ମୁମ୍ବାଇ: ଟଲିଉଡର ପାୱାର କପଲ ରାମ ଚରଣ ଏବଂ ଉପାସନା କୋନିଡେଲାଙ୍କ ଘରକୁ ଆସିଛନ୍ତି ଦୁଇ ନୂଆ ଅତିଥି। ଉପାସନା ଏକ ପୁତ୍ର ଏବଂ ଏକ କନ୍ୟା ସନ୍ତାନ (ଯମଜ)ଙ୍କୁ ଜନ୍ମ ଦେଇଛନ୍ତି। ଏହି ଖୁସି ଖବର ମେଗାଷ୍ଟାର ଚିରଞ୍ଜୀବୀ ସୋସିଆଲ ମିଡିଆ ମାଧ୍ୟମରେ ପ୍ରଶଂସକଙ୍କୁ ଜଣାଇବା ସହ ଉଭୟ ମା’ ଏବଂ ଶିଶୁ ସୁସ୍ଥ ଥିବା ସୂଚନା ଦେଇଛନ୍ତି। ଉପାସନା ୨୦୨୫ ଅକ୍ଟୋବରରେ ନିଜର ଦ୍ୱିତୀୟ ଗର୍ଭଧାରଣ ବିଷୟରେ ଜଣାଇଥିଲେ, ଯାହା ପରେ ପରିବାର ପକ୍ଷରୁ ଏକ ଭବ୍ୟ ‘ବେବି ସାୱାର’ ଉତ୍ସବର ଆୟୋଜନ କରାଯାଇଥିଲା।
ଚିରଞ୍ଜୀବୀ ଟ୍ୱିଟ୍ କରି ଲେଖିଛନ୍ତି, “ଅତ୍ୟନ୍ତ ଆନନ୍ଦ ଏବଂ କୃତଜ୍ଞତାର ସହ ଜଣାଉଛୁ ଯେ ରାମ ଚରଣ ଓ ଉପାସନାଙ୍କୁ ଭଗବାନ ଯମଜ ସନ୍ତାନର ଆଶୀର୍ବାଦ ଦେଇଛନ୍ତି। ଆମ ପରିବାର ପାଇଁ ଏହା ଏକ ଦୈବୀ ଆଶୀର୍ବାଦ।”
ବିବାହର ୧୦ ବର୍ଷ ପରେ ୨୦୨୩ ମସିହାରେ ଏହି ଦମ୍ପତିଙ୍କର ପ୍ରଥମ ସନ୍ତାନ ଭାବେ କନ୍ୟା ‘କ୍ଲିନ୍ କାରା’ ଜନ୍ମଗ୍ରହଣ କରିଥିଲେ। ଏବେ ଯମଜ ସନ୍ତାନଙ୍କ ଆଗମନ ପରେ ତାଙ୍କ ପରିବାର ସମ୍ପୂର୍ଣ୍ଣ ହୋଇଛି।
୨୦୧୨ ଜୁନ୍ ମାସରେ ବିବାହ କରିଥିବା ଏହି ଷ୍ଟାର୍ ଦମ୍ପତିଙ୍କୁ ସିନେ ଜଗତର ବହୁ ବିଶିଷ୍ଟ ବ୍ୟକ୍ତି ଏବଂ ପ୍ରଶଂସକମାନେ ଅଭିନନ୍ଦନ ଜଣାଇବାରେ ଲାଗିଛନ୍ତି।
