ମୁମ୍ବାଇ, ୧୮।୧୦:ଅଭିନେତା ସଲମାନ ଖାନ୍ଙ୍କ ପୂର୍ବତନ ପ୍ରେମିକା ତଥା ଅଭିନେତ୍ରୀ ଓ ଆମେରିକୀୟ ମହିଳା ଅଧିକାର କର୍ମୀ ସୋମି ଅଲ୍ଲୀ ଗୁରୁବାର ସୋସିଆଲ ମିଡିଆ ପ୍ଲାଟ୍ଫର୍ମ ଇନ୍ଷ୍ଟାଗ୍ରାମରେ ଏକ ପୋଷ୍ଟ ମାଧ୍ୟମରେ ଗ୍ୟାଙ୍ଗ୍ଷ୍ଟର ଲରେନ୍ସ ବିଷ୍ଣୋଇଙ୍କୁ ଭିଡିଓ କଲ୍ ମାଧ୍ୟମରେ ଆଲୋଚନା ପାଇଁ ନିମନ୍ତ୍ରଣ ଦେଇଛନ୍ତି। ଏହି ପୋଷ୍ଟରେ ସୋମି ଗୁଜରାଟର ସାବରମତି ଜେଲରେ ବନ୍ଦୀ ଥିବା ଲରେନ୍ସଙ୍କର ଏକ ଫଟୋକୁ ଶେୟାର କରି ଲେଖିଛନ୍ତି, ”ଲରେନ୍ସ ଭାଇ, ଶୁଣିବାକୁ ପାଇଛି ଜେଲରୁ ଆପଣ ଜୁମ୍ କଲ୍ କରିପାରୁଛନ୍ତି। ଆପଣଙ୍କ ସହ କିଛି ଆଲୋଚନା କରିବାର ଅଛି। ଦୟାକରି ଏହା କିପରି ସମ୍ଭବ ହେବ ସେନେଇ ଜଣାନ୍ତୁ। ରାଜସ୍ଥାନ ମୋର ସବୁଠାରୁ ପସନ୍ଦଯୋଗ୍ୟ ସ୍ଥାନ। ସେଠାରେ ଥିବା ଆପଣଙ୍କ ମନ୍ଦିରକୁ ଯାଇ ପୂଜା କରିବାକୁ ଚାହୁଁଛି। ଏ ସମ୍ବନ୍ଧରେ ଆପଣଙ୍କ ସହ ଜୁମ୍ କଲ୍ରେ କିଛି ଆଲୋଚନା କରିବାକୁ ଚାହୁଁଛି। ବିଶ୍ୱାସ କରନ୍ତୁ ଏହି ଆଲୋଚନା ଆପଣଙ୍କ ପାଇଁ ଲାଭଦାୟକ ହେବ। ଦୟାକରି ଆପଣଙ୍କ ମୋବାଇଲ ନମ୍ବର ଦିଅନ୍ତୁ, ଧନ୍ୟବାଦ।“ ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ବରିଷ୍ଠ ରାଷ୍ଟ୍ରବାଦୀ କଂଗ୍ରେସ ପାର୍ଟି(ଏନ୍ସିପି) ନେତା ଓ ସଲମାନଙ୍କ ଘନିଷ୍ଠ ସହଯୋଗୀ ବାବା ସିଦ୍ଦିକୀଙ୍କ ହତ୍ୟାକାଣ୍ଡ ପାଇଁ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ନିଜକୁ ଦାୟୀ କରିଥିବାବେଳେ ସୋମିଙ୍କ ଏହି ପୋଷ୍ଟ ସାମ୍ନାକୁ ଆସିଛି। ସଲମାନଙ୍କ ସହ ଜଡ଼ିତ ଥିବା ସମସ୍ତ ବ୍ୟକ୍ତିଙ୍କର ବାବା ସିଦ୍ଦିକୀଙ୍କର ପରି ଅବସ୍ଥା ହେବ ବୋଲି ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ପକ୍ଷରୁ ଚେତାବନୀ ଦିଆଯାଇଛି। ଫଳରେ ସଲମାନଙ୍କ ସୁରକ୍ଷା ବ୍ୟବସ୍ଥାକୁ ମୁମ୍ବାଇ ପୋଲିସ ବୃଦ୍ଧି କରିଛି।
୯୦ ଦଶକରେ ସୋମି ଓ ସଲମାନଙ୍କ ପ୍ରେମ ସମ୍ପର୍କକୁ ନେଇ ବହୁ ମିଡିଆ ରିପୋର୍ଟ ପ୍ରକାଶ ପାଇଥିଲା। ସେ ଅନେକ ବଲିଉଡ୍ ଫିଲ୍ମରେ ମଧ୍ୟ କାର୍ଯ୍ୟ କରିଥିଲେ। ତେବେ ୧୯୯୯ରେ ଉଭୟଙ୍କ ମଧ୍ୟରେ ବ୍ରେକ୍ଅପ୍ ହୋଇଥିଲା। ସେବେଠାରୁ ସୋମି ମୁମ୍ବାଇ ଛାଡ଼ି ଆମେରିକାରେ ରହି ଆସୁଛନ୍ତି। ଯଦିଓ ସୋମି ଓ ସଲମାନଙ୍କ ସମ୍ପର୍କରେ ଫାଟ ସୃଷ୍ଟି ହୋଇଛି ତେବେ ମଧ୍ୟ ଅନେକବାର ସୋମି ବିଭିନ୍ନ ପ୍ରସଙ୍ଗରେ ସଲମାନଙ୍କୁ ସମର୍ଥନ କରିବା ସହ ତାଙ୍କୁ ସୁରକ୍ଷା ଯୋଗାଉଥିବାର ଦେଖିବାକୁ ମିଳିଛି। ଗତ ମେ’ରେ ସୋମି ଏକ ଜାତୀୟ ଗଣମାଧ୍ୟମକୁ ସାକ୍ଷାତ୍କାର ଦେଇ କହିଥିଲେ, କୃଷ୍ଣସାର ମୃଗ ଶିକାର କରିବା ମାମଲାକୁ ନେଇ ସଲମାନଙ୍କୁ ହତ୍ୟା ଧମକ ଦେବା ଓ ତାଙ୍କ ଗତିବିଧି ଉପରେ ନଜର ରଖିବା ଠିକ୍ ନୁହେଁ। ଏବେ ଉକ୍ତ ଘଟଣାକୁ ବହୁତ ବର୍ଷ ବିତିଗଲାଣି। ତେଣୁ ଘଟଣାକୁ ଭୁଲି ଯିବାକୁ ଓ ସଲମାନଙ୍କୁ କ୍ଷମା ଦେବାକୁ ସେ ବିଷ୍ଣୋଇ ସମାଜର ମୁଖ୍ୟଙ୍କୁ ଅନୁରୋଧ କରିଥିଲେ। ସଲମାନ ହୁଅନ୍ତୁ କିମ୍ବା କୌଣସି ସାଧାରଣ ବ୍ୟକ୍ତି କାହାରିକୁ ଜୀବନରୁ ମାରିଦେବା ପାଇଁ ଧମକ ଦେବା ଗ୍ରହଣୀୟ ନୁହେଁ। ଯଦି ସେମାନେ ନ୍ୟାୟ ଚାହୁଁଛନ୍ତି, ତେବେ କୋର୍ଟକୁ ଯାଆନ୍ତୁ ବୋଲି ସୋମି କହିଥିଲେ। ସଲମାନଙ୍କୁ କ୍ଷତି ପହଞ୍ଚାଇବା ଦ୍ୱାରା ମୃତ କୃଷ୍ଣସାର ମୃଗ ଫେରି ଆସି ପାରିବ ନାହିଁ। ଯାହା ହୋଇଯାଇଛି, ତାହା ବଦଳାଯାଇପାରିବ ନାହିଁ ବୋଲି ସେ କହିଥିଲେ। ପ୍ରକାଶ ଯେ, ରାଜସ୍ଥାନରେ ୧୯୯୮ ମସିହାରେ ‘ହମ୍ ସାଥ୍ ସାଥ୍ ହେ’ଫିଲ୍ମର ଶୁଟିଂ କରୁଥିବା ସମୟରେ ସଲମାନ ଓ କେତେଜଣ ସାଥୀ ତାରକା କୃଷ୍ଣସାର ମୃଗକୁ ଶିକାର କରିଥିଲେ। କୃଷ୍ଣସାର ପ୍ରଜାତିର ହରିଣ ପବିତ୍ର ହୋଇଥିବା ଦାବି କରି ଏହାର ପ୍ରତିଶୋଧ ନେବା ଉଦ୍ଦେଶ୍ୟରେ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ପକ୍ଷରୁ ୨୦୧୮ରେ ପ୍ରଥମ ଥର ପାଇଁ ସଲମାନଙ୍କୁ ଧମକ ଦିଆଯାଇଥିଲା। କୃଷ୍ଣସାର ମୃଗକୁ ଶିକାର କରିବାର ପରିଣାମ ଭୟଙ୍କର ହେବ ବୋଲି ଗ୍ୟାଙ୍ଗ୍ ପକ୍ଷରୁ କୁହାଯାଇଥିଲା। ଏହାପରଠାରୁ ଉକ୍ତ ଗ୍ୟାଙ୍ଗ୍ ପକ୍ଷରୁ ସଲମାନ ଓ ତାଙ୍କ ପରିବାରକୁ ବାରମ୍ବାର ଧମକ ଦିଆଯାଇଛି।
