ପଟ୍ଟାଙ୍ଗି,୭।୪(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ୍ ସୀମାକୁ ଲାଗି ରହିଥିବା ପଡୋଶୀ ଆନ୍ଧ୍ର ସୀମା ଭିତରେ ସାଲୁର୍ ଘାଟିରେ ଦୁର୍ଘଟଣା । ଏକ ଟ୍ରକ୍ ଭାରସାମ୍ୟ ହରାଇ ଓଲଟି ପଡିଥିବା ବେଳେ ୨୬ ନଂ ଜାତୀୟ ରାଜପଥରେ ଗାଡ଼ି ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯାଇଥିଲା । ଫଳରେ ଉଭୟ ଆନ୍ଧ୍ର ଓଡ଼ିଶା ଅଭିମୁଖେ ଆସୁଥିବା ସମସ୍ତ ଯାନବାହନ ଅଟକି ରହିଥିଲା ।
ସୂଚନା ଅନୁସାରେ ଓଡ଼ିଶାର ଜୟପୁରରୁ ଏକ ଟ୍ରକ୍ ଚାଉଳ ଲୋଡ କରି ଆନ୍ଧ୍ର ଅଭିମୁଖେ ଯାଉଥିବା ସମୟରେ ସାଲୁର୍ ଘାଟର ଏକ ବୁଲାଣିଆ ରାସ୍ତାରେ ଭାରସାମ୍ୟ ହରାଇ ରାତି ପ୍ରାୟ ୧୨ଟା ସମୟରେ ଓଲଟି ପଡିଥିଲା । ଯାହାଫଳରେ ରାତିରୁ ମଙ୍ଗଳବାର ସକାଳ ୦୭ଟା ପର୍ଯ୍ୟନ୍ତ କୈଣସି ଗାଡ଼ି ଚଳାଚଳ ହୋଇ ନଥିଲା । ଖବରପାଇ ଆନ୍ଧ୍ର ରାଜ୍ୟର ପାସପେଣ୍ଡା ପୋଲିସ୍ ୮ ଟା ବେଳେ ପହଞ୍ଚି ଦୁର୍ଘଟଣା ଗ୍ରସ୍ତ ଟ୍ରକକୁ ହଟାଇବା ପାଇଁ ଉଦ୍ୟମ ଆରମ୍ଭ କରିଥିଲେ । ହେଲେ ବିଳମ୍ବରେ ପୋଲିସ ପହଞ୍ଚିବା କାରଣରୁ ରାସ୍ତାରେ ଅଟକି ରହିଥିବା ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଦୀର୍ଘ ୬ ଘଣ୍ଟା ପରେ ରାସ୍ତା ଜାମ୍ ହଟିଛି । ବର୍ତ୍ତମାନ ଯାନବାହାନ ଚଳାଚଳ ସ୍ବାଭାବିକ ହୋଇପାରିଛି ।