ସମ୍ୱଲପୁର,୨୬ା୩(ପ୍ରମୋଦ ବହିଦାର): ଶୁକ୍ରବାର ଶ୍ରୀରାମ ନବମୀ ଉପଲକ୍ଷେ ପାଳିତ ହେବାକୁ ଥିବା ଶ୍ରୀରାମ ଜନ୍ମୋତ୍ସବ ଓ ଶୋଭାଯାତ୍ରା ପାଇଁ ହାଇଆଲର୍ଟରେ ରହିଛି ସମଗ୍ର ସମ୍ୱଲପୁର ସହର। ସମଗ୍ର ସହର ପୋଲିସ ଛାଉଣୀରେ ପରିଣତ ହୋଇଛି। ବିଭିନ୍ନ ସମ୍ୱେଦନଶୀଳ ସ୍ଥାନମାନଙ୍କରେ ପୋଲିସ ଓ ମୁତୟନ କରାଯାଇଛି। ଏପରିକି ବିଭିନ୍ନ ଦୋକାନ ଓ ସନ୍ଧିଗ୍ଧ ସ୍ଥାନରେ ସନ୍ଧାନୀ କୁକୁର ସହାୟତାରେ ଯାଞ୍ଚ କରାଯାଇଛି। ଶୋଭାଯାତ୍ରାରେ ୧ହଜାରରୁ ଊର୍ଦ୍ଧ୍ୱ କଳାକାର ସାମିଲ ହେବେ। ଏଥିପାଇଁ ସମ୍ୱଲପୁର ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
ବିଭିନ୍ନ ସମ୍ୱେଦନଶୀଳ ଅଞ୍ଚଳରେ ପୋଲିସ ପକ୍ଷରୁ ଫ୍ଲାଗମାର୍ଚ୍ଚ କରାଯାଇଛି। ୩୦ ପ୍ଲାଟୁନ୍ ଯବାନଙ୍କ ଫ୍ଲାଗମାର୍ଚ୍ଚ ରିଜର୍ଭ ପୋଲିସ ଲାଇନରୁ ବାହାରି ମୁଦିପଡ଼ା, କୁଞ୍ଜଲପଡ଼ା, ବୈଦ୍ୟନାଥଛକ, ଗୋଲବଜାର, ଲକ୍ଷ୍ମୀଟକିଜ୍ ଛକ, ଭୁତାପଡ଼ା ଦେଇ ରାମ ମନ୍ଦିରରେ ପହଞ୍ଚି ଥିଲା।
ସେହିପରି ପୋଲିସ ପକ୍ଷରୁ ଶୋଭାଯାତ୍ରାର ସମସ୍ତ ମାର୍ଗକୁ ନିରୀକ୍ଷଣ କରାଯିବା ସହିତ ମାର୍ଗର ମ୍ୟାପ୍ ଜାରି କରାଯାଇଛି। ଏସ୍ପି ମୁକେଶ କୁମାର ଭାମୁ କହିଛନ୍ତି, ଉଭୟ ରାମ ନବମୀ ଓ ହନୁମାନ ଜୟନ୍ତୀରେ ସୁରକ୍ଷା ଦୃଷ୍ଟିରୁ ସହରରେ ପ୍ରାୟ ୩୦ ପ୍ଲାଟୁନ ପୋଲିସ ଫୋର୍ସଙ୍କୁ ମୁତୟନ କରାଯାଇଛି। ସମଗ୍ର ସହରକୁ ସିସିି କ୍ୟାମେରା ଏବଂ ଡ୍ରୋନ ସହାୟତାରେ ତୀକ୍ଷ୍ଣ ନଜର ରଖାଯାଇଛି। କୌଣସି ଅପ୍ରୀତିକର ପରିସ୍ଥିତିର ମୁକାବିଲା ପାଇଁ ପୋଲିସ ସମ୍ପୂର୍ଣ୍ଣ ଭାବେ ପ୍ରସ୍ତୁତ ରହିଛି।
