ଭୁବନେଶ୍ୱର,୨୩।୮: କୁପୋଷଣ ଓ ଅପପୁଷ୍ଟି ଦ୍ୱାରା ଅନେକ ଭୟଙ୍କର ସ୍ବାସ୍ଥ୍ୟାବସ୍ଥା ସୃଷ୍ଟି ହୋଇଥାଏ। ବିଶେଷକରି ବନ୍ୟା ବିପନ୍ନଙ୍କ କ୍ଷେତ୍ରରେ ଏହା ଆହୁରି ସାଂଘାତିକ ରୂପ ନେଇଥାଏ। ତେଣୁ ବନ୍ୟା ପୀଡ଼ିତଙ୍କ ନିକଟରେ ପୁଷ୍ଟିକର ଓ ସନ୍ତୁଳିତ ଖାଦ୍ୟ ପହଞ୍ଚାଇବା ପାଇଁ ସାଇ ସବୁରୀ ହସ୍ପିଟାଲ ଆଣ୍ଡ ନର୍ସିଂ ହେଲ୍ଥ ସାଇନ୍ସ କଲେଜ ବାଳକାଟୀର ଛାତ୍ରୀଛାତ୍ରମାନେ ‘କୁପୋଷଣ ହଟାଅ ଅଭିଯାନ’ ଆରମ୍ଭ କରିଛନ୍ତି। ଏହି ଅଭିଯାନରେ କଲେଜର ଛାତ୍ରୀଛାତ୍ରମାନେ ବନ୍ୟାପୀଡ଼ିତ ପରିବାରଙ୍କୁ ସୁଷମ ଓ ଉଚ୍ଚମାନର ରନ୍ଧାଖାଦ୍ୟ, ଶୁଖିଲା ଖାଦ୍ୟ, ମେଡିସିନ ଓ କ୍ଷୀର ପ୍ୟାକେଟ ବାଣ୍ଟିଛନ୍ତି। ସୂଚନା ଅନୁଯାୟୀ, ସ୍ଥାନୀୟ ରଥିଜମାସ୍ଥିତ କୁଆଖାଇ ନଦୀ ଗର୍ଭରୁ ୧୫ଟି ପରିବାରର ପ୍ରାୟ ୮୦ଜଣଙ୍କୁ ସରକାରୀ ଭାବେ ବିସ୍ଥାପିତ କରାଯାଇଛି। ହେଲେ ସେମାନେ ବର୍ତ୍ତମାନ ଅସ୍ଥାୟୀ ଭାବେ ପ୍ର୍ରତାପଶାସନ ସରକାରୀ ଉଚ୍ଚ ବିଦ୍ୟାଳୟ ପରିସରରେ ରହୁଛନ୍ତି। ନିକଟରେ ସାଇ ସବୁରୀ ଅନୁଷ୍ଠାନର ଛାତ୍ରୀଛାତ୍ରମାନେ ସେଠାରେ ପହଞ୍ଚତ୍ ଖାଦ୍ୟ ସାମଗ୍ରୀ ବାଣ୍ଟିଥିଲେ, କିନ୍ତୁ ସବୁଠୁ ଗୁରୁତ୍ୱପୂର୍ଣ୍ଣ ବିଷୟ ହେଲା ଯେ, ବାଲିଅନ୍ତା ବ୍ଲକ କାର୍ଯ୍ୟାଳୟଠାରୁ ହୀରାପୁର ଗ୍ରାମ ମାତ୍ର ୨ କିଲୋମିଟର ଦୂରରେ ଅବସ୍ଥିତ। କିନ୍ତୁ ଆଉ ୧୨ଟି ପରିବାରର ପ୍ରାୟ ୭୦ଜଣଙ୍କୁ ଏଯାଏ ପ୍ରଶାସନ ପକ୍ଷରୁ କୌଣସି ସହାୟତା ମିଳିନଥିବା ପୀଡିତ ଓ ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଉକ୍ତ ବନ୍ୟା ପୀଡ଼ିତ ଲୋକଙ୍କ ଉଦ୍ଦେଶ୍ୟରେ ସାଇ ସବୁରୀ କଲେଜର ଛାତ୍ରୀଛାତ୍ରମାନେ ରନ୍ଧାଖାଦ୍ୟ ବଣ୍ଟନ କରିଛନ୍ତି। ଉକ୍ତ ଅନୁଷ୍ଠାନର ଡାକ୍ତର ମଧ୍ୟ ସମସ୍ତଙ୍କ ସ୍ବାସ୍ଥ୍ୟ ପରୀକ୍ଷା କରି ଔଷଧ ଦେଇଥିଲେ। ସଙ୍କଟ ବେଳେ ଏଭଳି ଅଭିଯାନ ଲାଗି କଲେଜର ଛାତ୍ରଛାତ୍ରୀ ଚର୍ଚ୍ଚାରେ ରହିଛନ୍ତି।
