ମସ୍କୋ/କିଭ୍/ଲଣ୍ଡନ,୧୪ା୧୦: ଆମେରିକା ନେତୃତ୍ୱାଧୀନ ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ (ନାଟୋ) ସାମରିକ ମେଣ୍ଟରେ ୟୁକ୍ରେନ୍ ସାମିଲ ହେଲେ ଏହି ପୂର୍ବ ୟୁରୋପୀୟ ରାଷ୍ଟ୍ରରେ ଘମାଘୋଟ ଲଢ଼େଇ ହେବ। ଏହି ସଂଘର୍ଷରୁ ତୃତୀୟ ବିଶ୍ୱଯୁଦ୍ଧ ଆରମ୍ଭ ହେବ ବୋଲି ଗୁରୁବାର ରୁଷିଆ ସୁରକ୍ଷା ପରିଷଦ ପକ୍ଷରୁ ଚେତାବନୀ ଦିଆଯାଇଛି। ଏହାକୁ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ନିନ୍ଦା କରିଛନ୍ତି।
ପାଇଁ ନାଟୋର ପୂର୍ଣ୍ଣ ସଦସ୍ୟତା ଏତେ ପାଖରେ ନାହିଁ। କାରଣ ଏହି ସାମରିକ ମେଣ୍ଟରେ ସାମିଲ ହେବା ପାଇଁ ୩୦ ସଦସ୍ୟ ରାଷ୍ଟ୍ରର ସହମତି ଆବଶ୍ୟକ। ରୁଷିଆ ସିକ୍ୟୁରିଟି କାଉନସିଲ ଡେପୁଟି ସେକ୍ରେଟାରୀ ଆଲେକ୍ଜାଣ୍ଡର ଭେନେଡିକ୍ଟୋଭ୍ କହିଛନ୍ତି, ନାଟୋ ସଦସ୍ୟତା ମାଗିବା ସମ୍ପୃକ୍ତ ଅଞ୍ଚଳରେ ଉତ୍ତେଜନା ବୃଦ୍ଧିର କାରଣ ହେବ ବୋଲି କିଭ୍ ଜାଣିବା ସତ୍ତ୍ୱେ ଏପରି ପଦକ୍ଷେପ ନେଇଛି। ଏହାର ପରିଣାମ ପାଶ୍ଚାତ୍ୟ ମଧ୍ୟ ଜାଣିଛି। ଏହି ଆବେଦନ ଏକ ପ୍ରୋପାଗଣ୍ଡା (ମିଛ ଅଭିଯାନ)। ସେପଟେ ନାଟୋର ଜଣେ ଅଧିକାରୀ କହିଛନ୍ତି, ରୁଷିଆ ଆଣବିକ ଅସ୍ତ୍ର ପ୍ରୟୋଗ କଲେ ନାଟୋ ସମେତ ଏହାର ସହଯୋଗୀଙ୍କ ପକ୍ଷରୁ କଡ଼ା ଜବାବ ଦିଆଯିବ। ବ୍ରସେଲ୍ସରେ ଆୟୋଜିତ ପ୍ରତିରକ୍ଷା ମନ୍ତ୍ରୀଙ୍କ ରୁଦ୍ଧଦ୍ୱାର ବୈଠକରେ ଆମେରିକା ପ୍ରତିରକ୍ଷା ସଚିବ ଲଏଡ୍ ଅଷ୍ଟିନ୍ କହିଛନ୍ତି, ନାଟୋ ଭୂଖଣ୍ଡର ପ୍ରତି ଇଞ୍ଚ ଜାଗାକୁ ସୁରକ୍ଷା ଦେବୁ। ପ୍ରକାଶ ଯେ, ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠାରୁ ବେଆଇନ ଭାବେ ଦଖଲ କରିଥିବା ଡୋନେସ୍କ, ଲୁହାନ୍ସ୍କ, ଖେରସୋନ ଓ ଜାପୋରିଝିଆ ଅଞ୍ଚଳର ମିଶ୍ରଣ ରୁଷୀୟ ମହାସଂଘ ସହ ହୋଇସାରିଛି। ସେପ୍ଟେମ୍ବର ୩୦ରେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଅନ୍ତର୍ଜାତୀୟ ଆଇନକୁ ଅବଜ୍ଞା କରି ଏହି ୪ ଅଞ୍ଚଳ (ୟୁକ୍ରେନ୍ର ପ୍ରାୟ ୧୮%)କୁ ନିଜ ଦେଶ ସହ ମିଶାଇବା ପାଇଁ ସେଣ୍ଟଜର୍ଜ ହଲ୍ରେ ଏକ ଦସ୍ତାବିଜ୍ରେ ସ୍ବାକ୍ଷର କରିଥିଲେ। ଏହି ଅବସରରେ ସେ କହିଥିଲେ, ନୂଆ କରି ସାମିଲ ହୋଇଥିବା ୟୁକ୍ରେନୀୟ ଅଞ୍ଚଳ ସବୁଦିନ ପାଇଁ ରୁଷିଆର ହୋଇଗଲା। ଅର୍ଥାତ୍ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କିମ୍ବା ପରବର୍ତ୍ତୀ ରାଷ୍ଟ୍ରମୁଖ୍ୟ ଭବିଷ୍ୟତରେ ଏହାକୁ ପୁନଃ ଦଖଲ ଉଦ୍ୟମ କଲେ ବି ଫେରାଇନେଇ ପାରିବେ ନାହିଁ। ପୁଟିନ୍ଙ୍କ ଏହି ଘୋଷଣା ବେଳେ ଜେଲେନ୍ସ୍କି ଏକ ଭିଡିଓ ଜାରି କରିଥିଲେ। ନାଟୋ ସଦସ୍ୟତା ପାଇଁ ଅନୁରୋଧ ପତ୍ରରେ ସେ ସ୍ବାକ୍ଷର କରୁଥିବା ଏଥିରେ ଦେଖିବାକୁ ମିଳିଥିଲା। ଆନେକ୍ସେଶନ୍ ଘୋଷଣା କରିବାବେଳେ ପୁଟିନ୍ କହିଥିଲେ, ୟୁକ୍ରେନ୍ ଶାନ୍ତି ଆଲୋଚନା ଟେବୁଲକୁ ଆସୁ। ଏହାର ଜବାବରେ ଜେଲେନ୍ସ୍କି କହିଥିଲେ, ପୁଟିନ୍ଙ୍କ ସହ କଦାପି ଆଲୋଚନା ହୋଇ ପାରିବ ନାହିଁ। କଥାବାର୍ତ୍ତା ପାଇଁ ଆମେ ପ୍ରସ୍ତୁତ କିନ୍ତୁ ରୁଷିଆର ଅନ୍ୟ କୌଣସି ରାଷ୍ଟ୍ରପତିଙ୍କ ସହ।
