ନୂଆଦିଲ୍ଲୀ,୨୪।୧୧ : କେନ୍ଦ୍ର ସରକାର ସମସ୍ତ ମନ୍ତ୍ରଣାଳୟ ଏବଂ ବିଭାଗକୁ ନୂତନ ସମ୍ପତ୍ତି ଚିହ୍ନଟ କରିବାକୁ କହିଛନ୍ତି ଯାହା ଦ୍ୱାରା ସେସବୁର ଶୀଘ୍ର ମୁଦ୍ରୀକରଣ ହୋଇପାରିବେ। ଯାହାଦ୍ୱାରା ମୁଦ୍ରୀକରଣ ପ୍ରକ୍ରିୟାକୁ ପୁନର୍ବାର ଟ୍ରାକରେ ରଖାଯାଇପାରିବ। ଏହି ଆର୍ଥିକ ବର୍ଷ ପାଇଁ ବଜେଟ ଧାର୍ଯ୍ୟ ଲକ୍ଷ୍ୟଠାରୁ ମୁଦ୍ରୀକରଣର ଗତି ବହୁତ କମ ରହିଛି।
ମାର୍ଚ୍ଚ ୩୧ରେ ଶେଷ ହେବାକୁ ଥିବା ୨୦୨୨-୨୩ ଆର୍ଥିକ ବର୍ଷ ପାଇଁ ଜାତୀୟ ମୋନେଟାଇଜେଶନ ପାଇପଲାଇନ ଅଧୀନରେ ୧.୬ ଲକ୍ଷ କୋଟି ରାଜସ୍ବ ପ୍ରାପ୍ତି ଲକ୍ଷ୍ୟ ରଖାଯାଇଛି। ପ୍ରଥମ ସାତ ମାସରେ ସରକାରଙ୍କ ମୋନେଟାଇଜେଶନରୁ ଆୟ ମାତ୍ର ୩୩,୪୪୩ କୋଟି ହୋଇପାରିଛି। ନୂତନ ସମ୍ପତ୍ତି ବିକ୍ରୟରୁ ଏହାର ରାଜସ୍ବ ୧.୨୪ ଲକ୍ଷ କୋଟି ଟଙ୍କାରୁ ଅଧିକ ହେବ ବୋଲି କେନ୍ଦ୍ର ଆଶା କରିଛି।
ରେଳବାଇ, ଟେଲିକମ ଏବଂ ପେଟ୍ରୋଲିୟମ ସମେତ ଅନେକ ମନ୍ତ୍ରଣାଳୟ ଅଛି, ଯାହା ଲକ୍ଷ୍ୟଠାରୁ ବହୁ ଦୂରରେ ପଛୁଆ ରହିଛନ୍ତି। ଏହି ଦିଗରେ ଗତି ତ୍ୱରାନୱିତ କରିବାକୁ ସେମାନଙ୍କୁ କୁହାଯାଇଛି। ରେଳବାଇକୁ ୩୦ ହଜାର କୋଟି ଟଙ୍କା ହାସଲ ଧାର୍ଯ୍ୟ କରାଯାଇଥିବାବେଳେ ଏହାର ରାଜସ୍ବ ସଂଗ୍ରହ ଏପର୍ଯ୍ୟନ୍ତ ୪,୯୯୯ କୋଟିରେ ପହଞ୍ଚିଛି। ଟେଲିକମ ମନ୍ତ୍ରଣାଳୟକୁ ୨୦,୧୮୦ କୋଟି ଟଙ୍କାର ଲକ୍ଷ୍ୟ ଧାର୍ଯ୍ୟ କରାଯାଇଥିବାବେଳେ ଏହା ମାତ୍ର ୪,୭୦୦ କୋଟି ଟଙ୍କା ମୂଲ୍ୟର ସମ୍ପତ୍ତି ବିକ୍ରି ପ୍ରକ୍ରିୟା ଜାରି ରଖିଛି। ଏହି ଆର୍ଥିକ ବର୍ଷ ଶେଷ ସୁଦ୍ଧା ଏହି ମନ୍ତ୍ରଣାଳୟ ଦ୍ୱାରା କୌଣସି ସମ୍ପତ୍ତିର ମୋନେଟାଇଜେଶନ ହେବାର ସମ୍ଭାବନା ନାହିଁ।
ସେହିଭଳି ପେଟ୍ରୋଲିୟମ ମନ୍ତ୍ରଣାଳୟକୁ ଚଳିତ ଆର୍ଥିକ ବର୍ଷ ପାଇଁ ମୋନେଟାଇଜେଶନ ଲାଗି ୯,୧୭୬ କୋଟି ଟଙ୍କାର ରାଜସ୍ବ ଧାର୍ଯ୍ୟ କରାଯାଇଛି, କିନ୍ତୁ ଏପର୍ଯ୍ୟନ୍ତ ଏହା ପ୍ରାୟ ୨ ହଜାର କୋଟିରେ ପହଞ୍ଚିବାକୁ ସକ୍ଷମ ହୋଇଛି। ଯେଉଁ ମନ୍ତ୍ରଣାଳୟ ସେମାନଙ୍କ ଲକ୍ଷ୍ୟ ପୂରଣ କରିବାରେ ସକ୍ଷମ ହୋଇନାହାଁନ୍ତି ସେମାନଙ୍କୁ ନୂତନ ସମ୍ପତ୍ତି ଚିହ୍ନଟ କରିବାକୁ କୁହାଯାଇଛି। ଏହି ପ୍ରସଙ୍ଗରେ ଜଡିତ ବିଶେଷଜ୍ଞମାନେ ଏହା ମଧ୍ୟ କହିଛନ୍ତି ଯେ ମନ୍ତ୍ରଣାଳୟ ଏବଂ ବିଭାଗକୁ ମଧ୍ୟ ସରକାର ଏକ ଗାଇଡଲାଇନ ପଠାଉଛନ୍ତି। ତାଙ୍କ କହିବାନୁସାରେ, ଏହି ପଦକ୍ଷେପ ନିଆଯାଇଛି ଯେତେବେଳେ ଅନେକ ମନ୍ତ୍ରଣାଳୟ ଏବଂ ବିଭାଗ ପୂର୍ବରୁ ଚିହ୍ନଟ ହୋଇଥିବା ବହୁ ସମ୍ପତ୍ତିର ମୋନେଟାଇଜେଶନ ବନ୍ଦ କରି ଦେଇଛନ୍ତି।
