ବେଙ୍ଗାଲୁରୁ,୨୪।୭:କର୍ନାଟକର ବାଗଲକୋଟ ଜିଲାର ବନହଟ୍ଟି ଅଞ୍ଚଳର ସନ୍ସାଇନ ମଲ୍ଟି ସ୍ପେଶିଆଲିଟି ହସ୍ପିଟାଲରେ ମଙ୍ଗଳବାର ୨୫ ଆଙ୍ଗୁଠି ଥିବା ଏକ ଦୁର୍ଲଭ ଶିଶୁ ଜନ୍ମ ହୋଇଛି। ଏହି ଶିଶୁର ୨ ହାତରେ ୧୩ଟି ଆଙ୍ଗୁଠି ଥିବା ବେଳେ ୨ ପାଦରେ ୧୨ଟି ଆଙ୍ଗୁଠି ରହିଛି। ସେହିପରି ଶିଶୁର ବାମ ହାତରେ ୭ ଆଙ୍ଗୁଠି ଥିବା ସହ ଡାହାଣ ହାତରେ ୬ ଆଙ୍ଗୁଠି ରହିଛି। ଉଭୟ ବାମ ଓ ଡାହାଣ ପାଦରେ ୬ଟି ଲେଖାଏ ଆଙ୍ଗୁଠି ରହିଛି।
ତେବେ ନବଜାତକର ଜନ୍ମରେ ମା’ ଭାରତୀ(୩୫) ଓ ବାପା ଗୁରପ୍ପା କୋନୁର ଖୁସି ଅଛନ୍ତି। ଶିଶୁର ଏତେ ସଂଖ୍ୟକ ଆଙ୍ଗୁଠି ଥିବାକୁ ସେମାନେ ଭଗବାନଙ୍କର ଆଶୀର୍ବାଦ ବୋଲି କହିଛନ୍ତି। ତେବେ କ୍ରୋମୋଜୋମରେ ଅସନ୍ତୁଳନ ଦେଖାଯିବା ଯୋଗୁ ଏଭଳି ବ୍ୟତିକ୍ରମ ଘଟିଥାଏ ବୋଲି ସନ୍ସାଇନ୍ ହସ୍ପିଟାଲର ପ୍ରସୂତି ତଥା ସ୍ତ୍ରୀରୋଗ ବିଶେଷଜ୍ଞ ଡକ୍ଟର ପାର୍ବତୀ ହିରେମାଥ କହିଛନ୍ତି। ଡାକ୍ତରୀ ଭାଷାରେ ଏହି ବିରଳ ଜେନେଟିକ୍ ଡିସ୍ଅର୍ଡରକୁ ପଲିଡାକ୍ଟିଲି କୁହାଯାଏ। ଏହା ଯୋଗୁ ନବଜାତ ଶିଶୁର ଅଧିକ ସଂଖ୍ୟାରେ ଆଙ୍ଗୁଠି ଥାଏ ବୋଲି ଡକ୍ଟର ପାର୍ବତୀ କହିଛନ୍ତି। ତେବେ ବର୍ତ୍ତମାନ ଉଭୟ ନବଜାତ ଶିଶୁ ଓ ତା’ର ମା’ ସୁସ୍ଥ ଅଛନ୍ତି। ତଥାପି ଉଭୟଙ୍କୁ କିଛି ଦିନ ପର୍ଯ୍ୟନ୍ତ ଯତ୍ନନେବାର ଆବଶ୍ୟକତା ରହିଛି ବୋଲି ସେ କହିଛନ୍ତି।
