ଇସଲାମାବାଦ,୨୫।୨ : ଶାସକ ମିଳିତ ମେଣ୍ଟ ପାକିସ୍ତାନ ଡେମୋକ୍ରାଟିକ ମୁଭମେଣ୍ଟ (ପିଡିଏମ) ବର୍ତ୍ତମାନ ସୁପ୍ରିମକୋର୍ଟଙ୍କ ବିରୋଧରେ ଏକ ମୋର୍ଚ୍ଚା ଖୋଲିଛି। ପଞ୍ଜାବ ଏବଂ ଖାଇବର ପାସ୍ତୁନଖ୍ବା ପ୍ରଦେଶରେ ନିର୍ବାଚନ ଆୟୋଜନ ପ୍ରସଙ୍ଗରେ ସୁପ୍ରିମକୋର୍ଟ ଯେଉଁଭଳି ଭାବରେ ଶୁଣାଣି ଆରମ୍ଭ କରିଥିଲେ, ତାହାକୁ ନେଇ ପିଡିଏମରେ ଅସନ୍ତୋଷ ବ୍ୟକ୍ତ କରିଛି। ନିର୍ବାଚନ ସ୍ଥଗିତ ରଖିବାକୁ ଶାସକ ମିଳିତ ମଞ୍ଚ ଚେଷ୍ଟା କରୁଛି।
ଏହି ପ୍ରସଙ୍ଗରେ ପିଡିଏମଙ୍କ ଉଦ୍ଦେଶ୍ୟ ଅନୁଯାୟୀ ନିର୍ବାଚନ ଆୟୋଗ କାର୍ଯ୍ୟ କରୁଥିବା ଅଭିଯୋଗ ହୋଇଛି। ଏହି ପ୍ରସଙ୍ଗରେ ରାଷ୍ଟ୍ରପତି ଆରିଫ ଅଲଭିଙ୍କ ସହ ମୁହାଁମୁହିଁ ସ୍ଥିତି ସୃଷ୍ଟି ହୋଇଛି। କିନ୍ତୁ ସେପଟେ ସୁପ୍ରିମକୋର୍ଟ ଏଥିରେ ହସ୍ତକ୍ଷେପ କରିଥିଲେ। ଏହି ମାମଲାର ଶୁଣାଣି ପାଇଁ ସୁପ୍ରିମକୋର୍ଟର ପ୍ରଧାନ ବିଚାରପତି ଉମର ଆତା ବନ୍ଦିଆଲଙ୍କ ନେତୃତ୍ୱରେ ନଅ ଜଣିଆ ଖଣ୍ଡପୀଠ ଗଠନ କରାଯାଇଛିି। ଶୁକ୍ରବାର ପିଡିଏମ ଦୁଇଜଣ ବିଚାରପତିଙ୍କୁ ଟାର୍ଗେଟ କରିଥିଲା।
ପିଡିଏମ କହିଛି ଯେ ଏହି ଦୁଇ ବିଚାରପତି ଜଷ୍ଟିସ ମଜହିର ଅଲି ଆକବର ନାକଭି ଏବଂ ଜଷ୍ଟିସ ଇଜାଜୁଲ ଅହସାନ ଏହି ମାମଲାରୁ ନିଜକୁ ଦୂରେଇ ରଖିବା ଉଚିତ। ଅନ୍ୟପକ୍ଷରେ ପିଡିଏମ ଜାମିଆତ ଉଲେମା-ଇ-ଇସଲାମ-ଫଜଲ (ଜୁଏଫ), ପାକିସ୍ତାନ ପିପୁଲ୍ସ ପାର୍ଟି (ପିପିପି) ଏବଂ ପାକିସ୍ତାନ ମୁସଲିମ ଲିଗ- ନୱାଜ (ପିଏମଏଲଏନ) ରେ ଅନ୍ତର୍ଭୁକ୍ତ ତିନି ଦଳ ପ୍ରଧାନ ବିଚାରପତିଙ୍କୁ ବେଞ୍ଚରେ ଅନ୍ତର୍ଭୁକ୍ତ କରିବାକୁ ଦାବି କରିଛି। ଏହି ମାମଲାର ଶୁଣାଣି ପାଇଁ ଗଠିତ ହୋଇଛି ସୁପ୍ରିମକୋର୍ଟର ଅନ୍ୟ ସମସ୍ତ ବିଚାରପତିଙ୍କୁ ମଧ୍ୟ ଅନ୍ତର୍ଭୁକ୍ତ କରନ୍ତୁ ବୋଲି ପିଡିଏମ୍ ଦାବି କରିଛି।
