ନୂଆଦିଲ୍ଲୀ,୪ା୨: ୨୦୨୬ ଟି-୨୦ ବିଶ୍ୱକପ୍ ପୂର୍ବରୁ ଅନୁଷ୍ଠିତ ଅଭ୍ୟାସ ମ୍ୟାଚ୍ରେ ଭାରତୀୟ ଦଳର ରଣନୀତି ଏକ ବଡ଼ ପରିବର୍ତ୍ତନର ସଙ୍କେତ ଦେଇଛି। ଦକ୍ଷିଣ ଆଫ୍ରିକା ବିପକ୍ଷ ଶେଷ ୱାର୍ମ-ଅପ୍ ମ୍ୟାଚ୍ରେ ଓପନିଂ ଯୋଡ଼ି ଏବଂ ୱିକେଟକିପର ଚୟନକୁ ନେଇ ଯେଉଁ ଚିତ୍ର ସାମ୍ନାକୁ ଆସିଛି। ସେଥିରୁ ମନେହେଉଛି ଯେ ସଞ୍ଜୁ ସାମସନଙ୍କୁ ପୁଣିଥରେ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ବେଞ୍ଚରେ ବସିବାକୁ ପଡ଼ିପାରେ।
ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ଇଶାନ କିଶନ ଓପନିଂ କରିବାକୁ ଆସି ମାତ୍ର ୨୦ ବଲ୍ରେ ୫୩ ରନ୍ର ଏକ ଧୂଆଁଧାର ଇନିଂସ ଖେଳିଛନ୍ତି। ଏଥିରେ ସେ ୭ଟି ଛକା ଓ ୨ଟି ଚୌକା ମାରି ନିଜର ଦାବିଦାରୀ ମଜବୁତ କରିଛନ୍ତି।
ଅଧିନାୟକ ସୂର୍ଯ୍ୟକୁମାର ଯାଦବ ଟସ୍ ସମୟରେ ହିଁ ସ୍ପଷ୍ଟ କରିଥିଲେ ଯେ, ଅଭିଷେକ ଶର୍ମାଙ୍କ ସହ ଇଶାନ କିଶନ ଓପନିଂ କରିବେ। ଏହା ସାମସନଙ୍କ ପାଇଁ ଏକ ବଡ଼ ଝଟକା ଭାବେ ଦେଖାଯାଉଛି।
ନିକଟରେ ନ୍ୟୁଜିଲାଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ସିରିଜ୍ରେ ସଞ୍ଜୁ ସାମସନ ମାତ୍ର ୪୦ ରନ୍ କରିବାରେ ସକ୍ଷମ ହୋଇଥିବାବେଳେ ଇଶାନ କିଶନ ୨୧୫ ରନ୍ ସଂଗ୍ରହ କରି ଶ୍ରେଷ୍ଠ ଫର୍ମରେ ଅଛନ୍ତି।
ୱାର୍ମ-ଅପ୍ ମ୍ୟାଚ୍ରେ ସଞ୍ଜୁଙ୍କୁ ବ୍ୟାଟିଂ ସୁଯୋଗ ନ ମିଳିବା ଏବଂ ଇଶାନଙ୍କୁ ପ୍ରାଧାନ୍ୟ ଦିଆଯିବା ପରେ, ସୂର୍ଯ୍ୟକୁମାର ଆଗାମୀ ବିଶ୍ୱକପ୍ ପାଇଁ ନିଜର ପ୍ଲାନିଂ ପ୍ରାୟତଃ ସ୍ପଷ୍ଟ କରିଦେଇଛନ୍ତି।
ସୂଚନାଯୋଗ୍ୟ ଯେ, ୨୦୨୪ ଟି-୨୦ ବିଶ୍ୱକପ୍ରେ ମଧ୍ୟ ସଞ୍ଜୁ ସାମସନଙ୍କୁ କୌଣସି ମ୍ୟାଚ୍ ଖେଳିବାକୁ ସୁଯୋଗ ମିଳିନଥିଲା। ବର୍ତ୍ତମାନର ସ୍ଥିତି ଦେଖିଲେ ଲାଗୁଛି ଯେ ୨୦୨୬ରେ ମଧ୍ୟ ତାଙ୍କ ଭାଗ୍ୟରେ ସମାନ ପରିସ୍ଥିତି ରହିଛି।
