ବଲାଙ୍ଗୀର,୯ା୨(ସୁନିଲ କୁମାର ମହାନ୍ତି): ବଲାଙ୍ଗୀର ରେଲଓ୍ବେ ଷ୍ଟେଶନରୁ ମାତ୍ର ୧ କିଲୋମିଟର ଦୂର ଖୁଜେନପାଲି ନିକଟସ୍ଥ ବଲାଙ୍ଗୀର ଦେଓଗାଁ ରେଲଓ୍ବେ ଟ୍ରାକ୍ ଉପରେ ଜଣେ ଅଜଣା ବ୍ୟକ୍ତିଙ୍କ ମୁଣ୍ଡବିହୀନ ମୃତଦେହ ବୁଧବାର ବଲାଙ୍ଗୀର ରେଳବାଇ ପୋଲିସ ଉଦ୍ଧାର କରିଥିଲା। ଅଜଣା ବ୍ୟକ୍ତିଙ୍କ ପରିଚୟ ଏଯାଏ ମିଳି ପାରି ନ ଥିବାବେଳେ, ଟ୍ରେନ ଟ୍ରାକ୍ରେ କଟି ଯାଇଥିବା ମୁଣ୍ଡ ମଧ୍ୟ ଏପର୍ଯ୍ୟନ୍ତ ମିଳିପାରିନାହିଁ। ପାଞ୍ଚ ଦିନ ବିତି ଯାଇଥିଲେ ସୁଦ୍ଧା ବଲାଙ୍ଗୀର ରେଲବାଇ ପୋଲିସ ମୃତ ବ୍ୟକ୍ତିଙ୍କ ମୁଣ୍ଡକୁ ଖୋଜି ବାହାର କରିପାରିବାରେ ବିଫଳ ହୋଇଛି। ଏପରିକି ମୃତ ବ୍ୟକ୍ତିଙ୍କ ପରିଚୟ ନ ମିଳିବାରୁ ରବିବାର ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଟିଟଲାଗଡ ରୋଡ୍ ବିଜାଖମନଠାରେ ମୁଣ୍ଡ ବିହୀନ ମୃତଦେହକୁ ରେଳବାଇ ପୋଲିସଙ୍କ ଉପସ୍ଥିତିର ଶବ ସତ୍କାର କରାଯାଇଥିଲା। ଅଜଣା ବ୍ୟକ୍ତିଙ୍କ ପରିଚୟ ନ ମିଳିବାରୁ ଏବେ ଏହି ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି।
ବଲାଙ୍ଗୀର ଜିଲାରୁ ପ୍ରତ୍ୟେକ ଦିନ ବାହାର ରାଜ୍ୟକୁ ଲୋକେ ଦାଦନ ଖଟି ଯାଉଥିବା ବେଳେ ଏକ ମୁଣ୍ଡ ବିହୀନ ମୃତଦେହ ମିଳିବା ଘଟଣାକୁ ନେଇ ଏବେ ସନ୍ଦେହ ସୃଷ୍ଟି ହୋଇଛି। କୌଣସି ଶ୍ରମିକଙ୍କର ମୃତଦେହ ହୋଇଥାଇପାରେ ବୋଲି ଆଲୋଚନା ହେଉଛି। ଅନ୍ୟପଟେ ଏହା ଏକ ହତ୍ୟା ନା ଆତ୍ମହତ୍ୟା ତାକୁ ନେଇ ମଧ୍ୟ ଆଲୋଚନା ହେଉଛି। ଏନେଇ ଜିଆର୍ପି ପୋଲିସ ପକ୍ଷରୁ ତଦନ୍ତ ଜାରି ରହିଥିବା ବେଳେ ଅଜଣା ମୃତ ବ୍ୟକ୍ତିଙ୍କ ମୁଣ୍ଡକୁ ୫ଦିନ ବିତି ଯିବା ପରେ ମଧ୍ୟ ରେଳବାଇ ପୋଲିସ ଖୋଜି ବାହାର କରିବାରେ ବିଫଳ ହୋଇଛି। ଅଜଣା ମୃତ ବ୍ୟକ୍ତିଙ୍କ ପରିଚୟ ନ ମିଳିବାରୁ ମାଜିଷ୍ଟ୍ରେଟଙ୍କ ଉପସ୍ଥିତିରେ ଶବସତ୍କାର କରଯାଇଥିବା ରେଳବାଇ ଭାରପ୍ରାପ୍ତ ପୋଲିସ ଅଧିକାରୀ ମକାରୁ ସାହୁ କହିଛନ୍ତି।
ସୂଚନା ଅନୁଯାୟୀ, ବୁଧବାର ପୂର୍ବାହ୍ନରେ ଟ୍ରାକ୍ରେ କେହି ଜଣେ ପଡ଼ିଥିବାର ଖବର ପାଇବା ପରେ ରେଲଓ୍ବେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ରେଲଓ୍ବେ ଟ୍ରାକ୍ରେ ଜଣେ ମୁଣ୍ଡ ବିହୀନ ଲୋକର ମୃତଦେହ ପଡ଼ିଥିବାର ଦେଖିବାକୁ ପାଇଥିଲା। ସେଠାରୁ ମୃତଦେହକୁ ଉଦ୍ଧାର କରି ଭୀମ ଭୋଇ ମେଡିକାଲ କଲେଜ ଓ ହସ୍ପିଟାଲର ବ୍ୟବଚ୍ଛେଦ କେନ୍ଦ୍ରକୁ ପଠାଇଥିଲା ବଲାଙ୍ଗୀର ରେଳବାଇ ପୋଲିସ। ତେବେ ୫ଦିନ ବିତିଯାଇଥିଲେ ମଧ୍ୟ ଏ ଯାଏ ପୋଲିସକୁ ଅଜଣା ବ୍ୟକ୍ତିଙ୍କ ମୁଣ୍ଡ ମିଳିପାରିନାହିଁ କି ପରିଚୟ ମଧ୍ୟ ପୋଲିସ ଚିହ୍ନଟ କରିପାରିନାହିଁ ।
