ସମ୍ବଲପୁର,୧୨ା୨(ପ୍ରମୋଦ ବହିଦାର):ସମ୍ବଲପୁରରେ ଜଣେ ଯୁବତୀଙ୍କୁ ବାରମ୍ବାର ବଳାତ୍କାର କରାଯିବା ସହ ଧର୍ମ ପରିବର୍ତ୍ତନର ଚାପ ପକାଯାଇଥିବା ଅଭିଯୋଗ ହୋଇଛି। ପୀଡ଼ିତା ମଙ୍ଗଳବାର ସନ୍ଧ୍ୟାରେ ଧନୁପାଲି ଥାନାରେ ଏତଲା ଦେବା ପରେ ଘଟଣା ଚର୍ଚ୍ଚା ସୃଷ୍ଟି କରିଛି। ଏତଲା ଆଧାରରେ ପୋଲିସ ସ୍ଥାନୀୟ ଥାନା କୁମ୍ଭାରପଡ଼ାର ଅମୀର ଓରଫ ରାଜା ଖାନଙ୍କ ନାମରେ ମାମଲା(ନଂ.୩୨/୨୫) ରୁଜୁକରି ତଦନ୍ତ ଆରମ୍ଭ କରିଛି। ଅଭିଯୁକ୍ତ ଅମୀରଙ୍କୁ ଧରିିବାକୁ ଉଦ୍ୟମ କରାଯାଉଛି ବୋଲି ସମ୍ବଲପୁର ସଦର ଏସ୍ଡିପିଓ ତୋଫାନ ବାଗ୍ କହିଛନ୍ତି।
ଏତଲା ଅନୁସାରେ ପୀଡ଼ିତାଙ୍କ ପିତା ଓ ଭାଇମାନଙ୍କୁ ଅମୀର ହତ୍ୟା ଧମକ ଦେଇ ବିବାହ କରିବାକୁ ବାଧ୍ୟ କରିଥିଲେ। ଫଳରେ ପରିବାରର ସୁରକ୍ଷା ଦୃଷ୍ଟିରୁ ପୀଡିତା ଗତ ୩ ତାରିଖରେ ଘରୁ ଟଙ୍କା ଓ ଗହଣା ଧରି ଅମୀରଙ୍କ ସହ ଚାଲିଯିବାକୁ ବାଧ୍ୟ ହୋଇଥିଲେ। ଏହାପରେ ଅମୀର ତାଙ୍କୁ ଫସାଇ ସୁନ୍ଦରଗଡ଼, ରାଜଗାଙ୍ଗପୁର ଆଦି ବିଭିନ୍ନ ସ୍ଥାନକୁ ନେଇ ବଳପୂର୍ବକ ଶାରୀରିକ ସମ୍ପର୍କ ରଖିଥିଲେ। ପ୍ରତିବାଦ କରିବାରୁ ତାଙ୍କୁ ମାଡ଼ ମାରିଥିଲେ। ବିବାହ କରିବାକୁ ହେଲେ ଧର୍ମ ପରିବର୍ତ୍ତନ କରିବାକୁ ପଡିବ ବୋଲି ବାଧ୍ୟକରି ହତ୍ୟା ଧମକ ଦେଉଥିଲେ। ଏପରିକି ତାଙ୍କୁ ଅମୀର ଗୋମାଂସ ମଧ୍ୟ ଖାଇବାକୁ ବାଧ୍ୟ କରିଥିଲେ ବୋଲି ପୀଡ଼ିତ ତାଙ୍କ ଏତଲାରେ ଦର୍ଶାଇଛନ୍ତି। ସୋମବାର ସନ୍ଧ୍ୟାରେ ବସ୍ ଯୋଗେ ସମ୍ବଲପୁର ଆସି ପୀଡ଼ିତାଙ୍କୁ ଅମୀର ଛାଡ଼ି ଫେରାର ହୋଇଯାଇଥିଲେ ବୋଲି ପୋଲିସକୁ କହିଛନ୍ତି।
