ମାଲକାନଗିରି,୨ା୧୧(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ଉପାଧ୍ୟକ୍ଷଙ୍କ ସହ ଆଉ ୬ ଜଣ ବିଜେଡିର ପ୍ରାଥମିକ ସଦସ୍ୟ ପଦବୀରୁ ଇସ୍ତଫା ଦେଇଛନ୍ତି। ଶନିବାର ଏନେଇ ପୂର୍ବତନ ମୁଖ୍ୟମନ୍ତ୍ରୀ ତଥା ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ଏକ ଚିଠି ମାଧ୍ୟମରେ ଜଣାଇଛନ୍ତି।
ସେମାନେ କହିଛନ୍ତି ଯେ, କୋରୁକୋଣ୍ଡା ବ୍ଲକ ଉପାଧ୍ୟକ୍ଷ ମାନସିକ ପଡିଆମୀଙ୍କ ସହ ସମିତିସଭ୍ୟା ରିନା ମାଡକାମୀ, ଇର୍ମା ମାଡି, ପଦିଆ ସୋଡି, ମଦାନୀ ପାମିଆ,ପର୍ଶୁରାମ ଖେମୁଣ୍ଡୁ, ଲଇଛନ ଶିଶା ବିଜେଡିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ଏହି ଚିଠିରେ ଉଲ୍ଲେଖ ରହିଛି ଯେ, ବିଜୁ ପଟ୍ଟନାୟକଙ୍କ କାର୍ଯ୍ୟକଳାପରେ ଅନୁପ୍ରାଣୀତ ହୋଇ ସମସ୍ତେ ବିଜୁ ଜନତା ଦଳରେ ସାମିଲ ହୋଇଥିଲେ। କିନ୍ତୁ ଆଜକୁ ପ୍ରାୟ ଅଢେଇ ବର୍ଷ ହେବ କୋରୁକୋଣ୍ଡା ବ୍ଲକ ସଭାପତି ସତ୍ୟ ପାଣିଗ୍ରାହୀ ଓ କୋରୁକୋଣ୍ଡା ବ୍ଲକ ଅଧ୍ୟକ୍ଷ ଜିତୁ ବୁରୁଡି ସରକାରଙ୍କ ସମସ୍ତ ନୀତି ନିୟମକୁ ଅଣଦେଖା କରିବା ସହ ନିଜ ଇଚ୍ଛା ମୁତାବକ କାର୍ଯ୍ୟ କରି ଆସୁଛନ୍ତି।
ଏ ସମ୍ବନ୍ଧରେ ଆମେ ଚିତ୍ରକୋଣ୍ଡାର ପୂର୍ବତନ ବିଧାୟକ ଓ ପୂର୍ବତନ ଏମ୍ପିଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଆମ୍ଭମାନଙ୍କୁ ଏହି ୨ ଜଣ ଅଣଦେଖା କରିବା ସହ କୋରୁକୋଣ୍ଡା ବ୍ଲକ ଅଧ୍ୟକ୍ଷ ଆମ୍ଭମାନଙ୍କ କୌଣସି କଥାକୁ ଭ୍ରୁକ୍ଷେପ ନ କରି ନିଜ ଇଚ୍ଛା ମୁତାବକ ସମସ୍ତ ଉନ୍ନୟନମୂଳକ କାର୍ଯ୍ୟ କରି ଆସୁଛନ୍ତି। ଏ ସମ୍ବନ୍ଧରେ ଏକ ଅନାସ୍ଥା ପ୍ରସ୍ତାବ ଆଣିବା ସହ ବିଜୁ ଜନତା ଦଳର ଜଣେ ସଦସ୍ୟଙ୍କୁ ହିଁ ବ୍ଲକ ଅଧ୍ୟକ୍ଷ ଭାବେ ଚୟନ କରିବାକୁ ନିଷ୍ପତ୍ତି ନେଇଥିଲୁ। କିନ୍ତୁ ତାହା ମଧ୍ୟ ବିଫଳ ହେଲା। କାରଣ ଏ ସମ୍ବନ୍ଧରେ ଆମ୍ଭେ ଅନାସ୍ଥା ପ୍ରସ୍ତାବ ଆଣିଥିବାବେଳେ ବ୍ଲକ ସଭାପତି ପାଣିଗ୍ରାହୀ ଓ ଜିତୁ ବୁରୁଡି ଦୁଇଜଣ ମିଶି ଆମ୍ଭମାନଙ୍କୁ କଂଗ୍ରେସର ସଦସ୍ୟ ବୋଲି ଅପପ୍ରଚାର କରିବା ସହ ସମସ୍ତ ଗଣମାଧ୍ୟମରେ ଏହା ପ୍ରକାଶିତ କରାଇଥିଲେ। ଫଳରେ ଆମ୍ଭେ ଅତିଷ୍ଠ ହୋଇ ଦଳ ଛାଡ଼ିବାକୁ ବାଧ୍ୟ ହେଉଛୁ ବୋଲି ଅଭିଯୋଗପତ୍ରରେ ଉଲ୍ଲେଖ ରହିଛି।
