ଭବାନୀପାଟଣା,୨।୯(ଉତ୍ତମ କୁମାର ଦାଶ): କଳାହାଣ୍ଡି ଜିଲାରେ ପୁଣି ଡକାୟତମାନେ ଆତଙ୍କ ଜାହିର କରିଛନ୍ତି। ରାତିରେ ଘରେ ପଶି ମାରଣାସ୍ତ୍ର ଦେଖାଇ ଭୟଭୀତ କରି ଲଟ୍ପାଟ କରୁଛନ୍ତି। ଏପରିକି ଲୋକଙ୍କୁ ମାଡ ମାରିବା ସହ ମାରଣାସ୍ତ୍ରରେ ଆଘାତ ମଧ୍ୟ କରୁଛନ୍ତି। ପୋଲିସର ନିଷ୍କ୍ରିୟତା ଯୋଗୁ ଜିଲାର ସହରାଞ୍ଚଳ, ଗ୍ରାମାଞ୍ଚଳରେ ଡକାୟତି, ରାହାଜାନି ବୃଦ୍ଧି ପାଇବାରରେ ଲାଗିଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି। କଳାହାଣ୍ଡି ଜିଲା ଜୁନାଗଡ ସହରରେ ଗୁରୁବାର ରାତିରେ ପୁଣି ଏକ ଘଟଣା ସାମ୍ନାକୁ ଆସିଛି। ସହରର କଲେଡପଡାରେ ସୁଷମା ଆଚାର୍ଯ୍ୟାଙ୍କ ଘରେ କିଛି ଡକାୟତ ପଶି ଲୁଟ କରିବାକୁ ଉଦ୍ୟମ କରିଥିଲେ। ସୁଷମା ସେମାନଙ୍କୁ ପ୍ରତିରୋଧ କରି ଚିତ୍କାର କରିବାରୁ ଡକାୟତମାନେ ଲୁଟ କରି ନ ପାରି ତାଙ୍କ ପେଟରେ ଛୁରି ଭୁସି ଚାଲିଯାଇଥିଲେ। ସ୍ଥାନୀୟ ଲୋକେ ପୋଲିସକୁ ଖବର ଦେବା ସହ ଆହତ ସୁଷମାଙ୍କୁ ଡାକ୍ତରଖାନା ନିଆଯାଇଥିଲା। ଶୁକ୍ରବାର ସକାଳେ ପୋଲିସ ସାଇଣ୍ଟିଫିକ୍ ଟିମ୍ ସହ ସନ୍ଧାନୀ କୁକୁର ସାହାଯ୍ୟରେ ତଦନ୍ତ ଆରମ୍ଭ କରିଥିଲା। ଏହି ସମୟରେ ଡକାୟତମାନେ ଘଟଣା ସ୍ଥଳରେ ଛାଡିଦେଇଥିବା ଗୋଟିଏ ପିସ୍ତଲ ପୋଲିସ ଜବତ କରିଛି। ସୁଷମାଙ୍କ ଅଭିଯୋଗ ପରେ ପୋଲିସ ଏକ ମାମଲା (ନଂ. ୩୧୬/୨୩) ରୁଜୁ କରି ତଦନ୍ତ ଜାରି ରଖିଛି। ଏପରିକି ଗତ କରୋନା ସମୟରେ ଡକାୟତମାନେ ସୁଷମାଙ୍କ ଘରେ ପଶି ଲକ୍ଷାଧିକ ଟଙ୍କା ଅନ୍ୟାନ୍ୟ ସାମଗ୍ରୀ ଚୋରି କରିଥିଲେ। ଅଦ୍ୟାବଧି ୨ ବର୍ଷ ପରେ ମଧ୍ୟ ଡକାୟତମାନେ ଧରାପଡିନାହାନ୍ତି। ସୂଚନା ଅନୁଯାୟୀ, ଗତ ଅଗଷ୍ଟରେ ଜିଲାର କୋକସରା ଥାନା ଓଲମା ଗ୍ରାମର ଧନଞ୍ଜୟ ସାହୁ ଘରେ ପଶି ବନ୍ଧୁକ ଦେଖାଇ ଡକାୟତମାନେ ୨୫ ତୋଳା ସୁନା ଗହଣା ଲୁଟି ନେଇଥିଲେ। ସେହିପରି କଲମପୁର ଥାନା ଅନ୍ତର୍ଗତ ଦୁଲକିବନ୍ଦ ଗ୍ରାମର ରାଜେଶ ସରାଫଙ୍କ ଘରୁ ମଧ୍ୟ ଡକାୟତମାନେ ବନ୍ଧୁକ ଦେଖାଇ ୭ଲକ୍ଷ ଟଙ୍କା ଓ ସୁନା ଗହଣା ଲୁଟିନେଇଥିଲେ। ଧର୍ମଗଡ ସହରଠାରେ ଥିବା ଦୌରା ଜଜ୍ ବିଶ୍ୱଜିତ ଦାସଙ୍କ ଘରେ ମଧ୍ୟ ଡକାୟତମାନେ ପଶି ଲୁଟ କରି ଭଙ୍ଗାରୁଜା କରିଥିଲେ। ଭବାନୀପାଟଣା ସଦର ଥାନା ଅର୍ନ୍ତଗତ ଶଗଡା ଗ୍ରାମରେ ମଧ୍ୟ ଗୋଟିଏ ଦିନରେ ଡକାୟତମାନେ ପଞ୍ଚାୟତ କାର୍ଯ୍ୟାଳୟ, କୃଷି କାର୍ଯ୍ୟାଳୟ, ମିଶନ ଶକ୍ତି ଭବନ ସମେତ ଗାଁରେ ଥିବା ୩ଟି ଦୋକାନରେ ଚୋରି କରିଥିଲେ। ଭବାନୀପାଟଣା ସହରରେ ଥିବା କଳାହାଣ୍ଡି ରାଜବାଟୀକୁ ଅଣଓଡିଆ ୧୦ରୁ ୧୨ଜଣ ଡକାୟତ ବାଡ ଦେଇଁ ପଶିଥିଲେ। ସୁରକ୍ଷା କର୍ମୀ ମୁତୟନ ଥିବାରୁ ଭୟଭୀତ ହୋଇ ଡକାୟତମାନେ ସେଠାରୁ ଫେରାର ହୋଇଯାଇଥିବାବେଳେ ଜଣେ ଡକାୟତ ଧରାପଡିଥିଲେ। ଜିଲାପାଳ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
