ଭୋପାଳ, ୧୮।୭: ମଧ୍ୟପ୍ରଦେଶରେ ଆଇନଶୃଙ୍ଖଳା ସ୍ଥିତି ଧୀରେଧୀରେ ବିପନ୍ନ ହେବାରେ ଲାଗିଛି। ଅପରାଧୀଙ୍କ ମନରେ ପୋଲିସ ପ୍ରତି ଭୟ ନ ଥିବା ଦେଖିବାକୁ ମିଳୁଛି। ଏବେ ଏସମ୍ପର୍କିତ ଏକ ଭିଡ଼ିଓ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ଭିଡ଼ିଓରେ ଜଣେ ବାଲି ମାଫିଆ ତାଙ୍କ ଟ୍ରାକ୍ଟରକୁ ଅଟକାଉଥିବା ପୋଲିସ ବାବୁଙ୍କୁ ଧକ୍କାଦେଇ ଗାଳି ଦେବା ସହିତ ଜୋର୍ରେ ଚଟକଣା ମାରୁଛନ୍ତି। ପୋଲିସ ବାବୁ ଜଣକ ତଳେ ପଡ଼ିଯାଉଥିବାର ଦେଖିବାକୁ ମିଳୁଛି। ପରେ ସେ ନିଜର ଟ୍ରାକ୍ଟରକୁ ନେଇ ଯାଉଥିବାର ଭିଡ଼ିଓରେ ଦେଖିବାକୁ ମିଳୁଛି। ଘଟଣା ରାୟପୁରର ଗଢ଼ି ଗାଁର ବୋଲି କୁହାଯାଉଛି। ଉପସ୍ଥିତ ଅନ୍ୟ ପୋଲିସମାନେ କେବଳ ନୀରବ ଦ୍ରଷ୍ଟା ପାଲଟି ଥିବା ଭିଡ଼ିଓରେ ଦେଖିବାକୁ ମିଳୁଛି। ଭିଡ଼ିଓ ଭାଇରାଲ ହେବା ପରେ ପୋଲିସ ପକ୍ଷରୁ ଅଭିଯୁକ୍ତଙ୍କ ବିରୋଧରେ ମାମଲା ଦାଏର କରି ସେମାନଙ୍କୁ ଗିରଫ କରିବା ଲାଗି ଯୋଜନା ପ୍ରସ୍ତୁତ କରିଥିବା ସ୍ଥାନୀୟ ଏସ୍ପି ସମ୍ପତ ଉପାଧ୍ୟାୟ ସୂଚନା ଦେଇଛନ୍ତିି। ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
