ନୂଆଦିଲ୍ଲୀ,୭।୧୦: ଅଷ୍ଟ୍ରେଲିଆ ଗସ୍ତ ପୂର୍ବରୁ ଭାରତୀୟ ଚୟନକର୍ତ୍ତାମାନେ ରୋହିତ ଶର୍ମାଙ୍କୁ ଦିନିକିଆ ଅଧିନାୟକ ପଦରୁ ହଟାଇ ଏକ ସାହସିକ ପଦକ୍ଷେପ ନେଇଛନ୍ତି। ଶୁଭମନ ଗିଲଙ୍କୁ ୫୦ ଓଭର ଫର୍ମାଟର ଦାୟିତ୍ୱ ଦିଆଯାଇଥିବାରୁ ଏହି ପଦକ୍ଷେପ କ୍ରିକେଟ ଜଗତରେ ହଇଚଇ ସୃଷ୍ଟି କରିଛି। ଏହି ନିଷ୍ପତ୍ତିରେ ଲୋକମାନେ ଆଶ୍ଚର୍ଯ୍ୟ ମଧ୍ୟ ହୋଇଛନ୍ତି କାରଣ କିଛି ମାସ ପୂର୍ବରୁ ଭାରତ ରୋହିତ ଶର୍ମାଙ୍କ ଅଧିନାୟକତ୍ୱରେ ଚାମ୍ପିଅନ୍ସ ଟ୍ରଫି ଜିତିଥିଲା। ତାଙ୍କୁ ଫାଇନାଲରେ ପ୍ଲେୟାର ଅଫ ଦ ମ୍ୟାଚ ଭାବରେ ବିବେଚିତ କରାଯାଇଥିଲା। ଦଳ ଚୟନ ପରେ, ରୋହିତ ଶର୍ମାଙ୍କର ଏକ ପୁରୁଣା ଭିଡିଓ ଭାଇରାଲ ହୋଇଛ। ଯେଉଁଥିରେ ସେ ୨୦୨୭ ଦିନିକିଆ ବିଶ୍ୱକପରେ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି।
ରୋହିତ ଶର୍ମା ଆଇସିସି ୨୦୨୪ ଟି୨୦ ବିଶ୍ୱକପ ଜିତିବା ପରେ ଏହି ଫର୍ମାଟରୁ ଅବସର ନେଇଥିଲେ। ଇଂଲଣ୍ଡ ଗସ୍ତ ପୂର୍ବରୁ ସେ ଟେଷ୍ଟ କ୍ରିକେଟରୁ ଅବସର ନେଇଥିଲେ। ଏବେ, ସେ କେବଳ ଦିନିକିଆରେ ସକ୍ରିୟ ଅଛନ୍ତି ଏବଂ ୨୦୨୭ ବିଶ୍ୱକପ ଖେଳିବାକୁ ଲକ୍ଷ୍ୟ ରଖିଛନ୍ତି। ରିପୋର୍ଟ ଅନୁଯାୟୀ ଟୁର୍ନାମେଣ୍ଟରେ ତାଙ୍କର ଅଂଶଗ୍ରହଣ ସନ୍ଦେହଜନକ ହୋଇପଡ଼ିଛି। ଭାରତରେ ଚମତ୍କାର ପ୍ରଦର୍ଶନ ସହିତ ୨୦୨୩ ଦିନିକିଆ ବିଶ୍ୱକପର ଫାଇନାଲରେ ପହଞ୍ଚିଥିବା ଭାରତୀୟ ଦଳ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା। ଅଧିନାୟକ ଭାବରେ ରୋହିତ ଶର୍ମାଙ୍କ ସ୍ବପ୍ନ ଥିଲା Iଏବେ, ତାହା ପୂରଣ ହେବ ନାହିଁ।
କିଛି ମାସ ପୂର୍ବେ, କ୍ରିକେଟ ଏକ ପଡକାଷ୍ଟ ସମୟରେ, ରୋହିତ ପ୍ରଶଂସକମାନଙ୍କ ସହ ତାଙ୍କର ହୃଦୟସ୍ପର୍ଶୀ ଭାବନା ବାଣ୍ଟିଥିଲେ। ଯେତେବେଳେ ତାଙ୍କୁ ପଚରାଗଲା ଯେ ସେ ୨୦୨୩ର “ଅସମାପ୍ତ କାର୍ଯ୍ୟ” ସମାପ୍ତ କରିବା ପାଇଁ ୨୦୨୭ ବିଶ୍ୱକପରେ ଖେଳିବାକୁ ଏବଂ ଭାରତର ଅଧିନାୟକ ହେବାକୁ ଚାହାଁନ୍ତି କି, ସେ ଉତ୍ତର ଦେବା ସମୟରେ ଭାବପ୍ରବଣ ହୋଇଯାଇଥିଲେ। ରୋହିତ ଶର୍ମା କହିଥିଲେ, “ହଁ, ଏହା ନିଶ୍ଚିତ ଭାବରେ ମୋ ମନରେ ଅଛି… ଯଦି ୨୦୨୩ ରେ ଯାହା ପୂରଣ ହୋଇପାରିଲା ନାହିଁ, ତେବେ ମୁଁ ତାହା ପୂରଣ କରିପାରିବା ଭଲ ହେବ।”
Dharitri – Odisha’s No.1 Trusted Odia Daily
