ରାଉରକେଲା ଅଫିସ/ସୁନ୍ଦରଗଡ଼,୫।୭(ଡି.ଏନ୍.ଏ.): କରୋନା ସଂକ୍ରମଣକୁ ରୋକିବା ଲାଗି ରାଉରକେଲା ପ୍ରଶାସନ ତରଫରୁ ନିର୍ଦ୍ଦିଷ୍ଟ ୧୪ଟି ଜିଲାରୁ ଆସୁଥିବା ଲୋକଙ୍କୁ କ୍ୱାରାଣ୍ଟାଇନରେ ରହିବା ବାଧ୍ୟତାମୂଳକ କରାଯାଇଛି। ଏହି ଜିଲାଗୁଡ଼ିକ ହେଉଛି ଖୋର୍ଦ୍ଧା, ଭଦ୍ରକ, ବଲାଙ୍ଗୀର, ପୁରୀ, ଝାରସୁଗୁଡ଼ା, ଯାଜପୁର, ମୟୂରଭଞ୍ଜ, ଗଞ୍ଜାମ, ବାଲେଶ୍ୱର, ନୟାଗଡ଼, କଟକ, କେନ୍ଦୁଝର, ଗଜପତି, ଓ ଜଗତସିଂହପୁର। ଏହି ଜିଲାରୁ ରାଉରକେଲା ସହରକୁ ଆସୁଥିବା କିମ୍ବା ରାଉରକେଲା ସହରରୁ ଉପରୋକ୍ତ ଜିଲାକୁ ଯାଇ ଫେରୁଥିବା ଲୋକ ବିପିୟୁଟି ପଞ୍ଜୀକରଣ କେନ୍ଦ୍ରଠାରେ ନାମ ପଞ୍ଜୀକରଣ କରିବେ। ଏହା ସହ ପ୍ରଶାସନର ପରାମର୍ଶ ଅନୁସାରେ ୧୪ ଦିନ ପର୍ଯ୍ୟନ୍ତ ହୋମ କିମ୍ବା ସରକାରୀ କ୍ୱାରାଣ୍ଟାଇନରେ ରହିବେ। ବର୍ତ୍ତମାନ ପରିସ୍ଥିତିରେ କରୋନା ସଂକ୍ରମଣକୁ ପ୍ରତିହତ କରିବାକୁ ହେଲେ କୋଭିଡ ନିୟମକୁ ପାଳନ କରିବା ପାଇଁ ପ୍ରଶାସନ ତରଫରୁ ଅନୁରୋଧ କରାଯାଇଛି l
