ଭୁବନେଶ୍ୱର,୬।୩: ଆର୍ସେଲର ମିତ୍ତଲ ନିପ୍ପନ୍ ଷ୍ଟିଲ୍ ଇଣ୍ଡିଆ (ଏଏମ୍ଏନ୍ଏସ୍ ଇଣ୍ଡିଆ) ପକ୍ଷରୁ ସୁନ୍ଦରଗଡ଼ ଜିଲାର କୋଇଡା ବ୍ଲକର ସାଗାସାହି ଗ୍ରାମକୁ ଏକ ସୋଲାର ମଡେଲ ଗ୍ରାମରେ ପରିଣତ କରାଯାଇଛି। ବିଶେଷକରି କମ୍ପାନୀର କର୍ପୋରେଟ ସାମାଜିକ ଦାୟିତ୍ୱବୋଧ (ସିଏସ୍ଆର୍) ଅଭିଯାନ ଜରିଆରେ ସମ୍ପୃକ୍ତ ଗ୍ରାମକୁ ପୋଷ୍ୟ ଭାବେ ଗ୍ରହଣ କରିବା ସହ ପ୍ରଥମ ସୋଲାର ମଡେଲ ଗ୍ରାମ ଭାବେ ଉକ୍ତ ପ୍ରକଳ୍ପର ଉଦ୍ଘାଟନ ମଧ୍ୟ କରାଯାଇଛି।
ଏହି ଅବସରରେ ବଣାଇ ଡିଭିଜନର ସବ୍କଲେକ୍ଟର ସୁରଞ୍ଜନ ସାହୁ ସମ୍ମାନିତ ଅତିଥି ଭାବେ ଯୋଗ ଦେଇ ଏହାର ଉଦଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ କୋଇଡା ବିଡିଓ ପଲ୍ଲବୀ ରାଜ, ତହସିଲଦାର ଡି.ଏସ.ଯୋଶୀ, ଜିଲା ପରିଷଦ ସଦସ୍ୟ ଅଶୋକ ନାୟକ, କାସିରା ସରପଞ୍ଚ ରାନୀ ଲୋହରଙ୍କ ସମେତ ଏଏମ୍ଏନ୍ଏସ୍ ଇଣ୍ଡିଆର ହେଡ୍ ଟେକ୍ନିକାଲ ସର୍ଭିସ ସତୀଶ ମହାନ୍ତି, ଏଏମଏନଏସ ଇଣ୍ଡିଆ ମାଇନ୍ସ ମ୍ୟାନେଜର ବାବୁ ଲିଙ୍ଗାମାଗୁଣ୍ଟା ଓ କମ୍ପାନୀର ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏ ସମ୍ପର୍କରେ ବଣାଇ ଡିଭିଜନ୍ ସବ୍କଲେକ୍ଟର ସୁରଞ୍ଜନ ସାହୁ କହିଛନ୍ତି, ଦାରିଦ୍ର୍ୟ ଦୂରୀକରଣ ତଥା ସ୍ବଚ୍ଛ ଶକ୍ତିର ପ୍ରୋତ୍ସାହନ ପାଇଁ ସ୍ଥାୟୀ ବିକାଶ ଲକ୍ଷ୍ୟ ପୂରଣ କରିବାରେ ଓଡିଶା ସରକାରଙ୍କ ଉଦ୍ୟମକୁ ଏଏମ୍ଏନଏସ୍ ଇଣ୍ଡିଆର ଯୋଗଦାନ ବାହୁମାତ୍ରାରେ ସାହାଯ୍ୟ କରିଛି। ବିଶେଷ କରି ସାଗାସାହିରେ ସୌର ଶକ୍ତି ଭିତ୍ତିକ ପଦକ୍ଷେପ ଏଏମ୍ଏନଏସ୍ ଇଣ୍ଡିଆର ମଡେଲ ଗ୍ରାମ ବିକାଶ ଯୋଜନାର ଏକ ଅଂଶ ହୋଇଥିବା ବେଳେ ଉପାନ୍ତ ଅଞ୍ଚଳରେ ଗୋଷ୍ଠୀ ଉନ୍ନତି ନିମନ୍ତେ ସ୍ବାସ୍ଥ୍ୟ, ଶିକ୍ଷା, ଜୀବିକା, ଦକ୍ଷତା ବିକାଶ, ଜଳ, ପରିମଳ, କ୍ରୀଡା ଏବଂ ସଂସ୍କୃତି କ୍ଷେତ୍ରରେ ନିଆଯାଇଥିବା ପଦକ୍ଷେପଗୁଡ଼ିକରେ ସୌର ଶକ୍ତିର ସୁବିଧା ଏକ ଅତିରିକ୍ତ ପଦକ୍ଷେପ ବୋଲି ସେ ମତପ୍ରକାଶ କରିଛନ୍ତି। ସେହିଭଳି ଏଏମ୍ଏନଏସ୍ ଇଣ୍ଡିଆର ସିଏସଆର ମୁଖ୍ୟ ଡ. ବିକାଶ ୟାଦଭେନ୍ଦୁ କହିଛନ୍ତି, ଆମେ ଜିଲା ପ୍ରଶାସନ ସହ ଆମର ସିଏସଆର ସହଭାଗିତା ଜାରି ରଖିବୁ। ବିଶେଷକରି ସ୍ଥାନୀୟ ଅଞ୍ଚଳର ଶିଶୁ, ମହିଳା, ଯୁବକ ଏବଂ କୃଷକମାନଙ୍କ ବିକାଶ ପାଇଁ ଅଧିକ ସୁଯୋଗ ଆଣିବୁ ବୋଲି ୟାଦଭେନ୍ଦୁ ମତବ୍ୟକ୍ତ କରିଛନ୍ତି।
