କଟକ ଅଫିସ,୧୯ା୫: ଚଳିତବର୍ଷ ମାଟ୍ରିକ ପରୀକ୍ଷାରେ ପାସ୍ ହାର ପୂର୍ବ ୫ବର୍ଷର ରେକର୍ଡ ଭାଙ୍ଗିଛି। ଏଥର ସବୁ ଜିଲାରେ ୯୦% ଉପରେ ପାସ୍ ହାର ରହିଛି। କଟକ ଓ ଜଗତ୍ସିଂହପୁର ଜିଲାରେ ପାସ୍ ହାର ସର୍ବାଧିକ ୯୭.୯୯% ଥିବାବେଳେ ଖୋର୍ଦ୍ଧା ଜିଲାରେ ପାସ୍ ହାର ୯୭.୪୮% ଦ୍ୱିତୀୟ ଓ ସୁନ୍ଦରଗଡ ଜିଲାରେ ପାସ୍ ହାର ୯୭.୩୯% ରଖି ତୃତୀୟରେ ରହିଛି। ୨୦୨୧ରେ କୋଭିଡ୍ ପାଇଁ ମାଟ୍ରିକ ପରୀକ୍ଷା କରା ନଯାଇ ଫଳାଫଳ ପ୍ରକାଶ ପାଇଥିଲା। ସେଥିରେ ରାଜ୍ୟର ପାସ୍ ହାର ୯୭.୮୯% ରହିଥିଲା। ତେବେ ପରୀକ୍ଷା କରାଯାଇ ପାସ୍ ହାର ଦେଖିଲେ ଚଳିତବର୍ଷ ସର୍ବାଧିକ ପାସ୍ ହାର ରହିଛି। ୨୦୨୩ରେ ୯୬.୪୦% ପାସ୍ ହାର ରହିଥିବାବେଳେ, ୨୦୨୨ରେ ୯୦.୫୫%, ୨୦୨୦ରେ ୭୮.୭୬%, ୨୦୧୯ରେ ୭୬.୨୩%, ୨୦୧୮ରେ ୭୦.୭୮% ପାସ୍ ହାର ରହିଥିଲା। କୋଭିଡ୍ ପରଠାରୁ ରାଜ୍ୟରେ ନୂତନ ପଦ୍ଧତିରେ ପରୀକ୍ଷା ଆରମ୍ଭ ହୋଇଥିଲା। ତେବେ ଗତ ଦୁଇ ବର୍ଷରେ ନୂତନପଦ୍ଧତି ପରୀକ୍ଷାରେ ଛାତ୍ରୀଛାତ୍ରଙ୍କ ପାସ୍ ହାରରେ ବଡ ପରିବର୍ତ୍ତନ ଆସିଛି। ୨୦୧୮, ୨୦୧୯, ୨୦୨୦ରେ ପାସ୍ ହାର ୮୦% ଛୁଇଁ ନ ଥିବାବେଳେ ନୂତନ ପଦ୍ଧତିରେ ପରୀକ୍ଷା ଦ୍ୱାରା ୯୦%କୁ ବୃଦ୍ଧିପାଇଛି। ତେବେ ସର୍ବନିମ୍ନରେ ରହୁଥିବା ଜିଲାଗୁଡିକର ପାସ୍ ହାର ମଧ୍ୟ ୯୦% ଉପରେ ରହିଛି।
ଅପରପକ୍ଷରେ ପୁଣି ମାଟ୍ରିକ ପରୀକ୍ଷା ପଦ୍ଧତି ବଦଳିବାକୁ ଯାଉଛି। ବର୍ଷରେ ଆଉ ଦୁଇଟି ପରୀକ୍ଷା ହେବନାହିଁ। ପୂର୍ବଭଳି ବର୍ଷ ଶେଷରେ ଗୋଟିଏ ଥର ପରୀକ୍ଷା କରାଯିବ। କରୋନା ଯୋଗୁ କାର୍ଯ୍ୟକାରୀ କରାଯାଇଥିବା ନୂତନ ପରୀକ୍ଷା ପଦ୍ଧତିକୁ ଚଳିତବର୍ଷଠାରୁ ବନ୍ଦ କରିଦିଆଯିବ। ଏ ନେଇ ଖୁବ୍ଶୀଘ୍ର ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇବ ବୋଲି ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଉପସଭାପତି ଡ. ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି। ତେବେ ପରୀକ୍ଷାରେ ଛାତ୍ରୀଛାତ୍ରଙ୍କ ଭଲ ପ୍ରଦର୍ଶନ ପରେ ମଧ୍ୟ ପୁନର୍ବାର ପରୀକ୍ଷା ପଦ୍ଧତି ପରିବର୍ତ୍ତନ ହେବା ଖବର ବିଭିନ୍ନ ମହଲରେ ପ୍ରଶ୍ନବାଚୀ ସୃଷ୍ଟି କରିଛି।
