ବମ୍ବେ: ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଆତ୍ମହତ୍ୟା ବୋଲି ମୁମ୍ବାଇ ପୋଲିସ ଏକପ୍ରକାର ସ୍ପଷ୍ଟ କରିଛି। ହେଲେ ଏହାକୁ ମାନିବାକୁ ପ୍ରଶଂସକ ଏକ ପ୍ରକାର ନାରାଜ। ଘଟଣାକୁ ଏକ ମାସରୁ ଊର୍ଦ୍ଧ୍ୱ ସମୟ ବିତି ଯାଇଥିଲେ ହେଁ ସେମାନେ ପ୍ରେମିକା ରିୟା ଚର୍କବର୍ତ୍ତୀଙ୍କୁ କଟାକ୍ଷ କରିବାକୁ ପଛାଉ ନାହାନ୍ତି। ସୁଶାନ୍ତଙ୍କ ଆତ୍ମହତ୍ୟା ପଛର କାରଣ ସେ ଥିବା ସନ୍ଦେହ କରୁଛନ୍ତି ପ୍ରଶଂସକ। ଏହାକୁ ନେଇ ରିୟାଙ୍କୁ ଅନେକ ଧମକ ମଧ୍ୟ ଦେଉଛନ୍ତି। ହେଲେ ଏବେ ରିୟା ନିଜର ପ୍ରତିକ୍ରିୟା ରଖି ଟ୍ରୋଲରମାନଙ୍କୁ କଡ଼ା ଜବାବ ଦେଇଛନ୍ତି।
ରିୟାଙ୍କୁ ସୋସିଆଲ ମିଡିଆରେ ବଳାତ୍କାର ସହ ହତ୍ୟା କରିଦେବାକୁ ଜଣେ ଧମକ ଦେଇଥିଲେ। ଏହାର ଜବାବ ଦେବାକୁ ଯାଇ ରିୟା ଉକ୍ତ ବ୍ୟବହାରକାରୀଙ୍କ ବାର୍ତ୍ତାର ସ୍କ୍ରିନ୍ଶଟ୍ ନେଇ ଇନ୍ଷ୍ଟା ପୃଷ୍ଠାରେ ଶେୟାର କରିଛନ୍ତି। ଏଥିରେ ତୁମର ବଳାତ୍କାର ଓ ହତ୍ୟା ମୁଁ କରିବି। ଆତ୍ମହତ୍ୟା କର। ନଚେତ ମୁଁ ତୁମକୁ ହତ୍ୟା କରିବା ଲାଗି କିଛି ଲୋକଙ୍କୁ ପଠାଇବି ବୋଲି ଉକ୍ତ ମହିଳା ଲେଖିଛନ୍ତି।
ଏହାର ଜବାବରେ ରିୟା ଲେଖିଛନ୍ତି, ମୋତେ ହତ୍ୟାକାରୀ କୁହାଗଲା, ମୁଁ ଚୁପ୍ ରହିଲି। ହେଲେ ମୋ ଚୁପ୍ ରହିବାକୁ ନେଇ ଏଭଳି କିପରି ଭାବିପାରିଲେ ଯେ, ଯଦି ମୁଁ ଆତ୍ମହତ୍ୟା ନ କରେ ତେବେ ମୋର ବଳାତ୍କାର ଓ ହତ୍ୟା ଆପଣ କରିବେ। ଆପଣ କେତେବଡ଼ କଥା କହିଛନ୍ତି ହୁଏତ ଆପଣଙ୍କୁ ଜଣା ନ ଥିବ। ଏହା ଅପରାଧ। ଆଇନ ଅନୁଯାୟୀ ଆପଣ କାହାକୁ ଉତ୍ପୀଡ଼ନ କରିପାରିବେ ନାହିଁ। ପୋଷ୍ଟକୁ ରିୟା ସାଇବର କ୍ରାଇମ୍ ହେଲ୍ପଲାଇନ୍ ଏବଂ ସାଇବର କ୍ରାଇମ୍ ଇଣ୍ଡିଆକୁ ଟ୍ୟାଗ୍ କରିବା ସହ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି।
କହିରଖୁଛୁ, ସୁଶାନ୍ତଙ୍କ ମୃତ୍ୟୁର ଏକ ମାସ ପରେ ରିୟା ଏକ ଇମୋସନାଲ ପୋଷ୍ଟ ଲେଖି ତାଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ।
