ନୂଆଦିଲ୍ଲୀ,୬।୫: ଦେଶରେ ସମଲିଙ୍ଗୀ ବିବାହକୁ ନେଇ ସୁପ୍ରିମକୋର୍ଟରେ ଶୁଣାଣି ଚାଲିଥିବାବେଳେ ରାଷ୍ଟୀୟ ସ୍ବୟଂସେବକ ସଂଘ (ଆରଏସ୍ଏସ୍)ର ମହିଳା ସଙ୍ଗଠନ ଦାବି କରି କହିଛନ୍ତି ଯେ, ସମଲିଙ୍ଗୀ ସମ୍ପର୍କ ଏକ ପ୍ରକାର ବ୍ୟାଧି। ଯଦି ଏପରି ବିବାହକୁ ଆଇନସମ୍ମତ କରାଯାଏ, ତେବେ ଏହା ଆହୁରି ବୃଦ୍ଧି ପାଇବ।
ହିନ୍ଦୁ ଦକ୍ଷିଣପନ୍ଥୀ ସଙ୍ଗଠନର ମହିଳା ଗୋଷ୍ଠୀ ଦାବି କରିଛନ୍ତି ଯେ, ସମଲିଙ୍ଗୀ ବିବାହକୁ ନେଇ କରାଯାଇଥିବା ସର୍ଭେରେ ୩୧୮ ଜଣ ଡାକ୍ତର ସେମାନଙ୍କ ମତ ରଖିଛନ୍ତି। ସଙ୍ଗଠନର ଜଣେ ବରିଷ୍ଠ କାର୍ଯ୍ୟକର୍ତ୍ତା କହିଛନ୍ତି ଯେ, ପ୍ରାୟ ୭୦% ଡାକ୍ତର ଏବଂ ସେମାନଙ୍କର ସହଯୋଗୀ ପ୍ରଫେସର ସମଲିଙ୍ଗୀ ସମ୍ପର୍କ ଏକ ବ୍ୟାଧି ବା ଡିସ୍ଅର୍ଡର ଭାବେ ବିବେଚନା କରିଛନ୍ତି। ୮୩%ଙ୍କ ମତରେ ଏହାଦ୍ୱାରା ଯୌନରୋଗ ବଢ଼ିବାର ସମ୍ଭାବନା ରହିଛି।
ସଙ୍ଗଠନ କହିଛି ଯେ, ଏପରି ମାନସିକ ବିକୃତ ରୋଗୀଙ୍କୁ ଭଲ କରିବା ପାଇଁ କାଉନସେଲିଂ ଗଠନ କରାଯିବା ଉଚିତ। ସମଲିଙ୍ଗୀ ବିବାହକୁ ଆଇନସମ୍ମତ କରିବାକୁ କୌଣସିି ନିଷ୍ପତ୍ତି ନେବା ପୂର୍ବରୁ ଜନମତ ଗ୍ରହଣ କରାଯିବା ଆବଶ୍ୟକ।
ଅନେକ ଧାର୍ମିକ ଅନୁଷ୍ଠାନ ଏଭଳି ବିବାହର ସ୍ବୀକୃତିକୁ ବିରୋଧ କରିଛନ୍ତି। ସ୍ବାମୀ ନିଶ୍ଚଳାନନ୍ଦ ସରସ୍ବତୀ ମଧ୍ୟ ଏହାକୁ ବିରୋଧ କରି ଏକ ବିବୃତି ଦେଇଛନ୍ତି। ସେ କହିଛନ୍ତି, ସନାତନ ଧର୍ମ ଅନୁଯାୟୀ ଏହି ବିବାହ ସମ୍ଭବ ନୁହେଁ। ଏହା ଦିଗହୀନ ଅଟେ।
