ନୂଆଦିଲ୍ଲୀ,୨୦।୬: କରୋନା ମୃତକଙ୍କ ପରିବାରକୁ ୪ ଲକ୍ଷ ଟଙ୍କାର ଅନୁକମ୍ପା ମୂଳକ ସହାୟତା ଦେଇ ହେବନି। ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ପକ୍ଷରୁ ସୁପ୍ରିମ୍କୋର୍ଟରେ ୧୮୩ ପୃଷ୍ଠାର ସତ୍ୟପାଠ ଦାଖଲ କରାଯାଇଛି। ଯଦି ଏପରି କରାଯିବ ତେବେ ଷ୍ଟେଟ୍ ଡିଜାଷ୍ଟର ରିଲିଫ୍ ଫଣ୍ଡ୍ (ଏସ୍ଡିଆର୍ଏଫ୍)ର ସମସ୍ତ ଟଙ୍କା ଖର୍ଚ୍ଚ ହୋଇଯିବ ବୋଲି କେନ୍ଦ୍ର ସରକାର ସତ୍ୟପାଠରେ ଉଲ୍ଲେଖ କରିଛନ୍ତି। ଏହି ଫଣ୍ଡ୍ର ସମସ୍ତ ଟଙ୍କା ଖର୍ଚ୍ଚ ହୋଇଗଲେ ବନ୍ୟା, ବାତ୍ୟା ସହିତ ଅନ୍ୟ ପ୍ରାକୃତିକ ବିପର୍ଯ୍ୟୟର ମୁକାବିଲାରେ ସମସ୍ୟା ସୃଷ୍ଟି ହେବାର ଆଶଙ୍କା ଥିବା ସରକାର କହିଛନ୍ତି। ଅନୂକମ୍ପା ମୂଳକ ସହାୟତା ନେଇ ସୁପ୍ରିମ୍କୋର୍ଟରେ ନ୍ୟାଶନାଲ୍ ଡିଜାଷ୍ଟର ମ୍ୟାନେଜମେଣ୍ଟ୍ ଆକ୍ଟ ଏବଂ ୨୦୧୫ରେ ନ୍ୟାଶନାଲ୍ ଡିଜାଷ୍ଟର ମ୍ୟାନେଜମେଣ୍ଟ୍ ଅଥରିଟିଙ୍କ ପକ୍ଷରୁ ଜାରି ହୋଇଥିବା ମାର୍ଗଦର୍ଶିକା ସମ୍ପର୍କରେ ଉଲ୍ଲେଖ କରାଯାଇଥିଲା। ତେବେ ମାର୍ଗଦର୍ଶିକାରେ ଦର୍ଶାଯାଇଥିଲା ୪ ଳକ୍ଷ ଟଙ୍କା ଅନୁକମ୍ପା ମୂଳକ ସହାୟତା ଭୂକମ୍ପ, ବନ୍ୟା ଆଦି ପ୍ରାକୃତିକ ବିପର୍ଯ୍ୟୟ କ୍ଷେତ୍ରରେ ଲାଗୁ ହେବ ବୋଲି ପ୍ରଧାନମନ୍ତ୍ରୀ ମୋଦି ସରକାରଙ୍କ ପକ୍ଷରୁ କୁହାଯାଇଛି।
୨୦୧୯-୨୦ରେ ରାଜ୍ୟ ସରକାର ଏସ୍ଡିଆର୍ଏଫ୍ ମାଧ୍ୟମରେ ୩୫ ପ୍ରତିଶତ ଫଣ୍ଡ୍ ବ୍ୟବହାର କରିବାର ପ୍ରାବଧାନ ଥିଲା ତେବେ ୨୦୨୦-୨୧ରେ ଏହି ଖର୍ଚ୍ଚ ସୀମାକୁ ୫୦ ପ୍ରତିଶତକୁ ବୃଦ୍ଧି କରାଯାଇଛି। ୨୨.୧୨ ଲକ୍ଷ ସ୍ବାସ୍ଥ୍ୟକର୍ମୀଙ୍କ ଲାଗି ୫୦ ଲକ୍ଷ ଟଙ୍କାର ବୀମା ସୁରକ୍ଷା ପ୍ରଦାନ କରାଯାଇଛି। ଏଥିପାଇଁ ୪୪୨.୪ କୋଟି ଟଙ୍କା ବୀମା କମ୍ପାନୀଙ୍କୁ ପ୍ରଦାନ କରାଯାଇଛି।
ସେହିପରି ୨୦୧୯-୨୦ରେ କାରୋନା ମୁକାବିଲା ଲାଗି ରାଜ୍ୟ ସରକାର ତଥା କେନ୍ଦ୍ର ଶାସିତ ଅଞ୍ଚଳ ଗୁଡ଼ିକ ପାଇଁ ୧,୧୧୩.୨୧ କୋଟି ଟଙ୍କାର ଅତିରିକ୍ତ ସହାୟତା ଜାରି ହୋଇଛି। ଏହା ସହିତ ଏମରଜେନ୍ସି ରିସୋର୍ସ ଏବଂ ହେଲଥ୍ ସିଷ୍ଟମ୍ ପ୍ରିପେୟର୍ଡନେସ୍ ପାଇଁ ୮,୨୫୭.୮୯ କୋଟି ଟଙ୍କା ପ୍ରଦାନ କରାଯାଇଥିବା କେନ୍ଦ୍ର ସରକାର ସତ୍ୟାପାଠରେ ଦର୍ଶାଇଛନ୍ତି।
