ନୂଆଦିଲ୍ଲୀ,୨୦।୧: ଫେବୃୟାରୀ ପହିଲାରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ୨୦୨୨-୨୩ର ବଜେଟ ଉପସ୍ଥାପନ କରିବେ। ଏହା ପୂର୍ବରୁ ଦେଶର ପ୍ରମୁଖ ଅଟୋଶିଳ୍ପ ଓ ବିଭିନ୍ନ ସଂଘ ପକ୍ଷରୁ ୨ଚକିଆ ଯାନ କାରବାର ସମ୍ପର୍କରେ ବିଭିନ୍ନ ଦାବି ଓ ପ୍ରସ୍ତାବ ଉପସ୍ଥାପନ କରାଯାଇଛି। ସରକାର ୨ଚକିଆ ଯାନ ଉପରୁ ସାମଗ୍ରୀ ଏବଂ ସେବା ଟିକସ (ଜିଏସ୍ଟି)କୁ ୨୮%ରୁ ୧୮% କୁ ଖସାଇବା ପାଇଁ ଅଟୋମୋବାଇଲ ଡିଲର ସଙ୍ଗଠନ ଫାଡା ପକ୍ଷରୁ ଦାବି ରଖାଯାଇଛି। ଫାଡାର ସୂଚନା ଅନୁସାରେ ବର୍ତ୍ତମାନ କଞ୍ଚାମାଲ, ଧାତବ ପଦାର୍ଥ ଏବଂ ଅଟୋଶିଳ୍ପ ଉପକରଣଗୁଡ଼ିକର ଦାମ୍ ଅହେତୁକ ଭାବେ ବୃଦ୍ଧିପାଇଛି। ଫଳରେ ୨ଚକିଆ ଯାନ ଦର ମଧ୍ୟ ଲଗାତର ବୃଦ୍ଧି ପାଉଛି। ସରକାର ଯଦି ଏହା ଉପରେ ଲାଗୁ କରୁଥିବା ଜିଏସ୍ଟିକୁ କିଛି ପରିମାଣରେ ହ୍ରାସ କରିବା ସହ ଟିକସ ସ୍ଲାବ୍କୁ ୧୮% କଲେ ଯାନର ମୂଲ୍ୟ ମଧ୍ୟ ସେହି ଅନୁସାରେ ହ୍ରାସ ପାଇବା ସଙ୍ଗେ ସଙ୍ଗେ ଚାହିଦା ମଧ୍ୟ ପୂର୍ବ ପରି ବୃଦ୍ଧି ପାଇବ। ନିକଟରେ ସରକାର ୪୦୦ କୋଟି ପର୍ଯ୍ୟନ୍ତ ବ୍ୟବସାୟ କରୁଥିବା ପ୍ରାଇଭେଟ୍ ଲିମିଟେଡ୍ କମ୍ପାନୀଗୁଡିକ ଉପରେ କମ୍ପାନୀ ଟିକସ ହ୍ରାସ କରି ୨୫% ପର୍ଯ୍ୟନ୍ତ କରିଛନ୍ତି। ସେହିଭଳି ଗତ କିଛି ମାସ ହେବ ୨ଚକିଆ ଯାନ ନିର୍ମାଣକାରୀ କମ୍ପାନୀଗୁଡ଼ିକର ସମସ୍ୟାର ସମାଧାନ ପାଇଁ ଫାଡା ଦାବି କରିଛି।
