାରୁ ଟିକେଟ ନ ପାଇବା ପରେ ସେ ହିସାରର ଜଣେ ସ୍ବାଧୀନ ପ୍ରାର୍ଥୀ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଘୋଷଣା କରିଛନ୍ତି।
ସ୍ବାଧୀନ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଘୋଷଣା କରିବା ପରେ ସାବିତ୍ରୀ ଜିନ୍ଦଲ କହିଛନ୍ତି, ମୁଁ ଭାଜପାର ସଦସ୍ୟ ନୁହେଁ। ହିସାରର ଲୋକମାନେ ଯାହା କହିବେ ମୁଁ ତାହା କରିବି। ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ବୋଲି ସ୍ପଷ୍ଟ ସୂଚନା ଦେଇଛନ୍ତି ଏବଂ କହିଛନ୍ତି, ମୁଁ ହିସାର ସେବା କରିବା ପାଇଁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବି। ସେ କହିଛନ୍ତି, ମୁଁ କେବଳ ଲୋକ ସଭା ନିର୍ବାଚନରେ ମୋ ପୁଅ ପାଇଁ ପ୍ରଚାର କରିବାକୁ ଯାଇଥିଲି, ମୁଁ କେବେ ବି ଭାଜପାରେ ଯୋଗ ଦେଇ ନାହିଁ।
ସାବିତ୍ରୀ ଜିନ୍ଦଲ ଜଣେ ଶିଳ୍ପପତି, ଯିଏ ୨୦୦୫ରେ ତାଙ୍କର ରାଜନୈତିକ ଯାତ୍ରା ଆରମ୍ଭ କରିଥିଲେ। ସେ ହିସର ଆସନରୁ ଜିତି ବିଧାନସଭାରେ ପହଞ୍ଚିଥିଲେ। ଯାହା ପରେ ୨୦୦୯ରେ ସେ ପୁଣି ଥରେ ଭାଗ୍ୟ ପରୀକ୍ଷା କରି କ୍ରମାଗତ ଦ୍ୱିତୀୟ ଥର ପାଇଁ ଜିତିଥିଲେ। ୨୦୧୩ରେ ତାଙ୍କୁ ହରିୟାଣା ସରକାରରେ କ୍ୟାବିନେଟ ମନ୍ତ୍ରୀ ଦାୟିତ୍ୱ ମିଳିଥିଲା।
