ଭୁବନେଶ୍ୱର,୨୪।୨: ଆଇସିଆଇସିଆଇ ବ୍ୟାଙ୍କ ପକ୍ଷରୁ ବୁଧବାର ଏହାର ଆଗାମୀ ଯୋଜନା ଓ କାରବାର ସହିତ ଚଳିତ ଆର୍ଥିକ ବର୍ଷର ଓଡିଶା କାରବାର ସମ୍ପର୍କରେ ଏକ ଫଳାଫଳ ଘୋଷଣା କରାଯାଇଛି। ସେହିଭଳି ବ୍ୟାଙ୍କର ବିଭିନ୍ନ ଡିଜିଟାଲ ଅଭିଯାନ ଓ ଗ୍ରାହକ କୈନ୍ଦ୍ରୀକ ବ୍ୟବସ୍ଥା ଜରିଆରେ ରାଜ୍ୟରେ କିପରି ଏହାର ରିଟେଲ ଫ୍ରାଞ୍ଚାଇଜିକୁ ଆହୁରି ଅଧିକ ସୁଦୃଢ଼ କରି ହେବ ସେ ଦିଗରେ ବ୍ୟାଙ୍କ ଆବଶ୍ୟକ ପଦକ୍ଷେପ ଗ୍ରହଣ କରୁଛି। ଏହି ଅଭିଯାନଗୁଡ଼ିକ ଯୋଗୁ ରାଜ୍ୟରେ ବ୍ୟାଙ୍କର ଖୁଚୁରା ଋଣ ଆବଣ୍ଟନ ଗତବର୍ଷ ତୁଳନାରେ ଚଳିତ ଆର୍ଥିକ ବର୍ଷ (୨୦୨୧-୨୨ ଆର୍ଥିକ ବର୍ଷ)ରେ ୨୫% ବୃଦ୍ଧି ପାଇ ୫,୨୦୦ କୋଟି ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଆଶା କରାଯାଉଛି।
ଏ ସମ୍ପର୍କରେ ଆଇସିଆଇସିଆଇ ବ୍ୟାଙ୍କର କାର୍ଯ୍ୟନିର୍ବାହୀ ନିର୍ଦ୍ଦେଶକ (ଇଡି) ଅନୁପ ବାଗ୍ଚୀ ଏକ ଖବରଦାତା ସମ୍ମିଳନୀ ଜରିଆରେ କହିଛନ୍ତି, ଆମ ପାଇଁ ଓଡ଼ିଶା ହେଉଛି ଏକ ଗୁରୁତ୍ୱପୂର୍ଣ୍ଣ ବଜାର। ନିକଟରେ ଥିବା ୪ଟି ରାଜ୍ୟରେ ଆମର ରିଟେଲ ବ୍ୟାଙ୍କିଙ୍ଗ୍ ପରିଚାଳନା ପାଇଁ ଭୁବନେଶ୍ୱରକୁ ମୁଖ୍ୟାଳୟ କରାଯାଇଛି। ଓଡ଼ିଶାରେ ବିଭିନ୍ନ ପ୍ରକାର ଡିଜିଟାଲ ଅଭିଯାନ ଜରିଆରେ ଆମେ ଆମର ଫ୍ରାଞ୍ଚାଇଜି, ଡେଲିଭରି ଓ ସେବା ପ୍ରଦାନ ଦକ୍ଷତାକୁ ସୁଦୃଢ଼ କରିବାକୁ ପ୍ରୟାସ ଜାରି ରଖିଛୁ। ସେହିଭଳି ଚଳିତ ଆର୍ଥିକ ବର୍ଷରେ ରାଜ୍ୟରେ ଦ୍ରୁତ ଗତିରେ ଏହାର ଖୁଚରା ଋଣ ବ୍ୟବସାୟକୁ ବିସ୍ତାର କରିବା ଲାଗି ବ୍ୟାଙ୍କ ଏହାର ପ୍ରଯୁକ୍ତି ଶକ୍ତିକୁ ବ୍ୟବହାର କରୁଛି। ବନ୍ଧକ ଋଣ ଆବଣ୍ଟନ ରାଜ୍ୟରେ ୩୦% ବୃଦ୍ଧି ପାଇ ୧,୨୫୦ କୋଟି ଟଙ୍କାକୁ ବୃଦ୍ଧି ପାଇବ ବୋଲି ବ୍ୟାଙ୍କ ପକ୍ଷରୁ ଆଶା କରାଯାଉଥିବା ବେଳେ ମୁଖ୍ୟତଃ ବ୍ୟକ୍ତିଗତ ଋଣ ଓ ଯାନ ଋଣକୁ ନେଇ ଗଠିତ ଉପଭୋକ୍ତା ଋଣ ୪୦%ରୁ ଅଧିକ ବୃଦ୍ଧି ପାଇ ୧୮୦୦ କୋଟି ଟଙ୍କାର ହେବ ବୋଲି ଆଶା କରାଯାଉଛି। ବ୍ୟାଙ୍କ ଏହାର ବ୍ୟବସାୟ ଋଣ ଓ ଓଭରଡ୍ରାଫ୍ଟ ଆବଣ୍ଟନକୁ ୩୫% ବଢ଼ାଇ ୧୩୦୦ କୋଟିରୁ ଊର୍ଦ୍ଧ୍ୱ କାରବାର କରିବାକୁ ଲକ୍ଷ୍ୟ ରଖିଛି।
ବନ୍ଧକ ଋଣ ସମ୍ପର୍କରେ ବିସ୍ତୃତ ସୂଚନା ପ୍ରଦାନ ସହ ବାଗ୍ଚୀ କହିଛନ୍ତି, ତୁରନ୍ତ ଋଣ ମଞ୍ଜୁର ଏବଂ ଅଣୁ ବଜାରରେ ସମ୍ପ୍ରସାରଣ ଯୋଗୁ ଓଡ଼ିଶାରେ ଆମର ବନ୍ଧକ ଋଣ ଆଗକୁ ବଢ଼ିଛି। ଆମର ଏହିସବୁ ଅଭିଯାନ ଯୋଗୁ ବନ୍ଧକ ଋଣ ଆବଣ୍ଟନ ଓଡ଼ିଶାରେ ଗତବର୍ଷ ତୁଳନାରେ ଚଳିତ ଆର୍ଥିକ ବର୍ଷ ୨୦୨୨ରେ ପ୍ରାୟ ୩୦% ବୃଦ୍ଧି ପାଇ ୧,୨୫୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ସେହିଭଳି ରାଜ୍ୟରେ ୪୫୦ ଟଚ୍ ପଏଣ୍ଟ ସହ ୧୬୦ ଶାଖା ଓ ୨୯୦ ଏଟିଏମ୍ର ଏକ ବୃହତ୍ ନେଟ୍ୱର୍କ ବ୍ୟାଙ୍କର ରହିଛି। ୧୬୦ଟି ଶାଖା ମଧ୍ୟରୁ ପ୍ରାୟ ୭୦% ଶାଖା ଅର୍ଦ୍ଧ ସହରାଞ୍ଚଳ ଓ ଗ୍ରାମାଞ୍ଚଳରେ ରହିଛି। ଅନ୍ୟମାନଙ୍କ ମଧ୍ୟରେ ଆଇସିଆଇସିଆଇ ବ୍ୟାଙ୍କର ବରିଷ୍ଠ ଅଧିକାରୀ ବିକାଶ ଶର୍ମା, କୌଶିକ ଦତ୍ତ, ପ୍ରଦୋଷ ରଞ୍ଜନ ରାଉତଙ୍କ ସମେତ ବହୁ ଅଧିକାରୀ ଓ କର୍ମଚାରୀ ମଧ୍ୟ ଉପସ୍ଥିତ ଥିଲେ।
