ନୂଆଦିଲ୍ଲୀ,୨୮ା୧୨: ଦେଶର ଅର୍ଥନୈତିକ ଅଭିବୃଦ୍ଧିରେ ଆଇଟି ସେକ୍ଟର କମ୍ପାନୀଗୁଡ଼ିକର ଯୋଗଦାନ ବେଶ୍ ଉଲ୍ଲେଖନୀୟ ରହିଛି। ବିଶେଷକରି ଏ କ୍ଷେତ୍ରରେ କାମ କରୁଥିବା କର୍ମଚାରୀ ହୁଅନ୍ତୁ କିମ୍ବା ଅଧିକାରୀ ସମସ୍ତେ ମୋଟା ଅଙ୍କର ଦରମା ମଧ୍ୟ ପାଇଥାନ୍ତି। ଏପରିକି ଗତ ୧୦ବର୍ଷରେ ଆଇଟି କମ୍ପାନୀଗୁଡ଼ିକର ସିଇଓ ଏବଂ ଅନ୍ୟ ବରିଷ୍ଠ କର୍ମଚାରୀ ତଥା ନବାଗତ କର୍ମଚାରୀଙ୍କ ଦରମା ବୃଦ୍ଧି(ଇନ୍କ୍ରିମେଣ୍ଟ) ପର୍ଯ୍ୟାୟକ୍ରମେ ବୃଦ୍ଧି ପାଇଥାଏ। ସେହିଭଳି ବର୍ତ୍ତମାନ ସମୟରେ ଭାରତ ସମେତ ସମଗ୍ର ଦୁନିଆରେ ମଧ୍ୟ ଆଇଟି କମ୍ପାନୀଗୁଡ଼ିକର ଗୁରୁତ୍ୱ ଯଥେଷ୍ଟ ବୃଦ୍ଧି ପାଇଛି। ବିଶେଷକରି ଗତ ୧୦ ବର୍ଷରେ ଅନେକ ଆଇଟି କମ୍ପାନୀ ପ୍ରତିଷ୍ଠା ହୋଇଛି। ଏପରିକି କିଛି ପ୍ରମୁଖ ଆଇଟି କମ୍ପାନୀ ନିଜର ସ୍ଥିତି ମଧ୍ୟ ସୁଦୃଢ କରିପାରିଛନ୍ତି। ସେହିପରି ଆଇଟି ସେକ୍ଟରରେ ୧୦ ବର୍ଷ ପୂର୍ବରୁ ନବାଗତ କର୍ମଚାରୀ (ଫ୍ରେସର) ଯେତିକି ଦରମା ପାଉଥିଲେ ଏବେ ମଧ୍ୟ ସେମାନଙ୍କ ଦରମା ସମାନ ରହିଛି। ବର୍ତ୍ତମାନ ଯେଉଁ ନବାଗତ ବିଭିନ୍ନ ଆଇଟି କମ୍ପାନୀରେ ଯୋଗଦେଉଛନ୍ତି ସେମାନଙ୍କ ଦରମା ୧୦ ବର୍ଷ ପୂର୍ବର ଦରମା ଠାରୁ ସାମାନ୍ୟ ଅଧିକ ରହିଛି, ଯାହା ନଗଣ୍ୟ କହିଲେ ଚଳେ। କିନ୍ତୁ ସେହି ତୁଳନାରେ କମ୍ପାନୀଗୁଡିକର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ (ସିଇଓ) ମାନଙ୍କର ଦରମା ଅହେତୁକ ଭାବେ ବୃଦ୍ଧି ପାଇଛି। ଏପରିକି ପ୍ରମୁଖ ଆଇଟି କମ୍ପାନୀର ସିଇଓଙ୍କ ଦରମା ପାଖାପାଖି ୧୫୦୦%ରୁ ଅଧିକ ବୃଦ୍ଧି ପାଇଥିବା ଏକ ସର୍ଭେରୁ ଜଣାପଡିଛି। ଉକ୍ତ ସର୍ଭେ ରିପୋର୍ଟ ଅନୁଯାୟୀ, ଗତ ୧୦ ବର୍ଷ ମଧ୍ୟରେ ସିଇଓମାନଙ୍କ ଦରମା ୧୫୦୦% (୧୪୯୨.୨୭%) ବୃଦ୍ଧି ପାଇଥିବା ବେଳେ ନବାଗତଙ୍କ ଦରମା ସେହି ତୁଳନାରେ ମାତ୍ର ୪୭% (୪୬.୯୪ %) ବୃଦ୍ଧି ଘଟିଛି।
