ନୂଆଦିଲ୍ଲୀ,୨୯।୧୨: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବାସଭବନକୁ ୟୁକ୍ରେନ ଡ୍ରୋନ୍ ମାଧ୍ୟମରେ ଆକ୍ରମଣ କରିଥିବା ରୁଷିଆ ଦାବି କରିଛି। ତେବେ ଏହି ଅଭିଯୋଗକୁ ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ବୋଲି କହି ପ୍ରତ୍ୟାଖ୍ୟାନ କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି।
ରୁଷିଆର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭଙ୍କ ଅନୁଯାୟୀ, ରବିବାର ବିଳମ୍ବିତ ରାତିରେ ନୋଭଗୋରୋଡ୍ ଅଞ୍ଚଳରେ ଥିବା ପୁଟିନଙ୍କ ସରକାରୀ ବାସଭବନକୁ ଲକ୍ଷ୍ୟ କରି ୯୧ଟି ଡ୍ରୋନ୍ ମାଡ଼ କରାଯାଇଥିଲା। ଏହି ଡ୍ରୋନ୍ଗୁଡ଼ିକୁ ରୁଷୀୟ ସେନା ଆକାଶମାର୍ଗରୁ ଖସାଇ ଦେଇଛି।
ଜେଲେନସ୍କି ଏହାକୁ ଏକ “ସାଧାରଣ ରୁଷୀୟ ମିଛ” ବୋଲି କହିଛନ୍ତି। ସେ କହିଛନ୍ତି ଯେ, କିଭ୍ ଉପରେ ପୁଣି ଥରେ ଭୟଙ୍କର ଆକ୍ରମଣ କରିବା ପାଇଁ ରୁଷିଆ ଏଭଳି ମିଥ୍ୟା କାହାଣୀ ରଚନା କରୁଛି।
ଏହି ଘଟଣା ପରେ ରୁଷିଆ ନିଜର ଆଲୋଚନା ସର୍ତ୍ତରେ ପରିବର୍ତ୍ତନ କରିବ ବୋଲି ଲାଭରୋଭ ସୂଚନା ଦେଇଛନ୍ତି। ଅନ୍ୟପଟେ, ଏହା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତାରେ ଚାଲିଥିବା ଶାନ୍ତି ପ୍ରୟାସକୁ ବାଧାପ୍ରାପ୍ତ କରୁଥିବା ଜେଲେନସ୍କି ଅଭିଯୋଗ କରିଛନ୍ତି।
ଏହି ଘଟଣାକ୍ରମ ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ପୁଟିନଙ୍କ ମଧ୍ୟରେ ଫୋନ ଯୋଗେ ସକାରାତ୍ମକ ଆଲୋଚନା ହୋଇଥିବା ହ୍ୱାଇଟ୍ ହାଉସ୍ ପକ୍ଷରୁ କୁହାଯାଇଛି। ୟୁକ୍ରେନ ଯୁଦ୍ଧ ବନ୍ଦ କରିବା ପାଇଁ ଶାନ୍ତି ଆଲୋଚନା ଏବେ ଚୂଡ଼ାନ୍ତ ପର୍ଯ୍ୟାୟରେ ଥିବା ଟ୍ରମ୍ପ ଦାବି କରିଛନ୍ତି।
ଜେଲେନସ୍କିଙ୍କ ଅନୁଯାୟୀ, ଏହି ଡ୍ରୋନ୍ ଆକ୍ରମଣ ଆଳରେ ରୁଷିଆ ଖୁବଶୀଘ୍ର ୟୁକ୍ରେନର ରାଜଧାନୀ କିଭ୍ ଉପରେ ବଡ଼ ଧରଣର ଆକ୍ରମଣ କରିପାରେ, ତେଣୁ ସମସ୍ତେ ସତର୍କ ରହିବା ଆବଶ୍ୟକ।
