ଚେଷ୍ଟର-ଲି- ଷ୍ଟ୍ରିଟ୍, ୨୧।୭: ସ୍ଥାନୀୟ ରିଭରସାଇଡ୍ ଗ୍ରାଉଣ୍ଡରେ ଭାରତ ଓ କାଉଣ୍ଟି ସିଲେକ୍ଟ ଏକାଦଶ ମଧ୍ୟରେ ମଙ୍ଗଳବାରଠାରୁ ୩ ଦିନିଆ ଅଭ୍ୟାସ ମ୍ୟାଚ୍ ଆରମ୍ଭ ହୋଇଛି। ବିରାଟ କୋହଲିଙ୍କ ଅନୁପସ୍ଥିତିରେ ରୋହିତ ଶର୍ମା ଭାରତୀୟ ଦଳର ନେତୃତ୍ୱ ନେଇଛନ୍ତି। ଟସ୍ ଜିତି ଭାରତ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଉଇକେଟକିପର ବ୍ୟାଟ୍ସମ୍ୟାନ ଲୋକେଶ ରାହୁଲ ୧୦୧ ରନର ଶତକୀୟ ଇନିଂସ ଖେଳିଛନ୍ତି। ପ୍ରଥମ ଦିବସ ଖେଳ ଶେଷ ସୁଦ୍ଧା ଭାରତ ୯୦ ଓଭରରେ ୯ ଉଇକେଟ ହରାଇ ୩୦୬ ରନ ସଂଗ୍ରହ କରିଛି।
ଇନିଂସ ଆରମ୍ଭରୁ ଭାରତ ଝଟକା ଖାଇଥିଲା। ଓପନର ରୋହିତ ଶର୍ମା ୯ ଓ ମୟଙ୍କ ଅଗ୍ରଓ୍ବାଲ ୨୮ ରନକରି ଲିଣ୍ଡନ ଜେମ୍ସଙ୍କ ଦ୍ୱାରା ଆଉଟ ହୋଇଥିଲେ। ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ୨୧, ମିଡ୍ଲ ଅର୍ଡର ବ୍ୟାଟ୍ସମ୍ୟାନ ହନୁମା ବିହାରୀ ୨୪ ରନକରି ପ୍ୟାଭିଲିୟନ ଫେରିଥିଲେ। ତେବେ ରାହୁଲ ୧୫୦ଟି ବଲ୍ ଖେଳି ୧୧ ଚୌକା ଓ ୧ ଛକା ସହ ୧୦୧ ରନକରି ଶତକ ହାସଲ କରିବା ପରେ ରିଟାୟାର୍ଡ ହଟ୍ ହୋଇ ପ୍ୟାଭିଲିୟନ ଫେରିଥିଲେ। ଏହାପରେ ଅଲରାଉଣ୍ଡର ରବିନ୍ଦ୍ର ଜାଡେଜା ୭୫ ରନର ଲଢୁଆ ଇନିଂସ ଖେଳ ଆଉଟ ହୋଇଥିଲେ। ସେହିପରି ଶାର୍ଦ୍ଦୁଳ ଠାକୁର ୨୦, ଉମେଶ ଯାଦବ ୧୨ ରନକରି ଆଉଟ ହୋଇଥିବା ବେଳେ ଅନ୍ୟମାନେ ବିଫଳ ହୋଇଥିଲେ। ବୋଲିଂରେ କାଉଣ୍ଟି ଦଳ ତରଫରୁ କ୍ରଗ୍ ମାଇଲ୍ସ ୩, ଜେମ୍ସ ଓ ଲିଆମ- ପାଟେରଶନ- ହ୍ବାଇଟ୍ ୨ଟି ଲେଖାଏ ଓ ଜ୍ୟାକ କାର୍ସନ ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଭାରତ ପ୍ରଥମ ଇନିଂସ- ୯୦ ଓଭରରେ ୩୦୬/୯
(ରାହୁଲ- ୧୦୧, ମୟଙ୍କ- ୨୮, ପୂଜାରା- ୨୧, ହନୁମା- ୨୪, ଜାଡେଜା- ୭୫, ଠାକୁର- ୨୦, କ୍ରେଗ ମାଇଲ୍ସ- ୩/୪୨, ଜେମ୍ସ- ୨/୩୨, ଲିୟମ-ପାଟରସନ- ହ୍ବାଇଟ- ୨/୭୯)।
