ଚେନ୍ନାଇ,୨୧।୯: ଟିମ ଇଣ୍ଡିଆର ତାରକା ଉଇକେଟ କିପର-ବ୍ୟାଟ୍ସମ୍ୟାନ ରିଷଭ ପନ୍ତଙ୍କ ଟେଷ୍ଟ କ୍ରିକେଟ ପ୍ରତ୍ୟାବର୍ତ୍ତନ ଦୃଢ ଼ ପ୍ରମାଣିତ ହେଉଛି। ଦେଢ ବର୍ଷରୁ ଅଧିକ ସମୟ ପୂର୍ବରୁ ଏକ ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇଥିବା ପନ୍ତ ବାଂଲାଦେଶ ବିପକ୍ଷ ଚେନ୍ନାଇ ଟେଷ୍ଟକୁ ଫେରି ନିଜ ବ୍ୟାଟ ସହିତ ନିଜର ପୁରୁଣା ଶୈଳୀ ଦେଖାଇବା ଆରମ୍ଭ କରିଛନ୍ତି। ପ୍ରଥମ ଇନିଂସରେ ଟିମ ଇଣ୍ଡିଆକୁ ଅସୁବିଧାରୁ ମୁକ୍ତ କରିବାରେ ଏକ ଛୋଟ କିନ୍ତୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ପନ୍ତ ବର୍ତ୍ତମାନ ଦ୍ୱିତୀୟ ଇନିଂସରେ ମଧ୍ୟ ଚମତ୍କାର ଇନିଂସ ଖେଳିଛନ୍ତି। ଏହା ସହ ପନ୍ତ ୬୩୭ ଦିନ ପରେ ଟେଷ୍ଟ କ୍ରିକେଟରେ ଅର୍ଦ୍ଧଶତକ ହାସଲ କରିଛନ୍ତି। ମ୍ୟାଚ୍ର ତୃତୀୟ ଦିନରେ ଟିମ ଇଣ୍ଡିଆର ଦ୍ୱିତୀୟ ଇନିଂସରେ ପନ୍ତ ଅର୍ଦ୍ଧଶତକ ସ୍କୋର କରିଥିଲେ। ତାଙ୍କର ପୂର୍ବ ଅର୍ଦ୍ଧଶତକ ମଧ୍ୟ ଦୁର୍ଘଟଣାର ଠିକ ପୂର୍ବରୁ ବାଂଲାଦେଶ ବିପକ୍ଷରେ ଆସିଥିଲା।
ଚେପକ ଷ୍ଟାଡିୟମରେ ଖେଳାଯାଉଥିବା ପ୍ରଥମ ଟେଷ୍ଟ ମ୍ୟାଚର ତୃତୀୟ ଦିନରେ ପନ୍ତ ଶୃଙ୍ଖଳିତ ବ୍ୟାଟିଂ କରି ନିଜର ଅର୍ଦ୍ଧଶତକ ହାସଲ କରିଥିଲେ। ପ୍ରଥମ ଇନିଂସରେ ପନ୍ତ ଦୃୃଢ ବ୍ୟାଟିଂ କରିଥିଲେ ମଧ୍ୟ ଅର୍ଦ୍ଧଶତକ ହାସଲ କରି ନ ଥିଲେ। ତାଙ୍କ ବ୍ୟାଟରୁ ମାତ୍ର ୫୨ ବଲରେ ୩୯ ରନ ସ୍କୋର କରାଯାଇଥିଲା। ଦ୍ୱିତୀୟ ଦିନରେ ମାତ୍ର ୬୭ ରନରେ ୩ ଉଇକେଟ ଖସିଯିବା ପରେ ପନ୍ତ କ୍ରିଜରେ ପାଦ ଦେଇଥିଲେ ଏବଂ ସେ ଆସିବା ମାତ୍ରେ ଦ୍ରୁତ ବ୍ୟାଟିଂ ଆରମ୍ଭ କରିଥିଲେ। ଦିନର ଖେଳ ଶେଷ ହେବା ବେଳକୁ ସେ ୧୨ ରନ ସ୍କୋର କରି ଅପରାଜିତ ରହିଥିଲେ।
ତୃତୀୟ ଦିନ ପନ୍ତ ଇନିଂସକୁ ଆଗକୁ ନେଇଥିଲେ ଏବଂ ଏଥର ସେ ତାଙ୍କ ସମୟ ନେଇ ତାଙ୍କ ଆକାଉଣ୍ଟରେ ରନ ଯୋଡିଥିଲେ। ପ୍ରଥମ ଅଧିବେଶନରେ ପ୍ରାୟ ଦେଢ ଼ଘଣ୍ଟା ଖେଳିବା ପରେ ପନ୍ତ ତାଙ୍କର ଅର୍ଦ୍ଧଶତକ ହାସଲ କରିଥିଲେ। ସେ ନିଜ ଟେଷ୍ଟ କ୍ୟାରିୟରର ଦ୍ୱାଦଶ ଅର୍ଦ୍ଧଶତକକୁ ୮୮ ବଲରେ ହାସଲ କରିଥିଲେ।
ପନ୍ତ ଏହା ପୂର୍ବରୁ ୨୩ ଡିସେମ୍ବର ୨୦୨୨ରେ ମିରପୁର ଟେଷ୍ଟର ପ୍ରଥମ ଇନିଂସରେ ବାଂଲାଦେଶ ବିପକ୍ଷରେ ଅର୍ଦ୍ଧଶତକ ହାସଲ କରିଥିଲେ।
