ନୂଆଦିଲ୍ଲୀ,୧୦।୮: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆମେରିକାର ଶୁଳ୍କ ନୀତି ଉପରେ ତୀବ୍ର ସମାଲୋଚନା କରି କହିଛନ୍ତି ଯେ ବିଶ୍ୱ ଶକ୍ତିମାନେ ଭାରତର ଦ୍ରୁତ ଅଭିବୃଦ୍ଧି ଦେଖି ଈର୍ଷାନ୍ୱିତ। ମଧ୍ୟପ୍ରଦେଶରେ ଏକ କାର୍ଯ୍ୟକ୍ରମରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସମସ୍ତଙ୍କ ବସ୍’ ବୋଲି କଟାକ୍ଷ କରି କହିଛନ୍ତି, “କେତେକ ଲୋକ ଭାରତର ଅଗ୍ରଗତି ଗ୍ରହଣ କରିପାରୁନାହାନ୍ତି। ସେମାନେ ଭାବୁଛନ୍ତି, ‘ଆମେ ସମସ୍ତଙ୍କ ବସ୍, ଭାରତ କେମିତି ଏତେ ଦ୍ରୁତ ଅଗ୍ରଗତି କରୁଛି?’” ସେ ଆହୁରି କହିଛନ୍ତି ଯେ ଭାରତୀୟ ଉତ୍ପାଦକୁ ବିଦେଶରେ ମହଙ୍ଗା କରିବା ପାଇଁ ଉଦ୍ୟମ ଚାଲିଛି, କିନ୍ତୁ କୌଣସି ବିଶ୍ୱ ଶକ୍ତି ଭାରତକୁ ମହାଶକ୍ତି ହେବାରୁ ଅଟକାଇ ପାରିବ ନାହିଁ।
ରାଜନାଥ ସିଂ ରାୟସେନ ଜିଲାର ଉମରିଆ ଗାଁରେ ବିଇଏମଏଲ୍ର ‘ବ୍ରହ୍ମା’ ରେଳ ହବ ନିର୍ମାଣର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏହି ୧୮୦୦ କୋଟି ଟଙ୍କାର ରେଳ କୋଚ୍ କାରଖାନା ଉଚ୍ଚଗତିର ରେଳଗାଡ଼ି ପାଇଁ କୋଚ୍ ଓ ଅନ୍ୟାନ୍ୟ ରେଳ ଉତ୍ପାଦ ତିଆରି କରିବ, ଯାହା ୫୦୦୦ ସିଧାସଳଖ ଚାକିରି ସୃଷ୍ଟି କରିବ। ସେ କହିଛନ୍ତି, “ମଧ୍ୟପ୍ରଦେଶରେ ପ୍ରତିରକ୍ଷା କ୍ଷେତ୍ର ପାଇଁ ସମସ୍ତ ସୁବିଧା ରହିଛି। ଏହା ଦେଶକୁ ନୂଆ ଉଚ୍ଚତାକୁ ନେବ।”
ସେ ଅପରେସନ ସିନ୍ଦୁରରେ ସ୍ୱଦେଶୀ ଉପକରଣର ସଫଳତା ଓ ‘ଆତ୍ମନିର୍ଭର ଭାରତ’ ଅଭିଯାନକୁ ଗୁରୁତ୍ୱ ଦେଇ କହିଛନ୍ତି, “ଯିଏ ଆମକୁ ଉତ୍ତ୍ୟକ୍ତ କରିବ, ତାକୁ ଛାଡ଼ିବୁ ନାହିଁ।” ସେ ମୋଦି ସରକାରଙ୍କ ‘ମେକ୍ ଇନ୍ ଇଣ୍ଡିଆ’ ଉଦ୍ୟମର ପ୍ରଶଂସା କରି କହିଛନ୍ତି, “୨୦୧୪ରେ ଭାରତୀୟ ପ୍ରତିରକ୍ଷା ରପ୍ତାନି ମାତ୍ର ୬୦୦ କୋଟି ଟଙ୍କା ଥିଲା। ଆଜି ଏହା ୨୪,୦୦୦ କୋଟି ଟଙ୍କା ଅତିକ୍ରମ କରିଛି।”
ସିଂ ଆହୁରି କହିଛନ୍ତି, “୨୦୧୪ରେ ଭାରତ ୧୧ତମ ବୃହତ୍ତମ ଅର୍ଥନୀତି ଥିଲା, ଆଜି ଆମେ ଶୀର୍ଷ ୪ରେ। ଆମର ଅଭିବୃଦ୍ଧି ହାର ୬.୩% ସହ ବିଶ୍ୱର ଅଗ୍ରଣୀ।” ସେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ମୋହନ ଯାଦବଙ୍କ ପ୍ରଶଂସା କରି କହିଛନ୍ତି, “ମଧ୍ୟପ୍ରଦେଶ ଏବେ ‘ମଡର୍ଣ୍ଣ ପ୍ରଦେଶ’। ୩୦ ଲକ୍ଷ କୋଟି ଟଙ୍କାର ନିବେଶ ପ୍ରତିଶ୍ରୁତି ଓ ୧୮,୦୦୦ ହେକ୍ଟର ଜମି ବ୍ୟାଙ୍କ ଏହାକୁ ପ୍ରମାଣ କରୁଛି।”
ସେ ପରିବେଶ ସଂରକ୍ଷଣ ସହ ବିକାଶର ସନ୍ତୁଳନ ଉପରେ ଜୋର ଦେଇ କହିଛନ୍ତି, “ଏହି ରେଳ କାରଖାନା ଆଧୁନିକ ବିକାଶର ପ୍ରତୀକ।”
