ଥୁଆମୂଳ ରାମପୁର,୧୪ା୨(ଦୁର୍ଗା କୀର୍ତ୍ତି): ସଡ଼କ ଦୁର୍ଘଟଣା ହ୍ରାସ କରିବା, ଯାତାୟାତ ନିୟମର ଅନୁପାଳନ ଏବଂ ପ୍ରବାସୀ ଶ୍ରମିକଙ୍କ ବିଭିନ୍ନ ସମସ୍ୟା ସମ୍ପର୍କରେ ଜନସାଧାରଣଙ୍କୁ ସଚେତନ କରିବା ଲକ୍ଷ୍ୟରେ କଳାହାଣ୍ଡି ଜିଲା ଥୁଆମୂଳ ରାମପୁର ଜେଏମ୍ଏଫ୍ସି ପକ୍ଷରୁ ଶୁକ୍ରବାର ଦୁଇଟି ପୃଥକ୍ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଥୁଆମୂଳ ରାମପୁର ତାଲୁକ ଆଇନ ସେବା କମିଟି ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମ ସ୍ଥାନୀୟ ମାଜିଷ୍ଟ୍ରେଟ୍ ଡକ୍ଟର ତାରିଣୀ ପ୍ରସାଦ ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମ୍ପନ୍ନ ହୋଇଥିଲା। ଦିନର ପ୍ରଥମାର୍ଦ୍ଧରେ ସଡ଼କ ସୁରକ୍ଷା ଉପରେ ଏକ ସଚେତନତା ରାଲି ସ୍ଥାନୀୟ କୋର୍ଟ କାର୍ଯ୍ୟାଳୟରୁ ବାହାରି ସହର ପରିକ୍ରମା କରିଥିଲା। ଏହି ରାଲିରେ ତାଲୁକ ଆଇନ ସେବା କମିଟିର ସଦସ୍ୟ ଏବଂ ଓଡ଼ିଶା ଆଦର୍ଶ ବିଦ୍ୟାଳୟର ବହୁ ସଂଖ୍ୟକ ଛାତ୍ରୀଛାତ୍ର ପ୍ଲାକାର୍ଡ ଓ ବାନର ଧରି ସାମିଲ ହୋଇଥିଲେ।
ସେହିପରି ଅପରାହ୍ନରେ ଥୁଆମୂଳ ରାମପୁରର ଖଣ୍ଡୁଆଳ ବାବା ଖେଳ ପଡ଼ିଆସ୍ଥିତ ଜିମ ହଲ୍ରେ ପ୍ରବାସୀ ଶ୍ରମିକଙ୍କ ସୁରକ୍ଷା, ଅଧିକାର ଓ ସରକାରୀ ଯୋଜନା ସମ୍ବନ୍ଧୀୟ ଏକ ସଭା ଅନୁଷ୍ଠିତ ହୋଇଥିଲା। ଏଥିରେ ମାଜିଷ୍ଟ୍ରେଟ ଡକ୍ଟର ସାହୁଙ୍କ ସମେତ ଆଇନଜୀବୀ ମନୋରଞ୍ଜନ ନାଏକ, ‘କର୍ତ୍ତବ୍ୟ’ ଅନୁଷ୍ଠାନର କ୍ଷେତ୍ର ସଂଯୋଜକ ସନ୍ତୋଷ ଦାସ, ସୁଦର୍ଶନ ନାଏକ, ସ୍ଥାନୀୟ ସବ-ପୋଷ୍ଟ ମାଷ୍ଟର ତୁଳସୀ ରାମ ମାଝୀ ଏବଂ ରାଜମିସ୍ତ୍ରୀ ସଂଘ ସଭାପତି ଗୋବିନ୍ଦ ନାଏକ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ପ୍ରବାସୀ ଶ୍ରମିକମାନେ କାମକୁ ଯିବା ପୂର୍ବରୁ ଶ୍ରମ ବିଭାଗରେ ନାମ ପଞ୍ଜୀକରଣ କରିବା, ଚୁକ୍ତିପତ୍ର ପଢ଼ି ବୁଝିବା, ମଧ୍ୟସ୍ଥିଙ୍କ ଠକେଇରୁ ସତର୍କ ରହିବା ଏବଂ ଜରୁରୀ ସହାୟତା ନମ୍ବର (୧୫୧୦୦) ସମ୍ପର୍କରେ ଶ୍ରମିକମାନଙ୍କୁ ବିସ୍ତୃତ ଭାବେ ବୁଝାଯାଇଥିଲା। ଏହି କାର୍ଯ୍ୟକ୍ରମରେ ଅଞ୍ଚଳର ବହୁ ଶ୍ରମିକ ଓ ଜନସାଧାରଣ ଉପସ୍ଥିତ ରହି ସୂଚନା ଗ୍ରହଣ କରିଥିଲେ।
