ଭୁବନେଶ୍ୱର,୫।୯: ଶେୟାର ବଜାରରେ ରିଲାଏନ୍ସ ଇଣ୍ଡଷ୍ଟ୍ରିର ଶେୟାର ମୂଲ୍ୟ ବୃଦ୍ଧି ସାଙ୍ଗକୁ ନିକଟରେ ବିଭିନ୍ନ କମ୍ପାନୀର ଅଂଶଧନ କ୍ରୟ ରିଲାଏନ୍ସକୁ ବେଶ୍ ଲାଭ ଦେଇଛି। ଫଳରେ ଗତ କିଛିଦିନ ମଧ୍ୟରେ କମ୍ପାନୀର ଶେୟାର ମୂଲ୍ୟ ଆଶାତୀତ ଭାବେ ବୃଦ୍ଧି ପାଉଛି। ଏହି ସମ୍ପତ୍ତି ବୃଦ୍ଧି ଫଳରେ କମ୍ପାନୀ ଅଧ୍ୟକ୍ଷ ମୁକେଶ ଅମ୍ବାନିଙ୍କ ସମ୍ପତ୍ତି ମଧ୍ୟ ସେହି ପରିମାଣରେ ବଢ଼ିଚାଲିଛି। ଫଳରେ ରିଲାଏନ୍ସ ଇଣ୍ଡଷ୍ଟ୍ରିର ବଜାର ମୂଲ୍ୟ ବୃଦ୍ଧି ଘଟି ୧୫ ଲକ୍ଷ କୋଟିରୁ ଊର୍ଦ୍ଧ୍ୱରେ ପହଞ୍ଚିଛି। କମ୍ପାନୀ ଏମ୍ କ୍ୟାପ୍ ବର୍ଗରେ ସାମିଲହେବା ସହ ବଜାରର ଏହି ସ୍ତର ଛୁଇଁବାରେ ରିଲାଏନ୍ସ ପ୍ରଥମ ଭାରତୀୟ ଶିଳ୍ପ ସଂସ୍ଥା ଭାବେ ସମ୍ମାନ ହାସଲ କରିଛି। ରିଲାଏନ୍ସ ଇଣ୍ଡଷ୍ଟ୍ରିର ଶେୟାର ମୂଲ୍ୟ ଆଶାତୀତ ଭାବେ ବୃଦ୍ଧି ପାଇବା ଯୋଗୁ କମ୍ପାନୀ ଏମ୍ କ୍ୟାପ୍ରେ ସାମିଲ ହୋଇଛି। ଶୁକ୍ରବାର ବମ୍ବେ ଷ୍ଟକ୍ ଏକ୍ସଚେଞ୍ଜରେ କାରବାର ସମାପ୍ତ ହେବା ବେଳକୁ ରିଲାଏନ୍ସର ସମ୍ପତ୍ତି ୧୫,୧୪,୦୧୭.୫୦ କୋଟି ଛୁଇଁଥିଲା। ସେହିଭଳି କମ୍ପାନୀର ଶେୟାର ୪.୧୨% ବୃଦ୍ଧି ହୋଇ ୨,୩୮୮.୨୫ରେ ପହଞ୍ଚତ୍ଥିଲା। ବଜାର କାରବାର ସମୟରେ ରିଲାଏନ୍ସର ଶେୟାର ୪.୩୮% ବଢ଼ି ୨,୩୯୪.୩୦ ପ୍ରତି ଇକ୍ୱିଟିରେ ରହିଥିଲା। କମ୍ପାନୀର ବଜାର ମୂଲ୍ୟ ଚଳିତ ବର୍ଷ ଜୁନ୍ରେ ୧୪ ଲକ୍ଷ କୋଟି ଟଙ୍କା ଟପି ଥିବା ସୂଚନା ମଳିଛି। ରିଲାଏନ୍ସ ଶେୟାରର ବୃଦ୍ଧି ଯୋଗୁ ବଜାର ଉପରେ ମଧ୍ୟ ଏହାର ଭଲ ପ୍ରଭାବ ପଡୁଥିଲା। ପ୍ରଥମ କରି ଶୁକ୍ରବାର ସେନ୍ସେକ୍ସ ୫୮ହଜାର ଉପରେ ବନ୍ଦ ହୋଇଥିଲା। ଏ ସମ୍ପର୍କରେ ରିଲାଏନ୍ସର ଅଧ୍ୟକ୍ଷ ମୁକେଶ ଅମ୍ବାନି କହିଛନ୍ତି, କମ୍ପାନୀର ସମ୍ପତ୍ତି ବୃଦ୍ଧିଠାରୁ ନେଇ ଏମ୍ କ୍ୟାପ୍ରେ ସାମିଲ ହେବା ପର୍ଯ୍ୟନ୍ତ ସବୁ ସ୍ତରରେ କଠିନ ପରିଶ୍ରମ ଓ ଅଭିବୃଦ୍ଧିକୁ ଆଖି ଆଗରେ ରଖି କମ୍ପାନୀ ଅନେକ କିଛି କାର୍ଯ୍ୟ କରୁଛି। ସେହିଭଳି ଆଗାମୀ ଦିନରେ ବିଶ୍ବର ସବୁଠୁ ସୁଲଭ ମୂଲ୍ୟର ହାଇଡ୍ରୋଜେନ୍ ଇନ୍ଧନ ଉତ୍ପାଦନ କରିବା ଉପରେ ରିଲାଏନ୍ସ ଇଣ୍ଡଷ୍ଟ୍ରିଜ୍ କାର୍ଯ୍ୟ କରୁଛି। ଏହି କାର୍ଯ୍ୟ ସଫଳ ହେଲେ ହାଇଡ୍ରୋଜେନ୍ ଇନ୍ଧନର କିଲୋଗ୍ରାମ ପିଛା ମୂଲ୍ୟକୁ ଦୁଇ ଡଲାର ଭିତରେ ରଖିବା ପାଇଁ ସବୁ ସ୍ତରରେ ଚେଷ୍ଟା କରାଯିବ। ଏହା ହେଲେ ସବୁଜ ଶକ୍ତି କ୍ଷେତ୍ରରେ ଭାରତ ବିଶ୍ବର ନେତୃତ୍ୱ ନେଇପାରିବ ବୋଲି ସେ କହିଛନ୍ତି। ୨୦୩୦ ସୁଦ୍ଧା ୪୫୦ ଗିଗାୱାଟ ଅକ୍ଷୟ ଶକ୍ତି ଉତ୍ପାଦନ କରିବାକୁ ସରକାର ଲକ୍ଷ୍ୟ ରଖିଛନ୍ତି। ସେହିପରି ରିଲାଏନ୍ସ ମଧ୍ୟ ୧୦୦ ଗିଗାୱାଟ୍ର ସୌର ଶକ୍ତି ଉତ୍ପାଦନ କରିବାକୁ ଚାହୁଁଛି ବୋଲି ମୁକେଶ କହିଛନ୍ତି।
