ନୂଆଦିଲ୍ଲୀ,୨୦।୯: ସରକାର ବିମାନ କମ୍ପାନୀଗୁଡ଼ିକୁ ଆଶ୍ୱସ୍ତି ପ୍ରଦାନ କରିବା ସହ ଯାତ୍ରୀ ପରିବହନ କ୍ଷମତା ୭୨.୫%ରୁ ୮୫%କୁ ବୃଦ୍ଧି କରିଛନ୍ତି। ଏହା ସହ ବିମାନ ଭଡ଼ା ସମ୍ପର୍କିତ ନିୟମରେ ମଧ୍ୟ ପରିବର୍ତ୍ତନ କରାଯାଇଛି। ବର୍ତ୍ତମାନ ବିମାନ ଭଡ଼ା କ୍ଷେତ୍ରରେ ସର୍ବନିମ୍ନ ଏବଂ ସର୍ବୋଚ୍ଚ ଲିମିଟ୍ ମାସରେ କେବଳ ୧୫ ଦିନ ଲାଗି ଲାଗୁ ହେବ। ଏହା ମାସର କୌଣସି ସମୟରେ ୧୫ ଦିନ ଯାଏ ଲାଗୁ ହେବ। ବିମାନ କମ୍ପାନୀଗୁଡିକ ୧୬ ଦିନଠାରୁ ବିନା କୌଣସି ସୀମାରେ ଭଡ଼ା ଲାଗୁ କରିପାରିବେ। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଗତ ବର୍ଷ ଲକ୍ଡାଉନ ପରେ ମେ ମାସରେ ବିମାନ ଭଡାର ସୀମା ନିର୍ଦ୍ଧାରଣ କରାଯାଇଥିଲା। ସେହି ସମୟରେ କମ୍ ବିମାନ ଦେଶ ମଧ୍ୟରେ ଚଳାଚଳ କରୁଥିଲା। ଫଳରେ କମ୍ପାନୀଗୁଡିକ ଟିକେଟ ଉପରେ ଅଧିକ ଭଡ଼ା ନେଉଥିଲେ। ନୂଆ ନିୟମ ଅନୁସାରେ ବିମାନ କମ୍ପାନୀଗୁଡିକ ଏବେ ୮୫% କ୍ଷମତାରେ ବିମାନ ସେବା ପ୍ରଦାନ କରିବେ। ଚଳିତ ବର୍ଷ ଅଗଷ୍ଟ ୧୨ରେ ଦେଶ ମଧ୍ୟରେ ଉଡ଼ାଣ କ୍ଷେତ୍ରରେ ଯାତ୍ରୀ କ୍ଷମତାକୁ ୬୫%ରୁ ୭୨.୫%କୁ ବୃଦ୍ଧି କରାଯାଇଥିଲା। ଜୁଲାଇ ଶେଷ ସପ୍ତାହ ତୁଳନାରେ ଅଗଷ୍ଟ ଶେଷ ସପ୍ତାହରେ ଯାତ୍ରୀ ସଂଖ୍ୟା ୩୬% ବୃଦ୍ଧି ଘଟିଛି। ୨୦୨୦ ଅଗଷ୍ଟ ତୁଳନାରେ ୨୦୨୧ ସମାନ ଅବଧିରେ ଯାତ୍ରୀ ସଂଖ୍ୟା ୨ ଗୁଣ ବୃଦ୍ଧି ଘଟିଛି।
