ନୂଆଦିଲ୍ଲୀ, ୧୮ା୧୨ (ପି.ଟି.)-ପୂର୍ବତନ ରାଜ୍ୟ ସଭା ସଦସ୍ୟ ତଥା ଭେଟେରାନ କଂଗ୍ରେସ ନେତା ରାଜୀବ ଶୁକ୍ଳା ପୁଣିଥରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଉପସଭାପତି ହେବାକୁ ଯାଉଛନ୍ତି। ବୋର୍ଡର ସଦସ୍ୟମାନେ ତାଙ୍କୁ ସର୍ବସମ୍ମତି କ୍ରମେ ନିର୍ବାଚିତ କରିବା ଲାଗି ନିଷ୍ପତ୍ତି ନେଇଛନ୍ତି। ଶୁକ୍ଳା ପୂର୍ବରୁ ଏନ୍. ଶ୍ରୀନିବାସନଙ୍କ କାର୍ଯ୍ୟକାଳରେ ଉପସଭାପତି ଭାବେ କାର୍ଯ୍ୟ କରିଥିଲେ। ଆଇପିଏଲ୍ ଗଭର୍ନିଂ କାଉନ୍ସିଲର ସେ ଥିଲେ ଜଣେ ଲୋକପ୍ରିୟ ଚେୟାରମ୍ୟାନ। ଡିଡିସିଏ (ଦିଲ୍ଲୀ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନ) ସଭାପତି ରୋହନ ଜେଟ୍ଲୀ ଶୁକ୍ଳାଙ୍କ ନାମ ପ୍ରସ୍ତାବ ରଖିଥିଲେ। ଉତ୍ତରାଖଣ୍ଡର ମହିମ ବର୍ମା ସମର୍ଥନ କରିଥିଲେ, ଯିଏକି ଚଳିତବର୍ଷ ପ୍ରାରମ୍ଭରେ ଏହି ପଦ ତ୍ୟାଗ କରିଥିଲେ। ବର୍ମା ପଦତ୍ୟାଗ କରିବା ମାତ୍ରେ ଏହି ପଦବୀ ପାଇଁ ଶୁକ୍ଳାଙ୍କ ନାମ ସବୁଠାରୁ ଆଗରେ ରହିଥିଲା। ଖବର ଅନୁସାରେ ଶୁକ୍ଳାଙ୍କ ପାଇଁ କୁଲିଂ ଅଫ୍ ପିରିୟଡ ଲାଗୁ ହେବ ନାହିଁ। କାରଣ ଆଇପିଏଲ୍ ଚେୟାରମ୍ୟାନଶିପ୍ ଜଣେ କର୍ମକର୍ତ୍ତାଙ୍କ କାର୍ଯ୍ୟକାଳ ହିସାବରେ ଗଣତି ହୁଏ ନାହିଁ। ଡିସେମ୍ବର ୨୪ରେ ଅହମ୍ମଦାବାଦରେ ବିସିସିଆଇର ବାର୍ଷିକ ସାଧାରଣ ଅଧିବେଶନ ବସିବ। ଏଥିରେ ଶୁକ୍ଳା ବିଧିବଦ୍ଧ ଭାବେ ନିର୍ବାଚିତ ହେବେ। ଅନ୍ୟପକ୍ଷରେ ଅନ୍ୟ ଦୁଇଜଣ ସଦସ୍ୟ ଆଇପିଏଲ୍ ଚେୟାରମ୍ୟାନ ବୈଜେଶ ପଟେଲ ଏବଂ ଖୈରୁଲ ଜମାଲ (ମାମନ) ମଜୁମଦାର ଗଭର୍ନିଂ କାଉନ୍ସିଲକୁ ପୁନଃ ନିର୍ବାଚିତ ହୋଇଛନ୍ତି। ବର୍ତ୍ତମାନ ସମୟରେ କୌଣସି ୟୁନିଟ୍ ନିର୍ବାଚନ ଚାହୁ ନାହାନ୍ତି।
