ଦାରିଙ୍ଗବାଡ଼ି,୨୫ା୧୧(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ହିଲଭିୟୁ ପାର୍କରୁ ଆରମ୍ଭ କରି ମିଡିୟୁବାନ୍ଦା ଜଳପ୍ରପାତ ସମେତ କିସୁବାଡ଼ି ଜଳପ୍ରପାତ, ଲଭର୍ସ ପଏଣ୍ଟ ଆଦି ଅଞ୍ଚଳର ଲୋକଙ୍କ ଦ୍ୱାରା ଏକାଧିକ ଜଳପ୍ରପାତ ସମେତ ନୂଆ ନୂଆ ପର୍ଯ୍ୟଟନ କ୍ଷେତ୍ରଗୁଡିକର ଆବିଷ୍କାର ହେଉଛି।
ଏହି କ୍ରମରେ ଉକ୍ତ ବ୍ଲକ ସିମନବାଡ଼ି ପଞ୍ଚାୟତ ଲାରିବାଡ଼ି ଗ୍ରାମ ନିକଟ ସାଞ୍ଜାପାଟା ଭିୟୁ ପଏଣ୍ଟ ଦେଖିବାକୁ ପର୍ଯ୍ୟଟକଙ୍କ ଭିଡ଼ ଜମିଛି। ସେଠାକାର ମନୋରମ ଦୃଶ୍ୟ ପର୍ଯ୍ୟଟକଙ୍କୁ ବହୁ ଆକୃଷ୍ଟ କରୁଥିବା ବେଳେ ସ୍ବର୍ଗ ଯେମିତି ଲୋକଙ୍କ ହାତକୁ ସ୍ବର୍ଶ କଲାଭଳି ମନେ ହେଉଛି। ଏବେ ପର୍ଯ୍ୟଟକଙ୍କ ନୂଆ ଠିକଣା ପାଲଟିଛି ଲାରିବାଡ଼ିର ସାଞ୍ଜାପାଟା ଭିୟୁ ପଏଣ୍ଟ। ତେବେ ଉକ୍ତ ପର୍ଯ୍ୟଟନକ୍ଷେତ୍ରରେ ପହଞ୍ଚିବା ପାଇଁ ସିମନବାଡ଼ିଠାରୁ ରାଇକିଆ ଯିବା ରାସ୍ତାରେ ସିମନବାଡ଼ିଠାରୁ ପାଞ୍ଚ କିମି ଯିବା ପରେ ଲାରିବାଡ଼ି ଗ୍ରାମକୁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପ୍ରଧାନମନ୍ତ୍ରୀ ସଡ଼କ ଯୋଜନାରେ ପକ୍କା ରାସ୍ତା ରହିଛି। ଲାରିବାଡ଼ି ପହଞ୍ଚିବା ପରେ ପ୍ରାୟ ଦେଢ଼ କିମି ଜଙ୍ଗଲ ରାସ୍ତାରେ ଯିବା ପରେ ଏହି ଭିୟୁ ଦେଖିବାକୁ ମିଳିବ। ବିଶେଷ କରି ଭୋର୍ ସମୟରୁ ସକାଳ ୯ଟା ମଧ୍ୟରେ କୁହୁଡ଼ି ଆଚ୍ଛାଦିତ ଦୃଶ୍ୟ ମେଘର ଭ୍ରମ ସୃଷ୍ଟି କରୁଛି।