ଭଦୋଦରା,୫।୨(ପି.ଟି.): ଚଳିତ ଓମେନ୍ସ ପ୍ରିମିୟର ଲିଗ୍ (ଡବ୍ଲ୍ୟୁପିଏଲ୍)ର ଚତୁର୍ଥ ସଂସ୍କରଣରେ ଗୁରୁବାର ଫାଇନାଲ ମ୍ୟାଚ୍ ଖେଳାଯିବ। ଏହି ଟାଇଟଲ ମୁକାବିଲାରେ ସ୍ମୃତି ମନ୍ଧାନାଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆର୍ସିବି) ଓ ଜେମିମା ରୋଡ୍ରିଗ୍ସଙ୍କ ଦିଲ୍ଲୀ କ୍ୟାପିଟାଲ୍ସ ପରସ୍ପରକୁ ଭେଟିବେ। ଆର୍ସିବି ତା’ର ଦ୍ୱିତୀୟ ଡବ୍ଲ୍ୟୁପିଏଲ୍ ଟାଇଟଲ ଲକ୍ଷ୍ୟରେ ଥିବା ବେଳେ ଦିଲ୍ଲୀ ପ୍ରଥମ ଥର ଟ୍ରଫି ଉଠାଇବା ଉଦ୍ଦେଶ୍ୟରେ ଓହ୍ଲାଇବ। ଦିଲ୍ଲୀ ଚଳିତ ଥର ଭଳି ଏପର୍ଯ୍ୟନ୍ତ ପ୍ରତ୍ୟେକ ସଂସ୍କରଣର ଫାଇନାଲରେ ଖେଳିଛି। ହେଲେ ଦଳକୁ ଗତ ୩ ଫାଇନାଲରେ ପରାଜୟର ସମ୍ମୁଖୀନ ହେବାକୁ ପଡ଼ିଛି।
୨୦୨୪ ସଂସ୍କରଣ ଚାମ୍ପିୟନ ଆର୍ସିବି ଚଳିତ ସିଜନରେ ଚମତ୍କାର ପ୍ରଦର୍ଶନ କରିଛି। ଦଳ ୫ରୁ ୫ ମ୍ୟାଚ୍ ବିଜୟ ସହ ଅଭିଯାନ ଆରମ୍ଭ କରିଥିଲା, ଯାହାକି ଡବ୍ଲ୍ୟୁପିଏଲ୍ ଇତିହାସରେ ଯେ କୌଣସି ଦଳ ପାଇଁ ପ୍ରଥମ। ଏଥିସହିତ ଦଳର କିଛି ଖେଳାଳି ନିଜ ସ୍ତରଠାରୁ ଖୁବ ଭଲ ପ୍ରଦର୍ଶନ କରି ଦଳକୁ ମ୍ୟାଚ୍ ଜିତାଇଛନ୍ତି। ଦଳର ପ୍ରାୟତଃ ଖେଳାଳି କୌଣସି ନା କୌଣସି ମ୍ୟାଚ୍ରେ ଗୁରୁତ୍ୱପୂର୍ଣ୍ଣ ପ୍ରଦର୍ଶନ କରିଛନ୍ତି। ଅଷ୍ଟ୍ରେଲିଆର ଗ୍ରେସ ହାରିସ ୟୁପି ଓ୍ବାରିଅର୍ସ ବିପକ୍ଷ ମ୍ୟାଚ୍ରେ ୭୫ ରନର ଇନିଂସ ଖେଳିଥିବା ବେଳେ ଗୌତମି ନାଏକ ଗୁଜରାଟ ଜାଏଣ୍ଟ୍ସ ବିପକ୍ଷରେ ୭୩ ରନ କରିଥିଲେ। ଦଳର ବ୍ୟାଟରଙ୍କ ମଧ୍ୟରେ ମନ୍ଧାନା, ହାରିସ, ଜର୍ଜିଆ ଭଲ ଓ ରିଚା ଘୋଷ ଚଳିତ ସିଜନରେ ସ୍ଥିର ପ୍ରଦର୍ଶନ କରିଛନ୍ତି। ନାଦିନେ ଡି କ୍ଲର୍କ ଓ ସୟାଲି ସାଟଘରେ ବୋଲିଂରେ ଉଲ୍ଲେଖନୀୟ ପ୍ରଦର୍ଶନ କରିଛନ୍ତି। ଦକ୍ଷିଣ ଆଫ୍ରିକୀୟ କ୍ଲର୍କ ୮ ମ୍ୟାଚ୍ରେ ୧୫ ଉଇକେଟ ସହ ଚଳିତ ସିଜନରେ ସର୍ବାଧିକ ସଂଖ୍ୟକ ଉଇକେଟ ନେଇଥିବା ବୋଲରଙ୍କ ତାଲିକାରେ ତୃତୀୟ ସ୍ଥାନରେ ରହିଛନ୍ତି। ତାଙ୍କ ସହିତ ଶ୍ରେୟଙ୍କା ପାଟିଲଙ୍କ ସ୍ପିନ ବୋଲର ମିଡିଲ ଓଭରରେ ଦଳକୁ ନିୟନ୍ତ୍ରଣ ପ୍ରଦାନ କରୁଛି।
ଅନ୍ୟପକ୍ଷରେ ଗତ ୩ ଥରର ରନରଅପ୍ ଦିଲ୍ଲୀ ଦଳ ଜେମିମାଙ୍କ ନେତୃତ୍ୱରେ ଉଭୟ ଜବରଦସ୍ତ ଓ ଅସ୍ଥିର ପ୍ରଦର୍ଶନ କରିଛି। ଦଳ ୪ ଲେଖାଏ ବିଜୟ ଓ ପରାଜୟ ସହ ଏଲିମିନେଟର ମ୍ୟାଚ୍ ଖେଳିଥିଲା। ଗୁଜରାଟ ବିପକ୍ଷ ଏଲିମିନେଟ୍ର ମ୍ୟାଚ୍କୁ ଦଳ ଅତି ସହଜରେ ଜିତି ଫାଇନାଲରେ ପ୍ରବେଶ କରିଛି। ଦଳର ଉଭୟ ବ୍ୟାଟିଂ ଓ ବୋଲିଂ ବିଭାଗର କିଛି ଖେଳାଳିଙ୍କ ପ୍ରଦର୍ଶନ ଉଲ୍ଲେଖନୀୟ ରହିଛି। ବୋଲରଙ୍କ ମଧ୍ୟରେ ଚିନେଲ ହେନରୀ ଓ ନନ୍ଦନୀ ଶର୍ମା ଚଳିତ ସିଜନରେ ପ୍ରଭାବୀ ପ୍ରଦର୍ଶନ କରିଛନ୍ତି।
