ଯାଜପୁର ଅଫିସ/ ରସୁଲପୁର(ଡି.ଏନ୍.ଏ.),୩ା୨: ଭୁବନେଶ୍ୱର ରମାଦେବୀ ମହିଳା ବିଶ୍ୱବିଦ୍ୟାଳୟ ଛାତ୍ରୀ ଝରାଫୁଲ ନାୟକ(୨୧)ଙ୍କ ମୃତ୍ୟୁ ଘଟଣାରେ ଗିରଫ ରାକେଶ କୁମାର ସ୍ବାଇଁଙ୍କୁ ପୋଲିସ ୩ ଦିନିଆ ରିମାଣ୍ଡରେ ଆଣିଛି। ମଙ୍ଗଳବାର ରିମାଣ୍ଡର ପ୍ରଥମ ଦିନରୁ ପୋଲିସ ଜୋରଦାର ଜେରା ଆରମ୍ଭ କରିଛି। ମଧ୍ୟାହ୍ନରେ ପୋଲିସ ରାକେଶଙ୍କୁ ଝରାଫୁଲଙ୍କ ମୃତଦେହ ପକାଇଥିବା ମୂଳାପାଳ ଛକ ଦିଆଲଖରି ରାସ୍ତାକୁ ନେଇ ପଚରାଉଚୁରା କରିଛି। କିଭଳି ମୃତଦେହ ଫୋପାଡ଼ିଥିଲେ ତାହାର ଡେମୋ ରାକେଶ ଦେଖାଇଥିଲେ। ଝରାଫୁଲଙ୍କ ମୋବାଇଲକୁ ଏକ ବାଦାମ କିଆରିକୁ ଫୋପାଡ଼ି ଦେଇଥିବା ରାକେଶ ପୋଲିସକୁ କହିଛନ୍ତି। ଘଟଣାସ୍ଥଳଠାରୁ ୧୦୦ ମିଟର ପୂର୍ବରୁ ମୋବାଇଲ ପକାଯାଇଥିବା ସୂଚନା ମିଳିବା ପରେ ପୋଲିସ ତାକୁ ଖୋଜିବା ଆରମ୍ଭ କରିଛି।
ପୋଲିସ ଡାକରା ପାଇ ଝରାଫୁଲଙ୍କ ବାପା ରମାକାନ୍ତ ନାୟକ ଓ ବଡ଼ଭାଇ ପୂର୍ବାହ୍ନ ସାଢ଼େ ୧୧ଟାରେ କୁଆଖିଆ ଥାନାରେ ପହଞ୍ଚତ୍ଥିଲେ। ଦିନ ତମାମ ସେମାନଙ୍କୁ ମଧ୍ୟ ଜେରା କରାଯାଇଥିଲା। ସନ୍ଧ୍ୟାରେ ସେମାନେ ଘରକୁ ଫେରିଛନ୍ତି। ଝରାଫୁଲଙ୍କ ବଡ଼ଭାଇ ବ୍ୟବହାର କରୁଥିବା ମୋବାଇଲକୁ ପୋଲିସ ନିଜ ହେପାଜତକୁ ନେଇଛି। ସେହି ମୋବାଇଲରେ ପରିବାର ଲୋକେ ଝରାଫୁଲ ସହିତ କେତେଥର କଥା ହୋଇଛନ୍ତି ଏବଂ କ’ଣ କଥା ହୋଇଛନ୍ତି, କେଉଁ ସମୟରେ କେତେଥର ମେସେଜ୍ ଦିଆଯାଇଛି, ତାକୁ ନେଇ ପୋଲିସ ଖୋଳତାଡ଼ ଆରମ୍ଭ କରିଛି। ଝରାଫୁଲ ମୋବାଇଲରୁ ମେସେଜ୍ ଦେବା ସମୟରେ ସେ ଜୀବତ ଥିଲେ, ନା ନିଜ ଦୋଷ ଲୁଚାଇବା ପାଇଁ ରାକେଶ ତାଙ୍କ ମୋବାଇଲ ବ୍ୟବହାର କରୁଥିଲେ ସେ ସମ୍ପର୍କରେ ସ୍ପଷ୍ଟ ହୋଇ ପାରିନାହିଁ। ଏ ସମ୍ପର୍କରେ ତର୍ଜମା କରିବା ପାଇଁ ଝରାଫୁଲଙ୍କ ବଡ଼ଭାଇଙ୍କ ମୋବାଇଲକୁ ରଖାଯାଇଛି ବୋଲି ପୋଲିସ କହିଛି। ଅନ୍ୟପକ୍ଷେ ଭୁବନେଶ୍ୱର ଶିବ ସାହି ଗେଷ୍ଟ ହାଉସର ୨ କର୍ମଚାରୀଙ୍କୁ କୁଆଖିଆ ପୋଲିସ ଡାକି ଜେରା କରିଛି। ରାକେଶ ପୋଲିସ ସମ୍ମୁଖରେ କୌଣସି ସତ କହି ନ ଥିବା ଝରାଫୁଲଙ୍କ ବାପା ଅଭିଯୋଗ କରିଛନ୍ତି। ପୋଲିସ ଯେଉଁଦିନ ଡାକିବ, ଆମେ ଥାନାକୁ ଆସିବୁ ବୋଲି ରମାକାନ୍ତ କହିଛନ୍ତି। ରାକେଶଙ୍କ ସହଯୋଗୀଙ୍କୁ ଗିରଫ କରିଛି ନା ନାହିଁ ଓ ମୃତଦେହ ନେବା ପାଇଁ ବ୍ୟବହୃତ ସ୍କୁଟିକୁ ଜବତ କରାଯାଇଛି ନାହିଁ ସେ ସମ୍ପର୍କରେ ପୋଲିସଠାରୁ କୌଣସି ସୂଚନା ମିଳିପାରିନାହିଁ। ତଦନ୍ତ ଅଧିକାରୀ ଚିନ୍ମୟ କୁମାର ନାୟକ କହିଛନ୍ତି, ଅନ୍ୟ ଜଣେ ଅଭିଯୁକ୍ତଙ୍କୁ ଖୁବଶୀଘ୍ର ଗିରଫ କରାଯିବ। ଏହି ଘଟଣାର ପର୍ଦ୍ଦାଫାଶ ହେବାକୁ ଯାଉଛି ବୋଲି ସେ ସୂଚନା ଦେଇଛନ୍ତି।
