ଦାରିଙ୍ଗବାଡ଼ି,୧୩ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ୨୫ଟି ପଞ୍ଚାୟତକୁ ନେଇ ଗଠିତ। ୨୦୧୧ ଜନଗଣନା ରିପୋର୍ଟ ଅନୁଯାୟୀ, ୧ ଲକ୍ଷ ୧୦ ହଜାର ଜନସଂଖ୍ୟା ରହିଛନ୍ତି। ତେବେ ଜନସଂଖ୍ୟା ତୁଳନାରେ ଅଞ୍ଚଳରେ ଲୋକଙ୍କୁ ଆବଶ୍ୟକ ମୌଳିକ ସୁବିଧା ମିଳୁ ନ ଥିବା ନେଇ ବିଭିନ୍ନ ପଞ୍ଚାୟତର ଲୋକପ୍ରତିନିଧିମାନେ ଅଭିଯୋଗ କରିଛନ୍ତି।
ସୋମବାର ଜିଲାପାଳଙ୍କ ଦାରିଙ୍ଗବାଡ଼ିଠାରେ ଅଭିଯୋଗ ଶୁଣାଣିରେ ଉକ୍ତ ବ୍ଲକର ପ୍ରାୟ ୯୦ ପ୍ରତିଶତ ସରପଞ୍ଚ, ସମିତିସଭ୍ୟ, ଓ୍ବାର୍ଡ ସଭ୍ୟ ପ୍ରମୁଖ ଅଭିଯୋଗ କରିବାକୁ ଆସିଥିବାରୁ ଏହା ସ୍ପଷ୍ଟ ଜଣାପଡୁଛି। କେଉଁଠି ନା କେଉଁଠି ଲୋକଙ୍କ ନିକଟରେ ସ୍ବାସ୍ଥ୍ୟସେବା ସମେତ ମୋବାଇଲ ନେଟ୍ଓ୍ବର୍କ, ଗମନାଗମନ, ପିଇବା ପାଣି, ଡାକ୍ତର ପଦବୀ ଖାଲି, ଜମି ବିବାଦ ଭଳି ବହୁ ସମସ୍ୟା ନେଇ ଲୋକ ପ୍ରତିନିଧିମାନେ ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ବୁଡ଼ାଗୁଡା ସମେତ ତିଲୋରୀ, ପ୍ଳିହେରୀ, ଦାରିଙ୍ଗବାଡ଼ି ସିମନବାଡ଼ି, କାଟିଙ୍ଗିଆ, ଗଦାପୁର, ଝିଞ୍ଜିରୀଗଡ଼ା, ହାତୀମୁଣ୍ଡା, ତାଜୁଙ୍ଗିଆ, ସରାମୁଳି ଆଦି ଦୁର୍ଗମ ପଞ୍ଚାୟତରୁ ଅଧିକାଂଶ ଉପରୋକ୍ତ ସମସ୍ୟା ନେଇ ଅଭିଯୋଗ ହୋଇଛି। ଏହି ସବୁର ସରଳ ସମାଧାନ କରିବାରେ ନୂତନ ଜିଲାପାଳ ବେଦଭୂଷଣ ବଡ଼ ପଦକ୍ଷେପ ନେବେ ବୋଲି ସମସ୍ତଙ୍କ ଆଶା ରହିଛି।