କାଳିଆପାଣି,୨୪ା୧(ଡି.ଏନ.ଏ.): କାଳିଆପାଣି ଖଣି ଅଞ୍ଚଳରେ ଭୂତଳ ଖଣି ପାଇଁ ବ୍ୟାପକ ବାଲି ଦରକାର ହେଉଛି। ତେଣୁ ବାଲି ସପ୍ଲାୟର ଜଙ୍ଗଲ ଜମି, ଖେଳପଡ଼ିଆ ଓ ରାସ୍ତାକଡ଼ରେ ବେଆଇନ ଭାବେ ବାଲି ଡିପୋ କରୁଛନ୍ତି। ସେହିପରି ମାଙ୍କେଡ଼ିଆ ବସ୍ତି ନିକଟରେ ଥିବା ଏକ ଖେଳ ପଡ଼ିଆକୁ ଜବରଦଖଲ କରି ବାଲି ଆଣି ଡିପୋ କରାଯାଇଛି। ଫଳରେ ଏହାକୁ ନେଇ ମାଙ୍କେଡ଼ିଆ ବସ୍ତି ଲୋକେ ଥାନା ଓ ରାଜସ୍ବ ବିଭାଗ ଦ୍ବାରସ୍ଥ ହୋଇଥିଲେ। ହେଲେ କେହି ଏହାକୁ କର୍ଣ୍ଣପାତ କରି ନ ଥିଲା। ତେଣୁ ରବିବାର ମାଙ୍କେଡ଼ିଆ ବସ୍ତିର ଶତାଧିକ ମହିଳାପୁରୁଷ ହାଇୱାରେ ଆସିଥିବା ବାଲିକୁ ପଡ଼ିଆରେ ଖାଲି କରିବାକୁ ଦେଇ ନ ଥିଲେ। ଫଳରେ ଏହାକୁ ନେଇ ସେଠାରେ କିଛି ସମୟ ଲାଗି ଉତ୍ତେଜନା ଦେଖା ଦେଇଥିଲା। ବାଲି ଆଣିଥିବା ଗାଡ଼ିଗୁଡିକ ସେଠାରୁ ଫେରିଯିବା ପରେ ଉତ୍ତେଜନା ଶାନ୍ତ ପଡ଼ିଥିଲା।
ସୂଚନା ଥାଉକି, ବିଭିନ୍ନ ଖଣି କାର୍ଯ୍ୟ ପାଇଁ ଦୈନିକ ଶତାଧିକ ଟ୍ରକ୍ ବାଲି, ମେଟାଲ ଓ ଚିପ୍ସ ଖଣି ଅଞ୍ଚଳକୁ ବିନା କାଗଜପତ୍ରରେ ଅଣାଯାଉଛି। ହେଲେ ଏହାକୁ ସ୍ଥାନୀୟ ପ୍ରଶାସନ ନୀରବ ଭାବେ ସମର୍ଥନ କରୁଥିବା ଅଭିଯୋଗ ହେଉଛି। ହାଇୱାରେ ବାଲି, ମେଟାଲ, ଚିପ୍ସ ବୋଝେଇ ହୋଇ ଆସୁଥିବାରୁ ଗାଁ ରାସ୍ତା ଓ ଟମକା ମଙ୍ଗଳପୁର ମୁଖ୍ୟ ରାସ୍ତା ନଷ୍ଟ ହେବାରେ ଲାଗିଛି। ସ୍ଥାନୀୟ ପ୍ରଶାସନକୁ ଏହି ମାଫିଆମାନେ ହାତରେ ରଖିଥିବା କହି ଜନସାଧାରଣଙ୍କ ମନରେ ଭୟ ସୃଷ୍ଟି କରୁଥିବା ଶୁଣିବାକୁ ମିଳୁଛି। ଢେଙ୍କାନାଳ ଜିଲା ଭୁବନ ବ୍ରାହ୍ମଣୀ ନଦୀରୁ ଦିନକୁ ୩ ଟ୍ରିପ୍ ବାଲି ହାଇୱାରେ ଆସୁଥିବା ବେଳେ ଗୋଟିଏ ଟ୍ରିପ୍ର ରୟାଲଟି କାଟି ଦୁଇ ଟ୍ରିପ୍ ରୟାଲଟି ଅର୍ଥକୁ ଫାଙ୍କି ଦେଉଥିବା ଶୁଣିବାକୁ ମିଳୁଛି। ଟ୍ରକ୍ ମୁଖ୍ୟରାସ୍ତା ଭୁବନଠାରୁ ଭାୟା ମଙ୍ଗଳପୁର ଖଣି ଅଞ୍ଚଳକୁ ଆସିବା ନିୟମ ଥିବାବେଳେ ଓଭର ଲୋଡ୍ଟ୍ରକ ଗ୍ରାମାଞ୍ଚଳ ରାସ୍ତାରେ ଯାତାୟାତ କରୁଛି। ଏଥିଯୋଗୁ ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଦୀର୍ଘ ଦିନ ଧରି ଏହି କାର୍ଯ୍ୟ ଚାଲୁ ରହିଥିବା ବେଳେ ଆରଟିଓ କିମ୍ବା ସୁକିନ୍ଦା ତହସିଲଦାର ଏହାକୁ ରୋକିବାରେ ଅସମର୍ଥ ହେଉଥିବାରୁ ଅସନ୍ତୋଷ ଦେଖାଦେଉଛି।
ଏନେଇ ତହସିଲଦାର କାବେରି ମୁଦୁଲି କହିଛନ୍ତି, ବେଆଇନ ବାଲି ଡିପୋ ନେଇ ତାଙ୍କ ନିକଟରେ ଖବର ରହିଛି। ସେ ଘଟଣାସ୍ଥଳକୁ ଯାଇ ବାଲି ଡିପୋ ନ କରିବାକୁ ଚେତାବନୀ ଦେଇଥିଲେ। ଯଦି ସପ୍ଲାୟର ଅମାନିଆ ହୋଇ ଡିପୋ କରିଛନ୍ତି ତେବେ ସେ ତାହାକୁ ଜବତ କରିବେ ବୋଲି ପ୍ରକାଶ କରିଛନ୍ତି। କଙ୍କଡ଼ପାଳ ଆର୍ଆଇ ଦିଲୀପ ଚାତାର କୁହନ୍ତି, ସମ୍ପୃକ୍ତ ସପ୍ଲାୟରଙ୍କୁ ନୋଟିସ କରିଛୁ। ଯଦି ସେ ଆଉ ବାଲି ଡିପୋ କରନ୍ତି ତାହାକୁ ଜବତ କରାଯିବ।
