ଜି.ଉଦୟଗିରି,୨୯ା୧୦(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): ଅକ୍ଟୋବର ମାସଟି ବାତ୍ୟା ମାସ ଭାବେ ପରିଚିତ। ଚଳିତବର୍ଷ ମଧ୍ୟ ସରକାରୀ ପାଣିପାଗ ବିଭାଗର ଆକଳନ ଓ ସୂଚନା ଅନୁସାରେ ଅକ୍ଟୋବର ମାସର ଶେଷଆଡ଼କୁ ବାତ୍ୟା ନେଇ ଅନୁମାନ କରାଯାଉଥିଲା। ଯାହା ସଠିକ୍ ରହିଛି ବୋଲି ବୁଦ୍ଧିଜିବୀ ମହଲରେ ଆଲୋଚନା ହେଉଛି। ଚଳିତ ବାତ୍ୟା ମୋନ୍ଥାର ଗତିବିଧିକୁ ଲକ୍ଷ୍ୟ କରି ପାଣିପାଗ ବିଭାଗ ତରଫରୁ କନ୍ଧମାଳ ଜିଲାକୁ ରେଡ୍ ଜୋନ୍ରେ ଅନ୍ତର୍ଭୁକ୍ତ କରିଥିଲା। ମୋନ୍ଥାର ପ୍ରଭାବରେ ଜି.ଉଦୟଗିରି ଅଞ୍ଚଳରେ ବର୍ଷା ଜାରି ରହିଛି ତା’ ସାଙ୍ଗକୁ ପବନର ବେଗ ମଧ୍ୟ ଦେଖିବାକୁ ମିଳୁଛି।
ସ୍ଥାନୀୟ ପାଣିପାଗ ବିଭାଗର ସୂଚନା ଅନୁସାରେ, ବୁଧବାର ସକାଳ ୮ ଟା ପର୍ଯ୍ୟନ୍ତ ୬୦ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଛି। ବାତ୍ୟାର ପ୍ରଭାବରେ ଦୋକାନ ବଜାର ଶୂନ୍ଶାନ୍ ଦେଖିବାକୁ ମିଳିଛି। ଧନଜୀବନ ସୁରକ୍ଷା ପାଇଁ ଅଙ୍ଗନଓ୍ବାଡି, ସ୍କୁଲ, କଲେଜ ବନ୍ଦ ରହିଛି। ସ୍ଥାନୀୟ ପ୍ରଶାସନ ତରଫରୁ ସମସ୍ତ ବ୍ୟବସ୍ଥା କରାଯାଇଛି। ବ୍ଲକ ତରଫରୁ ବିଭିନ୍ନ ପଞ୍ଚାୟତରେ ୮ ଟି ଓ ଏନ୍ଏସି ତରଫରୁ ୨ଟି ବାତ୍ୟା ଆଶ୍ରୟସ୍ଥଳୀ କରାଯାଇଥିବା ବେଳେ ଅଞ୍ଚଳରେ କୌଣସି ଅଘଟଣ ଘଟି ନ ଥିବା ସୂଚନା ମିଳିଛି।
Dharitri – Odisha’s No.1 Odia Daily
