ଗୁଣୁପୁର,୧୨।୧(ସଂକେତ ପାତ୍ର): ରାୟଗଡା ଜିଲା ଗୁଣୁପୁର ପୌରପରିଷଦ ୧୯ନଂ ୱାର୍ଡ ଓମ ନଗରରୁ ଆସିଛି ଏକ ହୃଦୟସ୍ପର୍ଶୀ କାହାଣୀ, ଯାହା ପ୍ରେମ ଓ ସ୍ବାମୀ-ସ୍ତ୍ରୀ ସମ୍ପର୍କର ଅନନ୍ୟ ପରିଭାଷା ଦେଇଯାଉଛି। ଏବେ ଚାଲିଛି ପ୍ରେମର ଋତୁ। ଯୁବପିଢି ଭାଲେଣ୍ଟାଇନ ଡେ’ ପାଳନ କରି ପ୍ରେମର ଅଭିବ୍ୟକ୍ତି କରୁଛନ୍ତି। କିନ୍ତୁ ଅନେକ ସମୟରେ ପ୍ରେମରେ ସ୍ଥିରତା ନ ଥାଏ, ବିବାହ ପରେ ମଧ୍ୟ ସମ୍ପର୍କରେ ଅସ୍ଥିରତା ଦେଖାଯାଏ। ଏପରି ସମୟରେ ୮୫ ବର୍ଷୀୟ ଅବସରପ୍ରାପ୍ତ ଶିକ୍ଷକ ଉଦୟ ଚନ୍ଦ୍ର ନାୟକ ସତ୍ୟ ପ୍ରେମର ଉଦାହରଣ ସ୍ଥାପନ କରିଛନ୍ତି।
୧୯୬୭ ମସିହାରେ ସେ ଗୁଡାରି ଗ୍ରାମର ମୃଦୁଭାଷିନୀ ନାୟକଙ୍କୁ ବିବାହ କରିଥିଲେ। ଦୀର୍ଘ ଦାମ୍ପତ୍ୟ ଜୀବନରେ ଦୁହେଁଙ୍କ ମଧ୍ୟରେ ଥିଲା ଗଭୀର ଭଲପାଇବା ଓ ନିବିଡ ସମ୍ପର୍କ। କିନ୍ତୁ ୨୦୨୨ରେ ପତ୍ନୀଙ୍କ ଅକାଳ ବିୟୋଗ ତାଙ୍କୁ ଗଭୀର ଶୋକରେ ବୁଡାଇ ଦେଇଥିଲା। ପତ୍ନୀଙ୍କ ସ୍ମୃତିକୁ ଚିରସ୍ଥାୟୀ କରିବା ଓ ସର୍ବସାଧାରଣଙ୍କ ଉପକାର ପାଇଁ କିଛି କରିବାର ଉଦ୍ଦେଶ୍ୟରେ ଉଦୟ ନାୟକ ଗୁଣୁପୁର କୋର୍ଟ ସମ୍ମୁଖରେ ଅବସ୍ଥିତ ପୁରାତନ ତ୍ରିନାଥ ମନ୍ଦିର ପ୍ରାଙ୍ଗଣରେ ପ୍ରାୟ ୮ ଲକ୍ଷ ଟଙ୍କା ବ୍ୟୟ କରି ୧୦୦୦ ସ୍କୋଏର ଫୁଟ ଅଞ୍ଚଳରେ ଏକ ଛାତପକା ମଣ୍ଡପ ଓ ଚଉରା ମଣ୍ଡପର ଛାଉଣି ନିର୍ମାଣ କରିଛନ୍ତି। ସେ ନିଜେ ସ୍ଥଳରେ ଉପସ୍ଥିତ ରହି କାମର ତଦାରଖ କରି ସମ୍ପୂର୍ଣ୍ଣ କାର୍ଯ୍ୟକୁ ସାରିଥିଲେ। ନାୟକ ଏହି କାମ କରିବା ପରେ ନିଜେ ଆତ୍ମସନ୍ତୋଷ ଲାଭ କରିବା ସହ ତାଙ୍କ ପତ୍ନୀଙ୍କ ସ୍ମୃତି ସାଉଁଟିଛନ୍ତି ବୋଲି କହିଛନ୍ତି।
ପରିଣତ ବୟସରେ ମଧ୍ୟ ପତ୍ନୀଙ୍କ ପ୍ରତି ଏହି ଅତୁଟ ଭଲପାଇବା ସମସ୍ତଙ୍କୁ ଚମକିତ କରିବା ସହ ବେଶ ପ୍ରଶଂସା ସାଉଁଟିଛି। ତାଙ୍କ ପରିବାରରେ ତିନୋଟି ଝିଅ ଓ ଗୋଟିଏ ପୁଅ ଅଛନ୍ତି, ଯେଉଁମାନେ ମଧ୍ୟ ଏହି ଉଦ୍ୟମକୁ ସମର୍ଥନ ଜଣାଇ ଗର୍ବ ଅନୁଭବ କରୁଛନ୍ତି। ନାୟକଙ୍କ ପରିଣତ ବୟସରେ ଏଭଳି ଉଦ୍ୟମ ବେଶ ପ୍ରଶଂସନୀୟ ବୋଲି ମତ ପ୍ରକାଶ ପାଇଛି।
ଆଧୁନିକ ସମାଜରେ ଯେଉଁଠାରେ ସମ୍ପର୍କରେ ଅସ୍ଥିରତା ବୃଦ୍ଧି ପାଉଛି, ସେଠାରେ ଉଦୟ ନାୟକଙ୍କ ଏହି ପଦକ୍ଷେପ ନିଶ୍ଚିତ ଭାବେ ପ୍ରେରଣାର ଏକ ଉତ୍ସ ହେବ। ପ୍ରେମ କେବଳ ଦିନେକର ପାଳନ ନୁହେଁ, ଏହା ଜୀବନ ଭରି ରହିଥିବା ଏକ ଅଟୁଟ ବନ୍ଧନ ଏହି ବାର୍ତ୍ତା ଦେଇଛନ୍ତି ଅବସରପ୍ରାପ୍ତ ଶିକ୍ଷକ।
Dharitri – Odisha’s No.1 Odia Daily
